Жузла кIапIриван садирхъули, ардашахъули гIямрула бурхIни, дунъяла тарихлизи арбякьун 2023 ибил дус.
Гьар даим бируливан, илизирра лерри дунъяла вайтира гIяхIтира, сяхIбатунира, пашмандешла анцIбукьунира.
Наб гьанбиркуливан, 2023 ибил дуслизиб лебилра Россияла ва Дагъиста халкьла уркIиличи челукьуси дардра шишимра сабри, Украинализиб бетурхуси хасси дявила балбуц. Дунъяла гIяламлизир духудеш чедидиркур, сен биалра, узити халкьанала ургарти душмандеш тIашдизахъес имканти алкIан или хьулрикIули дус кабикиб.
Иличи че, октябрьличир Палестинализир дехIдихьибти анцIбукьунани, дунъяла адамти уркIаиб. Гьаннала заманала технологиябани лебилра дунъяла халкь илди кахдешунала бикьруми бетарахъули саби. Нуша бикьрумили, селизибалра гIяйибагарти дурхIнира, хьунул адамтира, бухънабира бомбабала бирули саби. Гьуя-гьарай бикIути гIялам халкьла тIама, бунагькарти хIякимтани бикьули ахIен
Гьарил дехIибалалис гIелабад нуни балга бирулра: «Ца хIули кьяпбаресцад манзил набчи ну хъармарираба Аллагь, ХIела уркIецIи ряхIмулиур хIеррараба Аллагь». Балга дила хъалибарглисра, тухум-шантасра, Дагъистайсра, лебилра дунялисра саби. Дунъяличи гIяхIдеш хьурабиахъес багьандан иличибра гIяхIси селра пикрибарили ахIенра.
Халкь талихIчебли хIербиахъес багьандан, ЧевяхIси Аллагьли лерилра шуртIри акIахъубли сари ва адамтази дунья аманатбарили саби. ТалихIчевли хIериэс багьанданра, дахъал секIал хIяжатси ахIен, сунес барили хIейгахъуси, чисалра хIебирули хIериалли баибси саби адамлис.
Лябкьуси 2024 ибил дусличи халаси бирхаудира хьулра леб. Дигулра ил дуслизир гьарилла хъалибарглизир талихIра, баракатра диубли. БиштIати хIулкIули халабиули, жагьти дигайличил, аллагьла амруличил хъайчикабирули. БегIти дурхIнани разибирули. ДурхIнала гIяхIти хьулани гьардилзули.
2023-ибил дуслизиб нуни сагаси буралла багьурра: «ТалихI чуднани тIембикIуси бирар».
Дигулра даргантала юртани 2024 ибил дуслизир гьарил бархIи чуду-хинкIали тIемдикIули, талихI-баракатли дицIили. Дигулра лебталалра гIяхIти пикруми ЧевяхIси Аллагьли гIердуцили. Лебилра сунечи хIерси даршудеш дунъяличи хьурабиубли.