В лето 6576. Придоша иноплеменьници на Руську землю, половьци мнози. Изяслав же, и Святослав и Вселовод изидоша противу имь на Льто. И бывши нощи, подъидоша противу собе. Грехь же ради наших пусти бог на ны поганыя, и побегоша русьскыи князи, и победиша половьци…
Изяславу же со Всеволодом Кыеву побегшю, а Святославу Чернигову, и людье кыевстии прибегоша Кыеву, и створиша вече на торговищи, и створиша вече на торговищи, и реша, пославшеся ко князю: «Се половци росулися по земли; дай, княже, оружье и кони, и еще бьемся с ними».
Изяслав же сего не послуша. И начаша людие говорити на воеводу на Коснячька: идоша на гору, с веча, и придоша на двор Коснячьков, и не обретше его, сташа у двора Брячиславля и реша: «Поидем, высадим дружину свою ис погреба». И роазделишася надвое: половина их иде к погребу, а половина их иде по Мосту; си же придоша на княжь двор. Изяславу же сидящу на сенях с дружиною своею, начаша претися со князем, стояще доле. Князю же из оконца зрящу и дружине стоящи к князя, рече Тукы, брат Чюдинь, Изаславу: «Видиши, княже, людье възвыли; посли, ат Всеслава блюдуть». и се ему глаголющю, другая половина людий приде от погреба, отворивше погреб. И рекоша дружина князю: «Се зло есть; посли ко Всеславу, ат призвавше ко оконцю, пронзуть т мечемь». И не послуша сего князь.
Людье же кликнуша, и идоша к порубу Всеславлю. Изяслав же се видев, со Всеволодом побегоста з двора, людье же високоша Всеслава ис поруба, в 15 день семтября, и прославиша и среде двора къняжа. Двор къняжь разграбиша, бещисленое множьство злата и сребра, кунами и белью. Изяслав же бежа в Ляхы… Всеслав же седе Кыеве…
В лето 6577. Поиде Изяслав с Болеславомь на Всеслава; Всеслав же поиде противу. И приде Белегороду Всеслав, и бывши нощи, устаивъся кыян бежа из Белгорода Полотьску. Заутра же видевше людье князя бежавша, възвратишася Кыеву, и створиша вече, (и) послашася к Святославу и к Вселоводу, глаголюще6 «Мы уже зло створили есмы, князя своего прогнавше, а се ведеть на ны Лядьскую землю, а поидета в град отца своего; аще ли не хочета, то нам неволя: зажегше град свой, ступим в Гречьску землю». И рече им Святослав: «Ве послеве к брату своему; аще поидеть на вы с ляхи губити вас, то ве противу ему ратью, не даве бо погубити града отца своего; аще ли хощеть с миромъ, то в мале придеть дружине». И утешиста кыяны. Святослав же и Всеволод посласта к Изяславу, глаголюща: «Всеслав ти бежал, а не води ляхов Кыеву, противна бот и нету; аще ли хощеши гнев имети и погубити град, то веси, яко нама жаль отня стола». То слышав Изяслав остави ляхы и поиде с Болеславом, мало ляхов поим; посла же пред (собою) сына своего Мьстислава Кыеву. И пришед Мтьстислав, исече (кияны), иже беша высекли Всеслава, числом 70 чади, а другыя слепиша, другыя же без вины погуби, не испытав. Изяславу же идущю к граду, изидоша людье противу с поклоном, и прияша князь свой кыяне; и седе Изяслав на столе своемь, месяца мая в 2 день. И распуща ляхы на покорн (и), избиваху ляхы отай; (и) възвратися в ляхы Болеслав, в землю свою. Изяслав же възгна торг на гору, и прогна Всеслава ис Полотьска, посади сына своего Мьстислава Полотьске; он же вскоре умре ту.