Догъу джанда Ай джарыгъы джылтырады,
Булут аудан уакъ-уакъ сылджырады,
Тая–тая ёрге чыкъды, бетин ача,
Къарангыны седирете, нюрюн чача.
Ингир келсе кюн аууру узаяды,
Джюрегинги джарсыулары азаяды,
Чексиз алам онгу бла кёллендире,
Кюч береди джашауунга тёллендире.
Адам деген сейир затды, джаратылгъан,
Нек туугъаны билдирилмей джашатылгъан,
Чирир къабда ёлмезлик джан джюрютюучю,
Аз ёмюрге, къыт джашаугъа ёкюнюучю.
Туугъаныбыз, ёлгенибиз не ючюндю?
Бизни Джерге келтирген кюч не бичимди?
Не магъана барды былай бар болууда?
Сыр ачмагъан дунияда бу турууда?
Ненча адам, мени кибик, Айгъа къарай
Быллай соруу соргъан болур, джуаб сакълай,
Алай къадар бизге хапар билдирмейди,
Кёк-ёлюмню ачыуун да сёнгдюрмейди.
Къысха ёмюр, къысха къуанч–бизге джетген.
Чагъар-чакъмаз джокъ болууду мугур этген.
Дау этмейме, Джаратханнга, муну ючюн,
Бой салама, къабыл эте чексиз кючюн.
Толгъан Айны шош джарыгъы джайылады,
Тёгереги керамат бла къайылады,
Кёк къарайды Джерге джулдуз къарамы бла,
Ёрге тартхан, биз джетелмез, аламы бла.
2010.Кисловодск.
............
Смысл древних слов:
догъу-восток.
керамат-аура.
............