Б У Т1 А КЬ Я Н Ч И Б И :
Мях1яммад – ургарти г1ямрула дубурлан.
Урайнаб – илала хьунул.
Руслан – илдала урши.
Мака – ургарти г1ямрула дубурлан.
Г1яйшат – илала хьунул.
Гебякъиз – илдала рурси.
Г1ябидат – Г1яйшатла рузи.
Зугьра – чехьери.
Маржанат – илала ралликьяна, Русланна рузикьар.
Тамада.
Мекъла агьлу.
Анц1букь нушала бурх1назиб, нушала мер-мусаниб кабирхьур.
Ц А И Б И Л А Н Ц1 Б У КЬ
С у р а т ц а э с и л
Руслан Зугьра, х1ера сен жагаси барх1и хебал. Раши къярдличи аркьех1е.
Зугьра Къярдличир шантала гъай-мез хер.
Руслан Шантала гъай-мезлизирад урухк1улрив х1у ?
Зугьра Ах1енра, амма илди наб дигх1ейги.
Руслан Ца сек1ал бурес дигулра наб, амма …
Зугьра Ну къалабарик1улра.
Руслан Зугьра, урузк1ули вахъх1ира… Х1ечила пикриик1улра… Азбарлар чераадли, гъайэс дигулра… Муэрли чериулри…
Зугьра Руслан, диур…
Руслан Диъни балулра, амма х1у наб…
Маржанат ляркьян.
Маржанат Рак1ирив, Зугьра ? Сен сарри ?
Зугьра Г1ях1ил сарра. Х1ела аги сена ?
Маржанат Баркалла, г1ях1ил саби.
Зугьра Диъ лукьуси машина кабухили рак1ибсири. Ну къалабалира. Аркьяс.
Маржанат Руэн цабара, ихтилат бара. Ишбарх1и клублизиб ца г1ях1си концерт хеб. Аркьех1ев ?
Зугьра Х1****ас,… Халанешли рархьасли…
Маржанат Набчил рарх рурхьури. Руслан, лявкьяду нушачил варх ?
Руслан Ну юлдашуначил варх аркьяс. Х1ушацун дукьеная.
Маржанат Нушачил варх вак1адли се бетарара ?
Зугьра Вайти мух1луби шут1дик1ар…
Маржанат Дик1алли дик1аб. Нуша хъулкнад аркьули х1едиишагу.
Руслан Х1ебиалли, нуни билетуни исис.
Зугьра Раши набчи шадир.
Маржанат Се теба г1ях1си ?
Зугьра Рак1ибх1ели чебиид.
Рурсби дурабулхъан, г1елавад Русланра.
Урайнаб Чай гьачамлис дуц1арли сари.
Мях1яммад Дати цабара дярг1яхъес.
Урайнаб Мях1яммад, х1ези чуйнара гьанбушес дигули, замана х1ебургули… бурес дигули…
Мях1яммад Вях1, се саригъари иш ? Ну гьар барх1и хъулив виасли, сен замана агарси х1ела набзи сек1ал бурес ?
Урайнаб Ах1ен… ах1ен, заманализиб ах1ен анц1букь.
Мях1яммад Г1ур селизиб саби гьат1и ? Бура гьанна замана лебну.
Урайнаб Нушала… Руслан халаваили сай…
Мях1яммад Сай.
Урайнаб Ил гъану к1ира дус виубли сай…
Мях1яммад Виубли сай.
Урайнаб Институтлизив уч1ули авэсил курслизив сай…
Мях1яммад Уч1ули сай.
Урайнаб Гьанна илис гелешмеш раргес г1яг1ниси сари.
Мях1яммад Сари… т1аш, гьари, се ири х1уни ? Гелешмеш раргес г1яг1ниси сари ? Руслайсугъари ?
Урайнаб Г1е. гелешмеш, нушала Русиклис. Рургух1елира ца г1ях1си раргес г1яг1ниси сари.
Мях1яммад Х1ези Русланни илкьяйда тиладибарибу ?
Урайнаб Тиладибарайчи сен руусира ну ? дила Русикла урк1и ц1умбик1ули биалли, илала дигайла чирагъ пархбухъи алки биалли.
Мях1яммад Т1аш, т1аш… илди х1уни сели далулри ? ц1умбик1улил ? алкил чирагъ ? Х1ези ибу илкьяйда ?
Урайнаб Х1еиб, амма дила Русикла х1ял-т1абиг1ят нуни жагали далас. Нуни чех1ейулрав ил сен-сен хумарлил, сен-сен пикриик1улил ?
Мях1яммад Ягъари, пикруми гьарил адамла дирути сари. Х1ера, нура мурталра пикриик1улра…
Урайнаб Се? Пикриик1улра? Х1елара алкив дигайла чирагъ?
Мях1яммад Дила дигайла чирагъ гьчамалра бяшунси ах1енригу, дила къакъба. Дила дигайла чугур гьаннара буч1ули лебал.
Урайнаб Гьу, или биалли, хайрибирар. Рахли набчила х1ебиалли ил буч1уси, нуни илала гими къябудис.
Мях1яммад Агь, х1ябилра ц1акьси хьунул лерри х1у: дура, шайчи пикриухъахъесалра имкан агара.
Урайнаб Г1е, х1ушаб ихтияр галли, чини т1ашиутирая х1уша? Амма… нуша Русикличила саррая пикридухъес г1яг1нити.
Мях1яммад Юх, х1у селичи кьакьарак1илри? Хъайчикайэс замана бак1алли, илини нушази балахъа. Гьачамлис илала рурсира х1ерургар.
Урайнаб Эгьегьей, ишди муйли… Г1ур сен-сен г1ячихъли буруси х1ези пакьирли хъайчикайэс дигниличила?
Мях1яммад Дила урши пакьир ах1ен! Ил гьарли-марси гъабза сай!
Урайнаб Балулра, балулра…Чевверхи. Нушала урши пакьир ах1ен, г1ях1гъабза сай.
Мях1яммад Или рик1ен гьат1и.
Урайнаб Г1ур сен-сен буруси илини х1ези хъайчикайэс дигулра или ? Х1уни ца сек1ал х1исабх1ебаррив?
Мях1яммад Се сек1ал?
Урайнаб Гьанна, х1ебла шаладикибла иш г1яйнибси тахличи калсули сай нушала урши.
Мях1яммад Иличибли се бурес дигулри х1ед?
Урайнаб Агь, х1ябилра сек1ал х1ергъуси мурул леври кьалли? Гьанбикахъа, дубурлан жагьил дурх1ялис хъайчикайэс дигалли, гьалабла замана, г1яйни буруш абилкьусири. Илх1ели бег1ти балкьалъутири мекъличи.
Мях1яммад Г1е, рархьлири х1у, хьунул, рархьлири. Гьанбиркур набра, х1у чераибх1ели г1инизла гьалар, итала г1ергъи нура калсусири г1яйни. Гьанна илди г1ядатуни хъумкарти сари. Рахли хъулиб буц1арли биэс ?
Урайнаб Нуни балас се сабил буц1арбик1уси… Гьи-гьи-гьи.
Мях1яммад Дила сегъуналра къаршидеш агара. Рарга… белики, илала сунес ригуси рурси лерриэс ?
Урайнаб Сунес – х1****ас, амма нуни ца рурси ралас, дебали г1ях1си .
Мях1яммад Чи сари ил ?
Урайнаб Г1ях1ти ада-абала рурси сари. Дигалли мас теб, Дигалли – мулк теб. Г1ур се саби нушаб г1яг1ниси ?
Мях1яммад Нушаб г1яг1ниси ца духуси рурси сари, нуша духъна-даибх1ели урк1ец1и бареси. Илди масра мулкра нушаб г1яг1нити ах1ен. Х1язлис ах1енригу ну гъал дус бек1 бухалтерли калунси. Нушалара леб баари давла. Ягъари, ил халаси къашла бег1 т1улека чинад бак1ибси х1ед ?
Урайнаб Хъубешуна гибси саби.
Мях1яммад Чини ? Чила хъубешуна ?!
Урайнаб Бархьли буралли, илди гьачамлис хъубешуни ах1ен.
Мях1яммад Чи саби илди ?
Урайнаб Ит унра шилизибти Макахъали. Гьалавла колхозла председатель Г1ялиев Макала рурси сари наб г1ях1рилзуси.
Мях1яммад Агь, х1ябилра пайдаагар адамти баргили х1ериадли. Рурси сегъу-
на сари илдала ?
Урайнаб Бег1лара жагали сабаибси кьурчгъуна.
Мях1яммад Илгъуна риалли, селра х1ебирар…
Урайнаб Х1ебирар, х1ебирар, г1ях1ти адамти саби : дигалли бег1ти, дигалли
рурси.
Мях1яммад Рурсилис чи бик1ара ?
Урайнаб Гебякъиз.
Мях1яммад Чи бякъиз ?
Урайнаб Гебякъиз.
Мях1яммад Тамашала у х1ебиалли. Русланра, Гебякъизра – шинра ц1ара кьяйда далдикили сари.
Урайнаб Се биру ? Хала нешла у саби бик1ар илис бихьибси.
Мях1яммад Ге – бя – къиз. Вайбарес багьандан бихьибси бургар.
Урайнаб Вайбарес дурх1нас уми дирхьути ах1ен.
Мях1яммад Балулра нунира вайбарес х1едирхьни. Амма илди х1ела гъай наб г1ях1дилзули ах1ен.
Урайнаб Сегъунти гъай ?
Мях1яммад Илди Макаби пайдаагар халкь саби: дебали кьиркьирти, буцибти, мас-мулкличи рагъ-рагъти. Макала дудешра, халадудешра вачрукьяби бирутири.
Урайнаб Г1ур се биубли гьат1и ? Вачрукьяби вайти адамтив ? Гьанна илдалайчиб халаси х1урмат чила леба ?
Мях1яммад Ах1ен, илизиб ах1ен анц1букь.
Урайнаб Г1ур селизиб саби ?
Мях1яммад Макани къурушлис се-дигара исра ису, чи-дигара вирцра вирцу.
Урайнаб Нушала я бицести, я асести агара. Рурси кариах1елли, илди нушаб лявбик1ар. Итгъуна рурси уррухъахъес асух1ебирар: дигалли духуси сари, дигалли умуси сари, дигалли араси сари. Г1ур чи сари нушала уршилис г1яг1ниси ?
Мях1яммад Гьарли-марли илгъунав рурси ?
Урайнаб Г1е, дебали г1ях1си, паргъатси, духуси рурси сари.
Мях1яммад Илгъуна риалли, ну сейк1иша ?
Дуравад Руслан чарулхъан.
Урайнаб Чарухъунрив, дила мукьара ?
Мях1яммад Се мукьри сари ? хьунул риалли, мурул сай, дурх1ни биалли, ду-
деш сай.
Руслан Г1яжаирси леррикьалли х1у, неш.
Урайнаб Сен или вик1уда, дила урши ?
Рулан Гъану к1ира дус виубх1елира мукьарли кавлусирав ну ?
Урайнаб Нешлис сунела дурх1я мурталра вишт1асили кавлуси сай. Х1ечивад вишт1аси ак1айчи наб мукьарли кавлад.
Руслан Набчивад сен-сен вишт1аси алк1уси ?
Урайнаб Ишдус хъайчикалтарину, г1урдус х1ердик1ех1е сен-сен алк1анал. Х1ед гьанбиркулив, хьунул адамтаницун саби дурх1ни биркьути или ?
Руслан Ах1ен, ил сек1ал нунира балас.
Урайнаб Балули виадли, г1ях1си саби. Ишдус хъайчикалтари. Х1ед ца г1ях1си гьалмагъ раргилра нуни.
Руслан Чи сари ил ?
Урайнаб Ил г1ях1си рурси сари. Унра шилизивси Макала рурси сари.
Руслан Г1ях1си рургар, амма дила царх1ил лер…
Урайнаб Астахпируллагь, астахпируллагь ! Гьуя, дила урши, чи сари ил ?!
Мях1яммад Сен тамашариублири х1у ? Гьала-гьала ишизи хьарбаэс г1яг1ниси саби, г1ур – гъайик1ес.
Урайнаб Дила урши, чи сарил бурагу. Нушани ралусив ил ?
Руслан Г1е, ралуси сари.
Мях1яммад Ралуси риалли, г1ях1си саби.
Урайнаб Чи бик1ара илис ?
Руслан Зугьра.
Урайнаб Чи Зугьра ?
Руслан Иш нушала унра.
Урайнаб Гьуя, сари загьрули руц ! Дила урши уцес кьасбарилигу их къех1бани.
Руслан Неш, се рик1улригъари х1у ? Зугьра илгъуна ах1ен ! Иргъулрив, неш. Г1ур илкьяйда ахъили х1ералтари х1у нуни !
Урайнаб Г1ур се рирура х1ературли, ругмага ругарав ? Х1ераягу ишичи ца ! Чинад аргъибси х1ушани бег1ти кьабулх1ебикахъили дурх1нани чус гелешмешуни бургни ?
Мях1яммад Лех1яхъи гьари, рахъ зигармарик1удну.
Урайнаб Зигарх1ерик1ес рирусу ихгъуна мех1ур, абдалгяг1личи дигай дихьили виалли дила левсигъуна ца уршили ? Ихдала беркес кьац1 агара, чегьес палтар агара, убушес ч1янк1а-ч1ухъан агара, бх1яхъес кьалтин агара. Г1ярг1нала пукьагъуна юртлизиб халабаибти садакьачиби ! Гьу… чина хабара ! Х1ейги, х1ейги… Дила юртличи илини кьяш ках1ерц1у.
Руслан Зугьрачиб се г1яйиб леба бег1ти агара биалли ? Эгер илди миц1ирли биалри, диишигу илалара кьалтинтира, масанира.
Урайнаб Х1ейги, х1ейги, чина хабара, х1ейги. Илала дурабад, х1у армиялизив-х1ели чичил к1ушрик1ибалра мяг1на агара… Пях1ли руахъен !
Руслан Неш !
Мях1яммад Илди давла агарти саби, амма ил пакьирличи бугьтан чебирхьни г1ях1си ах1ен.
Урайнаб Нуни бугьтан чебирхьули ах1енра, наб илкьяйда билзули саби. Нуни раргибси жагаси, дебали духуси, умуси, хъулир т1ашх1еризурли рузуси, мал-х1ямси рурси тер.
Мях1яммад Илгъуна риалли, г1ях1си саби. Дигай дахъх1и дуути ах1ен. Илди дирихь кьяйда диц1ути сари. Г1ях1си масла рег1 хьунул риалли, х1ед г1ямрулизир кумекла рирар. Се дигай дирутив дубурлан мурул адамла ? Мурул адамличи далдикибти сек1ал ах1ен илди дигай-мигай бик1ути сек1ал.
Урайнаб Нура илкьяйда рик1улра. Се дигай дирути дубурлан гъабзала ? Их Зугьрайчир жагаси сари ит, баягъи, Гебякъиз.
Руслан Чи Гебякъиз ?
Урайнаб Х1ед уриркьуси рурси. Дудеш виадли х1у, уршилизи гъайа.
Мях1яммад Х1уни гьирбирес ну хя ах1енра. Нунира балас бареси.
Урайнаб Балули виадли, гъайик1ен… Х1ушаб чай карт1ишав ?
Мях1яммад Карт1а.
Урайнаб Гьуя, гъайкарик1ули чай дярг1яхъилра. Гьари, дуц1ардирисну.
Мях1яммад Х1ези ца сек1ал хьарбаэс дигулра. Бура бархьли, х1ед гьарли-марли г1ях1рилзулив Зугьра ?
Руслан Г1ях1рилзули сари.
Мях1яммад Набра г1ях1рилзули сари. Илала бег1ти, сари х1ябал дус риубх1ели, аврия барили алхун. Халанешли ил арикьур. Илис мас абикьес х1яйванти адилкьули сари, пенсия учибирхъули сари.
Руслан Х1****ас, х1ушаб селис г1яг1нитил масанира мулканира, иткъира халаси давла леб биалли х1ушала ?
Мях1яммад Нуша хъалладиубх1ели, буребала бех1гъуналра сек1ал лебси ах1енри. Нушала лебдеш гъал дусра-сера бурчули бучибси саби. Имц1аси сек1ал диргала х1ебулхъан. Камси биалли, илх1ели саби вайси. Х1ела кьисматличила, х1ела талих1личила нуша гьар барх1и дулгулра. Наб дигулра х1ела г1ямрула гьуни вавнали бяхъили. Аргъа ца сек1ал: дигай дирхьни дубурлан мурул адамличи балх1ебикибси саби. Х1у х1ела хьунуйс диганта виркьадли, х1ечиб адамти чебдукарбирх1ур. Нушала унра Зугьра г1ях1си сари. Их кариалра вайси ах1енри…
Урайнаб Амма нушаб илдигъунти садакьачиби г1яг1нити ах1ен.
Руслан Х1уни чинаралра чераирив ил садакьа бурчули ?
Урайнаб Жяг1ял-царах1ел аркьян.
Мях1яммад Гь, рати ц1уръа рурси.
Урайнаб Ралтас, нуша датах1елли. Пикридухъенаягу х1уша, х1ябал рурси хъаллабареси мас теб, мекъ барибх1ели гуявлис «Волга» машинара пешкеш-бирули саби. Илдала дурарад сари рурси къугъаси, имц1ати гъай агар, малх1ям-си, духуси, жагаси исбагьи сари.
Мях1яммад Г1ях1си сари нушаб г1яг1ниси. Илбагьандан, х1ела пикри бура, урши.
Урайнаб Се пикри бурусив ишини ? Макала рурси сари ишис кариръуси. Г1ур сегъуналра рурси нуни хъули х1екис.
Мях1яммад Лех1яхъи гьари, хьунул…
Лех1деш.
Руслан Х1****ас… х1уша илкьяйда дик1ули г1ергъи, х1ушаб илкьяйда дигули г1ергъи, х1ушаб дигуси барая, наб дек1ардеш агара.
Урайнаб Бирех1е. дила урши, бирех1е. Бег1лара г1ях1си бирех1е.
С у р а т к1 и э с и л
Халаси к1алг1ягъуна юрт.
Г1яйшат Агь, х1ябилра жагали дерц1или лерри ишди семечка х1уни. Зера гъудурдарили руилригу.
Гебякъиз Г1е, нуни семечка жагали дерц1ес балас. Дила юлдаш рурсили бурси-рарибсира.
Г1яйшат Х1ерагу ца, нуни ишкьяйда дерц1ес гьачамалра бажардих1ерикира: яра игули рирус, яра х1едерц1ахъили урисис.
Гебякъиз Семечка дерц1есван дила кьац1 дерц1ес бетарули ах1ен. Сен-сен балшусив кьац1ла башни ?
Г1яйшат Агь, дила рурси, ил сек1айчи г1ерх1ераилрив х1у ?
Гебякъиз Се ири, неш ?
Г1яйшат Гьаннара бурсих1ериубли лералрив ? рик1ус.
Гебякъиз Х1уни баладгу, наб башнибазир риркьес х1ейгахъни. Тукейзибад кьац1 аса – таман къуллукъ.
Г1яйшат Илкьяйда хайрибируси ах1ен, дила рурси. Х1у гьанна гъану шура дус риублири. Шери рукьес замана баили саби.
Гебякъиз Се ири ? Шери ?
Г1яйшат Г1е, шери рукьес замана баили саби. Х1у ураркьес бак1ес дигути леб.
Гебякъиз Марли рик1улрив, неш ?
Г1яйшат Мар-марли. Илбагьандан хъалиц1ализир дирути г1яг1нуби дирес бурсирии, к1унт1убира, дях1ра, нудбира, никубира дакес багьалли г1ямал бетаруси ах1ен.
Гебякъиз (Дулгъаличил мух1ли ушкули) Чи саю ил г1ях1гъабза ?
Г1яйшат Дила рурси, х1ела явлухъ лебгу. Се саби ил х1уни бируси ?
Гебякъиз Селра х1ебирар, дила ах1ену ушкуси ? Урх1ла ушкули х1ериишагу.
Г1яйшат Агь, Аллагь, сен къаршибикахъири х1уни дила бек1личи иш балагь ? Эй, ахмах, х1у илдани риркьадли, чинилра шери х1екури !
Гебякъиз Мяг1 х1ед ! Х1ебигалли, макаба. Ну иткъира х1якьяс.
Г1яйшат Гьуя, дила рурси, или марик1уд. Гьарил рурси халараибх1ели, шери аркьуси г1ядат саби.
Гебякъиз Се г1ядат ?
Г1яйшат Хъалиц1а дарес… дурх1ни баркьес. Ил сек1ал гьарил рурсили чебла саби.
Гебякъиз Ил г1ядатли, ну шери рякьунх1ели, лагьна рурцахъес ралтарав ?
Г1яйшат Ралтари, дила рурси, ралтари.
Гебякъиз Наб лагьни дебали дигахъис. Илди дила хъуц1румачи кадиили «къум – къум» дик1ар, хабуртани дугьар, дила бек1личи кадиили х1язли диркьур. Агь, х1ябилра жагати арцанти к1ер ик1ди лагьни ! Чус бигантали диркьули сари : дигалли урцули сари, дигалли х1язли диркьули сари. Набра дигахъира ц1уба лагьа ретаэс.
Г1яйшат Инша Аллагь ! Рахъх1и агарли ретарахъури х1ела нешли.
Гебякъиз Сен-сен ?
Г1яйшат Нешли рукили шагьарлизи тукейзибад бег1лара жагаси, бег1лара дурхъаси ц1уба х1ева исис х1ела мекълис. Ил чегьурх1ели, х1ечиб жагаси ц1уба лагьа чинабалра баргес х1ейрар.
Гебякъиз Марли рик1уду, неш ?
Г1яйшат Г1е, дила рурси, марли рик1ус. Х1ед нуни сек1ал ах1ерх1ебирис. Х1ела гьалмагълис Руслан бик1уси саби. Ил г1ях1си дурх1я сай. Х1ера иш суратличи х1еръа.
Гебякъиз Ишисрав ну шери редлугуси ?
Г1яйшат Г1е, дила рурси, ишис сарри.
Гебякъиз Ниъла мукьарагъунагу. Наб х1ейги.
Г1яйшат Гьуя, дила мургьила к1ич1, или рик1ес асубируси ах1ен. Дубурлан рурсили сунес гьалмагъ ургуси г1ядат лебси ах1ен. Итдала халаси юрт теб, дахъал х1яйванти тер, мазала дурзам теб. Илдала дурабад, х1ерагъари сен жагасил иш, житала дурх1ягъуна сай.
Гебякъиз Дудешли ихтияр бирули ах1ен наб житала дурх1я хъули кахъес.
Г1яйшат Нуни бирисра, дила рурси, дудешлизира бирахъис.
Гебякъиз Дудешли, лагьначил х1яз барахъес, хъалчи рукьяхъес ралтули ах1енра.
Г1яйшат Нуни ралтарину, марисуд.
Гебякъиз Дудешли, наб муриси дагъа асахъес, арц лугули ах1ен.
Г1яйшат Нешли лугас, эгер х1у кьабулрикадли Русланнис шери рукьес.
Гебякъиз Лугаду ?
Г1яйшат Лугас, х1ела нешли.
Гебякъиз Х1ебиалли, ну кьабуллира.
Г1яйшат Ма, иш нешли, вец1ал къуруш. Х1ед дигуцад дагъни аса. Сукни-кьянабас ца-х1ябал далай-деза делч1ес г1яг1нибиркур х1ед. Ну руч1ас, х1у тикраррик1ен. Дила ах1ерти бег1тас :
Г1язиз-нешлис раркьибси,
Дудешлис арикьурси
Дигулра деза барес.
Гебякъиз Дила ах1ерти бег1тас :
Г1язиз-нешлис раркьибси,
Дудешлис арикьурси
Дигулра деза барес.
Г1яйшат Арарираби х1у – неш.
Аравиаби дудеш.
Аллагьли г1ямру шадти
Дарабгу х1ушаб пешкеш.
Гебякъиз Арарираби х1у – неш.
Аравиаби дудеш.
Аллагьли г1ямру шадти
Дарабгу х1ушаб пешкеш.
Г1яйшат Бак1ибти хъубешунас :
Мях1яммадлис – дудешлис
Урайнаб – зизи нешлис
Дигулра деза барес.
Гебякъиз Бак1ибти хъубешунас :
Мях1яммадлис – дудешлис
Урайнаб – зизи нешлис
Дигулра деза барес.
Г1яйшат Маза-мас, х1яйван-къача
Дахъдааб Мях1яммадла.
Масла дег1ти хъалиц1а
Дерхъабгу Урайнабла.
Гебякъиз Маза-мас, х1яйван-къача
Дахъдааб Мях1яммадла.
Масла дег1ти хъалиц1а
Дерхъабгу Урайнабла.
Г1яйшат Умути х1улбала вег1,
Дерхъибти нудбала вег1,
Дях1 шалати Русланнис
Барес дигулра деза.
Гебякъиз Умути х1улбала вег1,
Дерхъибти нудбала вег1,
Дях1 шалати Русланнис
Барес дигулра деза.
Г1яйшат Ахъанайти ихъули
Зубрачивад вашули
Зубарти наб кайсули
Виаби х1у талих1ли.
Гебякъиз Ахъанайти ихъули
Зубрачивад вашули
Зубарти наб кайсули
Виаби х1у талих1ли.
Г1яйшат Ишбарх1и х1у ураркьес лябкьути сабину, жагали рег1рии. Па-рижла духибани кьаркьалара чахьбара, к1анара чекабяхъя.
Гебякъиз Се бяхъя ири ?
Г1яйшат К1ана чекабяхъя ира.
Гебякъиз Гьу, аргъира, чекабирхъис.
Г1яйшат Г1ях1лас къуллукъуна риркьен т1ашагарли. Неш-дудешличил уршира вак1ес хайрибирарну, илис г1ях1ризес къайгънариркьен. Урайнаблис нуни бриллиантла т1улека бедилра. Эгер рурси кариалли, урц1рира. Дила дусла х1янчи дуг1ли арх1ебукьяхъес багьандан. Х1 итдала г1ях1ти пикруми ак1если вяшрик1ен. Бег1ти г1ях1ти саби, урши виалли – мургьи: дигалли духуси, дигалли жагаси.
Гебякъиз Се ири ? Жагаси ?
Г1яйшат Г1е, жагаси. Х1ечив ил х1ябал дусла вишт1аси сай.
Гебякъиз Чум дусла ?
Г1яйшат Х1ябал.
Гебякъиз Гьуя, ил вишт1аси хъяша уилигу. Х1ейги ил наб, х1ейги.
Г1яйшат Гьари, диур дурути. Рукьенну х1ямамлизи кьаркьалара бирца, гъезра жагали хъарсдара.
Гебякъиз Дирис. Рукьишав ?
Г1яйшат Аллагь багьандан рукьен.
Мака Чина сари иш исбагьи х1ядуррируси ? Шагьарлизи мага аркулрив ?
Г1яйшат Ах1енра, ишбарх1и нушала рурси ураркьес лябкьути саби.
Мака Марли рик1уду, масхарлис ?
Г1яйшат Масхурти дирару рурси жявлил шери редес замана баили биалли ?
Ишбарх1и ляркьех1е или бурибси саби.
Мака Чихъали сабив илди ?
Г1яйшат Виригу ит унра колхозла бек1 бухгалтер Мях1яммад ?
Мака Гьа, валас, валас.
Г1яйшат Итала уршилис сари нушала Гебякъиз уриркьуси.
Мака Ит Мях1яммад дек1ар вигх1ейгахъес наб. Вахъ г1ях1и вархьси адамла г1ердиру. Илала дурабад, ил кьяркьси, чурха адамра сай. Х1****ас, х1у селичи пикририк1усирил ? Бархьли бурасли, иличил тухумдеш дарес х1ейгахъаси.
Г1яйшат Ягъари, илис ах1енгу нушани рурси лугуси, илала уршилис сари.
Мака Итгъуна адамла сегъуна урши виэс г1яг1ниси ?
Г1яйшат Бег1лара г1ях1си, къугъаси, малх1ямси…
Мака Юх, ну кьабулх1еркис ил сек1айчи.
Г1яйшат Дудеш жанивар виалра, илала урши гьинта сай.
Мака Х1уни чеибсив ил ?
Г1яйшат Х1ед чеэс г1яг1ниси виалли, х1ера иш, чеа… Ягъари. Мях1яммадла к1алг1ягъуна юрт теб, дярхъ биц1или х1яйванти тер, мазала дурзам теб, «Волга» машина теб. Итдичиб г1ях1ти адамти нушала рурсилис г1ур сукни х1якьян. Нушаб се дек1ардеша ил вархьсил, валк1сил, чурхасил, эгер нушани рурси илала уршилис риалли редлугуси ?
Мака Чум дус виубсив ил гьинта ?
Г1яйшат Гъану к1ира.
Мака Нушала рурси гъану шура риубли сари.
Г1яйшат Риаб гьат1и.
Мака Г1ях1си. Илди кьабулбикесара ?
Г1яйшат Кьабулбиркахъуси дарман леб.
Мака Сегъуна дарман ?
Г1яйшат Гьанбиркуру х1уни наб пешкешбарибси бриллиантла т1улека ?
Мака Г1е, биркур.
Г1яйшат Ил Урайнаблис пешкешбарира.
Мака Агь, ишди хьунул адамти… Нуни пешкешбарибси т1улека…
Г1яйшат Чевверхи, рурсила талих1 багбандан се х1ебиру ? Илди кьабулбикахъес урц1рира дедес чесира.
Мака Г1ях1си, неш кьабулли риэс, урши ?
Г1яйшат Урши битибси житагъуна сай.
Мака Гъамдеш бетааллири г1ях1сири.
Г1яйшат Вег1ли бетаахъалли, бетаруси саби. Х1ед гьанбиркули бургар нушала Гебякъиз гьанна бикайчи редес мер агарли хъулир калунси сари или ? Ил нуни нушачи валикибси дурх1ялис редес ратурси сари. Гебякъиз нушани Урайнабла Уршилис редлугех1е. Хъаллабиубх1ели, «Волга» машина пешкешбирех1е. Илди чула мас-хазнализибад чебсаргъибх1ейс, вишт1ал алк1ан. Вишт1аси левих1иб хъалиц1а дукьх1едулъан. Ца гьат1и дус аркьян – г1урра вишт1аси алк1ан. Илкьяйда нушала рурсила хъалиц1а детарар.
Мака Или биалри вайси ах1енри.
Г1яйшат Гьуя, се адам сайригъари х1у ? Х1ед нушала рурси талих1черсили риубли х1ейгулрив ? Пях1ли уэн дила х1улбала гьалавад ! Супелти х1янни диалра, эмх1елагъуналра г1якьлу агара.
Мака Гьу, гьу, черрерхи, дила Г1яйшат. Х1у мурталра рархьлири. Х1ед дигуси бара.
Г1яйшат Бирис г1е, сен х1ебируси ? Ну сарра иш юртла рег1.
Унзализи кьут1дирхъу.
Г1яйшат Да, да, абхьили саби, адац1ирая.
Мях1яммад Ассаламу г1ялайкум !
Мака Ваг1ялайкум ассалам ! Даширая, иша кадиирая.
Г1яйшат Гьуя, дила ах1ерти, дак1ираяв ? Х1ябилра г1ях1си барилра дак1ни. Бара гьанна сарригу нуша х1ушачила гъайдик1ули калунти. Сен кьандиубрая ?
Урайнаб Мях1яммадла бек1 изули заманаличир дак1ес бетх1еур. Иш дила рузи Г1ябидат сари. Тянишдиирая.
Г1яйшат Г1ях1си. Наб Г1яйшат бик1ар.
Мях1яммад Наб Мях1яммад бик1ар.
Г1яйшат Иш, дила мурул Мака сай.
Г1ябидат Г1ябидат.
Мака Гьари, юлдаш Мях1яммад, ваши иша кайи, ца г1ярякьила кьурт1иэх1ену.
Мях1яммад Г1е, г1ярякьили адамтала урк1бази гьуни бургу: гъай х1едалусилизи гъай далахъа, кьяшми х1едашуйзи делхъ дирахъу, т1ама агарсилизи далай буч1ахъа.
Мака Бархьси саби, уртахъ. Гьари, ахъбуца. Дерхъаб !
Мях1яммад Дерхъаб !
Мака Рурсби, х1ушаб коньякла… Х1ера, Г1яйшат…
Г1яйшат Гьу. Х1ушала арадеш багьандан, дерхъаб !
Лебилра Дерхъаб ! Дерхъаб ! Дерхъаб !
Г1яйшат Гьари, гьанна нушала, хьунрала дурути лерну, х1ушани х1ушала къайгъи барая.
Мака Сен сари х1ушала х1яйванти. Маза-мас, хъуми-унхъри ?
Мях1яммад Баркалла, юлдаш, вайт1а ах1ен. Мазара дахъдик1ули сари дусичир дус, х1яйвантира вец1алцад адикили сари. Амма, вег1ебш, к1ел къача буц1ани дергун.
Мака Агь, чула мух1луби деръ !
Мях1яммад Анхъра бухъули саби. Гьар дус халаси машина биц1или ц1едеш шагьарлизи дурхьулра. Ца г1ях1си хайри башар. Хъумачибад дек1ар ишдус халаси сек1ал х1ебак1иб – заб агарли.
Мака Г1е, ишдусгъуна дегъси дус нуни дила г1ямрулизиб чех1ебаира.
Мях1яммад Сен гьимук1илил Кьудратла Вег1 нушачи гьимук1или сай.
Мака Сай, сай. Гьари, ца гьат1и ахъбуца х1уша дак1нила х1урматлис бержес дигулрану. Дерхъаб !
Мях1яммад Дерхъаб ! Сен сари х1ела вачар-чакар, дирцути- исути ? Лебу селра хайри ?
Мака Г1е, леб. Ил сек1айзиб наб гьарбилзули саби. Х1ера, рурсилис Италиялизирад дурхъати к1идех1 мебель: стенкара, спальныйтира, Германиялизибад – холл, Чехиялизирад кухонная мебель. Цадех1 дихис, цадех1 дирцис, хайир кисала кабирхьис.
Мях1яммад Х1ебиалли, нушала Русикла к1идерх1ла к1алг1я баршес ца г1ях1ти ваях1 лерли дуили сари ?
Мака Г1е, лер. Ил шайчиб нушани усалдеш х1ебирех1е. Бег1лара дурхъати сек1ал сари лугути.
Мях1яммад Г1ях1си саби, г1ях1си. Амма, Мака юлдаш, нушалара усалдеш барес пикри агара. Уршилис нуни к1идерх1ла юртра балтулра, лерилра мазара, х1яй-вантира.Институт таманбарибх1ели ца «жигули» машинара исис.
Мака Ил асес х1ед х1яжатх1ебиркур.
Мях1яммад Сен ?
Мака Сенк1ун нуни илис сагаси «Волга» машинала умхьни лугух1ели.
Мях1яммад Г1ях1си саби, г1ях1си. Баркалла, Мака.
Мака Илди гъайлис бужех1е. Дерхъаб !
Мях1яммад Дерхъаб !
Мака Рурсби, даширая гьари, ца-ца бужех1ену.
Г1яйшат Гьанна асубирар нушабра коньякла бержес.
Мака Ах1ерти г1ях1ли, юлдашуни,х1уша дак1ни – нушаб халаси х1урмат саби. Бархьли бурасли, гьанна бикайчи нуни селизиб сабил анц1букь багьх1ебагьура. Гьанна х1уша дак1нила мурад нуни г1ячихъли иргъулра. Илбагьандан наб бержес дигулра х1ушала арадеш багьандан, х1ушала узи-урши багьандан. Дерхъаб !
Лебилра Дерхъаб ! Дерхъаб ! Дерхъаб !
Урайнаб Баркалла халаси, Мака, х1ед ит бурибси жагаси тостлис. Х1елара г1ямру дерхъаб, давла халабааб, дурх1ни хъаллабарили талих1чевсили виаби. Нуша х1шачи дак1нила сабаб х1ушанира балули дургудая – х1ушала рурси, х1ушала мургьи – Гебякъиз нушала Руслайс ураркьни. Х1ера иш халаси сумкализир ва чемоданлизир вец1дех1 палтар лер. Х1ушаб гьанмабикаб нуша къалабадик1улра или. Нуни умутли балулра х1ушани рурси лугни. Илбагьандан к1ина-х1яйна х1ерашес багьандан хибти сари ишди сек1ал. Х1ера ишди х1ябдех1 дабри.
Г1яйшат Гьуя, х1ябилра жагати лер ! Ягъари, асалра чинад асири ишди ?
Урайнаб Цадех1, ишди Италиялизирад хибти сари, к1идех1алра – Москвализи-рад.
Г1яйшат Жагати сари, валлагь.
Мака Сари, дебали жагати сари.
Урайнаб Ишди к1анби. Лер чехла, венгерла ва тигр барибти.
Г1яйшат Агь. Х1ябилра жагати лер !
Г1ябидат Венгерла чумлис асибсив, Урайнаб ?
Г1яйшат Гьанна шударш бик1ули бургар ?
Урайнаб Чина хабара, шударш ! Урегдарш бик1ули, шударшлим верх1ц1айс сасибси саби.
Г1ябидат Чинад асири ?
Урайнаб Г1яяла базарличибад.
Мака Х1ерагу ца, сен жагасил. Дебали жагаси саби.
Г1яйшат Х1ед се къуллукъа ? Нушала къайгъи нушани бирех1ену, х1ела гьлабси берки, бержили уэн.
Мях1яммад Марлира, юлдаш, селис г1яг1нитив нушаб хьунрала гъай ? Гьари, каса нушала хьунул адамтала арадеш багьандан бужех1ену. Хьунул адам агарли мурул адамра вируси ах1ен. Хьунул адам неш сари, рузи сари, рурси сари, хала неш сари, хьунул сари. Илдала хъуц1румачир сари лерилра х1янчи, г1яг1нуби, азбарларти х1яйван-къача, маза-мас, дайхъу хъуми-унхъри. Х1язлис ах1енри Чевях1си Аллагьли Адамлис Х1ява рарибси. Илис г1ямрулизир кумекла риахъес рарибсири Х1ява. Наб дигулра дила урши Русланнис х1ушала рурси кумеклари-убли ца жагати хъалиц1а дарили. Х1ушала чехьерила арадешлис бержес дигулра. Ил исбагьи раркьили, арикьурти бег1тала арадешлис бержес дигулра. Дерхъаб !
Мака Х1ушала урши Руслан багьандан дерхъаб !
Лебилра Дерхъаб ! Дерхъаб ! Дерхъаб !
Мака Вашигу, юлдаш, царх1ил хъули аркьех1ену. Ишаб хьунул адамти чус биганта биркьахъес балтех1е.
Г1яйшат Дукьеная, ах1ерти, дукьеная. Селра агара х1ушаб хьунрала гъайличи лех1ирхъес.
Урайнаб Х1ера ишди импортла костюм сари. Азир къурушлис асибти сари. Ралуси хьунуйзи тиладирик1ули даргахъибти сари.
Г1яйшат Азир къуруш рик1уду ?
Урайнаб Г1е, азир къурушлис. Германиялизир дарибти сари.
Г1яйшат Х1ябилра жагати лер. Дила мургьиличи далдикести сари.
Г1ябидат Х1ушала рурси жагаси рургар ?
Г1яйшат Г1е, жагаси сари: берх1и х1улбар, бац нудбар, духъяна ц1удар чурмар.
Урайнаб Иш х1ева урегдарш къурушлис Москвализиб асибси саби. Гьанна ишгъуна ч1янк1и чинабалра агара.
Г1ябидат Се ч1янк1и саби иш ?
Урайнаб Гьанх1ебиркур. Хъумартира.
Г1яйшат Валлагь, ишра жагаси саби. Х1ябилра къугъаси леб. Камли нуша жагьх1ели дири ишдигъунти жагати палтар.
Урайнаб Итх1ели, чина хабара ! Нушала арц дири, амма сек1ал х1ебири. Гьанна сек1ал лер, арц агара.
Г1яйшат Г1е, бархьа саби, дила Урайнаб. Гьанна базуртачир се-дигара лер, амма нушагъунти маза- мискинтала арц агара.
Урайнаб Х1ера ишди х1ебла костюм. Польшализи рякьунх1ели хибти сари. Ч1янк1ира г1ях1си саби, ибалара жагаси саби.
Г1яйшат къугъати сари, къугъати.
Г1ябидат Чумлис дикиба ?
Урайнаб Гьанх1ебиркур, к1ел дус гьалар асибтири. Ишар шелра мургьи лер. Х1ера ишди бриллиантла къушрачилти урц1ри.
Г1яйшат Х1ябилра дишт1ати лер, амма жагати сари.
Урайнаб Гьанна илдигъунти сари модализир. Чедиулрив, матовая шлифовкаличил сари ? Илди дурхъати журала сари. Иш лодка т1улека.
Г1яйшат Халаси лебкьалли.
Урайнаб Иш мургьила рахаж. Байхъу метр леб. Авц1али грамм бит1ик1уси саби. Х1ера иш бишт1аси биалра кулонра леб.
Г1яйшат Агь, х1ябилра жагаси леб !
Урайнаб Иш буркьа журала биалра «советский» сяг1ят саби. Мургьила рахажра леб сунечиб.
Г1яйшат Буркьа журала биалра ца-г1ях1си сяг1ят саби. Гьанна ишдигъунти дугра агара. Ца вец1ал дусли илала багьа к1инали-х1яйнали халабиур. Чум къурушлис асибсири ил ?
Урайнаб Итди г1ях1ти арцла авдаршлим шуц1айс асибсири някълизибад – ца дурашан хьунуйзибад.
Г1яйшат Рахажра лебрив барх ?
Урайнаб Лебри. Х1ера, чебиулрив т1икькабик1ули бузули ?
Г1яйшат Г1е, бузули саби.
Урайнаб Гьу, дила кадерхур. Х1елара шишкадара.
Г1яйшат Гьанналис чинилра адх1есибти сек1ал сари лугути. Стенка лугулра Италиялизибад хибси. Спальныйти тер. Илдира италияла сари. Холл лугулра Германиялизибад хибси. Диванра теб, к1ел креслора, журнальный столикра. Чехиялизирад кадухибти кухонный мебель лугулра. Илдала дурарад к1ел чайла, к1ел берклумала сирвиз лер. Илдазбад ца «Мадонна» саби урегдарш къурушлис асибси. Кухонный комбаин теб. Микроволновая печь теб. К1ач1а-к1уц1ул тер. Тутиярла ва ах1уг1янтала вец1алцал шанг тер. Вец1ну шура кьалтин лугулра : х1ябал бельгияла – х1ябал метр шуличи, х1ябал турцияла, шел табасаранна сари, авал чехияла сари.
Г1ябидат Х1ерагу ца, сен халаси масал !
Г1яйшат Илдала дурарад кьани биц1или ч1янк1и тер. Хрустальти тер х1ябал т1акьа диц1или,к1ел люстра тер, занавескабас х1ябц1али метрла ч1янк1и теб. Удуршес вец1ал ч1ухъан тер. Дях1ихъес вец1ал жура-журала бях1ихъанти тер.
Урайнаб Гьуй, илди сек1ал чина диршутив ?
Г1яйшат К1идерх1ла к1алг1я теб дик1ули ах1енрав ? Баршая ил. Авал импортла палас тер. К1ел гьат1и дуб –галгилизирад дарибти кровать тер. К1ел халати, к1ел дишт1ати хивла галгилизирад дарибти стол тер. Вец1ну к1ира ута тер. Илдачил дарх бронзала подсвечникуни тер, урегал диэс. Халаси самовар лугулра . Авал чайник лугулра. К1ел халати, к1ел дишт1ати т1ас лугулра. Кофейникра, кофе-молкара лугулра. Вец1ал губен, лерилра кроватуначи бурушуни, г1яналаби, губентала къупри, простыняби кадихьилра. Се бирида – ца гьат1и кьани теб жагьилтас дибг1ян-кьяш сек1ай биц1или.
Г1ябидат Маша-Аллагь, маша-Аллагь, ца г1ях1си мас саби, халаси мас саби.
Г1яйшат Жяг1ял х1ябал камерала бег1 холодильникра исулра. Даг, видео бик1ару, се бик1арал ? Илра асили саби телевизорличил барх Макани. Макани буриб : «Мекъ барибх1ели «Волгара»,- их чебаая азбарлаб,- пешкешбируси саби».
Урайнаб Г1ях1си, г1ях1си саби.
Г1яйшат Нуша алхунх1ели, иш юртра х1ушала уршилис саби калуси. Х1ед лугути урц1рира к1инайсван лугас, дила Урайнаб.
Урайнаб Г1ях1си, дила Г1яйшат, г1ях1си.
Г1яйшат Ишди костюм уршилис… Далдикесара ?
Урайнаб Далдиркур, жагали далдиркур.
Г1яйшат Ишди костюм Мях1яммадлис.
Урайнаб Х1ябилра жагати лер.
Г1яйшат Ишди венгерлара, чехлара к1анби х1ед, дила Урайнаб. Иш лодка-т1улекара х1ед.
Урайнаб Г1ях1си, г1ях1си, жагати сари.
Г1яйшат Иш т1улекара, к1анара х1ед, дила Г1ябидат.
Г1ябидат Баркалла, халаси баркалла. Дила шайчирад нунира кадирхьулра к1идарш доллар.
Г1яйшат Гьанналис някълизи ках1есибти сек1ал сари нуни илди. Илдигъунти сек1айзирад рахъ урухк1усрагу ну – рахли къалпла диэсгу или.
Г1ябидат Ах1ен. Ах1ен. Илди къалпла ах1ен. Бег1лара сагати долларти сари.
Г1яйшат Гьу, или биалли дуэс.
Урайнаб Иш «кардинал» х1ева Макас. Балбикесгу ?
Г1яйшат Х1ябилра жагаси леб. Чумлис бикиба ?
Урайнаб Ралуси хьунуйзи хахъибтири Германиялизирад гъал долларлис цали шел х1ева. Иш «Ник1алайла» к1ана х1ед, дила Г1яйшат.
Г1яйшат Баркалла, жагаси саби. Дила Аллагь, х1ябилра г1ях1си леб !
Урайнаб Иш «сороконожка» т1улекара х1ед. Балбикесгу ?
Г1яйшат Х1ябилра балбикес. Ишгъуна къугъаси сек1ал балх1ебиркув ?
Урайнаб Иш, х1ева барахъес х1ед ч1янк1ира.
Г1яйшат Гьай аман, х1ябилра бук1уси леб. Асалра чинад асири ?
Урайнаб Франциялизибад хибси саби Г1ябидатли.
Г1яйшат Сецадри ишала метр ?
Г1ябидат Х1****ас, шуц1али биэши доллар.
Г1яйшат Ца г1ях1ил дурхъаси сек1ал буили саби.
Мях1яммад Гьари, рурсби, урасая х1ушала г1ягни. Т1алабрарая х1ушала исбагьи, чераэс дигулрану.
Г1яйшат Х1ера, ах1ерси Мака, х1ела рурси карука.
Мака дураулхъан.Макара Гебякъизра лябкьян.
Мака Х1ера иш нушала исбагьи.
Урузриубли рурсили бек1 шайчи буцили г1яшбиру.
Урайнаб Гьуя, х1ела абас рат, урузрарирагу рурси.
Г1яйшат Селра х1ебирар гьала-гьала лебилра ишкьяйда урузк1ути саби.
Г1ябидат Кьац1-шин дарес баладу рурси х1уни ?
Гебякъиз Г1е.
Г1яйшат Балагъари, бала. Иличиб гьамадси се лебси ?
Мака Гебякъизли урегал дус риубх1ели итулабирхъусири дила х1ева. Бархьли бурасли, итх1ели ца х1ева бигубсири…
Урайнаб Хъяша рургигъари ил ? Бишт1атани илгъуна х1ебарили х1ебуар.
Г1яйшат Г1е, сарри. Итх1ели верх1ел-гех1ел дус риубси хъяшари иш.
Г1ябидат Чум дус риубли гьанна ?
Г1яйшат Гьари, чумригъари марлисра ? Гьа…
Мака Гъану ш…ш…ш…
Г1яйшат Цара, цара. Гъану цара дус сари иш дуслизир рируси.
Мака Г1е. г1е, сари. Гъану цара дус сари рируси.
Урайнаб Х1ерагу ца, нушала Русикичирра ца г1ях1ил ришт1аси руили сари.
Г1яйшат Сари гъари, сари. Ришт1аси сари.
Урайнаб Гьанна лебилра вачуртази бархилигу, х1уни вачар барес баладу ?
Г1яйшат Балагъари, сен х1****уси ? вачрукьябала рурси риалли иш. Вачуртира ибх1ели, шярли дашахъу ишини.
Г1ябидат Дила пикрили ишини циила вайт1а бикьули сари.
Г1яйшат Г1е, цабара вайт1а бикьес риили сари. Арбякьунси жумяг1лизиб, бек1 бирцили, азбарла палтар дях1яхъес дурарухъунх1ели, тях1агахъили, ца лих1или вайт1а бикьули сари. Гьанна тухтуртачи рикулра. Г1ях1деш-личи хьулдик1улра.
Урайнаб Х1ерагу ца, се биублил пакьирлис. Вари, дила рурси, г1ур к1ана агарли дурамарулхъад.
Гебякъиз Г1е.
Мака Гьари ахъбуца, юлдаш Мях1яммад, ца-ца бужех1ену нушала гуявла арадешлис. Дерхъаб !
Мях1яммад Дерхъаб !
Мака Гьари, рурси, зайбухъахъен х1ела пархит1ла т1ама.
Мях1яммад Илгъунара пагь лебсив ишизиб ?
Мака Лебси саби. Ишини кьалтинтира далли душути сари. Х1ера ик1 чебаа.
Урайнаб Х1ерагу, сен жагасил !
Г1яйшат Белч1ен, дила рурси, ца далай.
Гебякъиз Дила ах1ерти бег1тас :
Г1язиз-нешлис раркьибси,
Дудешлис арикьурси
Дигулра деза барес.
Арарираби х1у – неш.
Г1яйшат Баркалла, дила рурси.
Гебякъиз Аравиаби дудеш.
Мака Баркалла, дила булбул.
Гябякъиз Аллагьли г1ямру шадти
Дарабгу х1ушаб пешкеш.
Мях1яммад Х1яйт !
Урайнаб Агь, духучан! Агь, духучан !
Гебякъиз Бак1ибти хъубешунас :
Мях1яммадлис – дудешлис.
Мях1яммад Х1ела жан дат !
Гебякъиз Урайнаб – зизи нешлис
Дигулра деза барес.
Маза-мас, х1яйван-къача
Дахъдааб Мях1яммадла.
Г1яйшат Инша Аллагь !
Гебякъиз Масла дег1ти хъалиц1а
Дерхъабгу Урайнабла.
Урайнаб Амин я Аллагь !
Мях1яммад Агь, х1ела дудешлис рат ! Х1у г1ямрули релкъ !
Гебякъиз Умути х1улбала вег1,
Дерхъибти нудбала вег1,
Дях1 шалати Русланнис
Барес дигулра деза.
Г1ябидат Агь, духучан ! Агь, къуччакъ !
Гебякъиз Ахъанайти ихъули
Зубрачивад вашули
Зубарти наб кайсули
Виаби х1у талих1ли.
Урайнаб Амин я Аллагь ! Амин я Аллагь ! Баркалла, дила рурси. Жагаси т1ама леб х1ела.
Мях1яммад Нушанира х1****ули, иш гьарли-марси артистка руилигу.
Г1яйшат Саригъари, гьар барх1и далайрик1уси сари.
Мях1яммад Ихгъуна пагь Аллагьли гьар-гьарлис лугуси ах1ен.
Лех1деш.
Г1ябидат Х1яй, лизми арабаркь, жагаси т1ама буили саби ишала. Чум класс делч1унтив рурси х1уни ?
Гебякъиз Вец1ну ца.
Г1яйшат Г1е, вец1ну цара делч1унти сари. Лерилра шулабачил. Ишала арцла медаль булан леб. Мургьила – ит угъраш райкомла уршилис бедиб-сири.
Г1ябидат Г1ур белч1уди даимбарес кьасх1ебаррив ?
Гебякъиз Г1е.
Г1яйшат Сен кьасх1ебирусив ? Юридический институтла шуэсил курслизир руч1ули сари. Нушала г1ур ретаруси прокурор сари.
Г1ябидат Нушачиб юридический институт лебси ах1енгу.
Г1яйшат Аллагьла дях1ликира, лебра лебли, илар руч1ра руч1ули сари.
Мака Институт ах1енну, юридический факультет саби. Гьанна илди факультетуни чиди-дигара шагьарлизир лер. Арцла бег1ти илаб буч1ра буч1ули саби.
Г1яйшат Эй, гъабза, х1уни имц1амадирид. Нушала мургьила к1ич1 сунела г1якьлуличил, багьудлумачил карерхурси сари.
Мака Сари, сари. Ну Гебякъизличила ах1енрагу вик1уси.
Г1ябидат Шин садуха гьари, дила рурси, кьак берубли сабину.
Гебякъиз Холодильниклизирад хишив, г1инзирад ?
Г1ябидат Г1инзирад ха.
Урайнаб Гьанна шин хъулир дужех1ену, заманара арбякьи сабину, хъули чардиах1еллири г1ях1сири. Русланра сайцун сай хъулив…
Г1яйшат Гьари, т1ашдизирая. Чина къалабадик1утирая ? Х1ушаб савгъатунира лерти сари. Ишди бриллиантла урцри х1ед, Урайнаб.
Урайнаб Гьуя, т1улекара баибсиригу, урц1рира лугулрив ?
Г1яйшат Г1е. лугулра. Гьаналра х1ебикили, иш мургьила сяг1ят Руслан-нис пешкеш.
Урайнаб Гьуя, се бирусигъари илалра ? Гьу, баркалла.
Г1яйшат Х1ушабра баркалла дак1нилис.
Мака Наб селра ках1елуну ?
Г1яйшат Х1ед савгъат к1инайс бирис… хъулиб.
Урайнаб Гьу, х1уша г1ях1ил калабая. Инша Аллагь. Ца гьат1и базли мукъри-сях1батунира чараагарли дирех1е.
Мака Дирех1е Аллагьла икьайчил.
Г1яйшат Дирех1е.
Г1ябидат Х1уша г1ях1ил калабая.
Мях1яммад Г1ях1ил калабая.
Г1яйшат Х1ушара калабая.
Мака Х1улк1ули даабая.
С у р а т х1 я б э с и л
Зугьра Дигай агар мерличир
Ляркьян вара гулвавни ?
Дигай агар мерличи
Абулхъан вара берх1и ?
Перга агар вавначи
Кадиръур вара мирхъи ?
Вавни агар диркьачир
Г1яйдик1ару гежбуни ?
Абухъен шалал берх1и
Ванадиахъес урк1би
Дигай дихьиб жагьтала :
Уршбала ва рурсбала.
Маржанат ляркьян.
Маржанат Арадеш !
Зугьра Агь, х1ябилра г1ях1си барри рак1ни. Карии чудни-хинк1ала т1ем багьи.
Маржанат Иш, ца чуду саби х1ед нешли бархьибси.
Зугьра Г1яг1ниси ах1енри ил хес. Ца барх1ира кабухири…
Маржанат Рац1ли рашес х1ейгахъис наб.
Зугьра Каса чуду-хинк1 шинишабала, х1ед дигутигъунти.
Маржанат Зе камли сари.
Зугьра Рахли дигай дигьили х1ерииши ?
Маржанат Зуйси букалли, дигай дихьили дирутив ?
Зугьра Г1е, дирути сари.
Маржанат Ил сек1ал х1ебагьурра нуни.
Зугьра Се хабар-т1ама лера дунъяличир ?
Маржанат Х1ушала унра хъайчикарули сай.
Зугьра Чи унра ?
Маржанат Руслан.
Зугьра Руслан ?
Маржанат Г1е, Руслан. Дила узикьар.
Зугьра Чи ураркьили ?
Маржанат Унра шилизивси Макахъала Гебякъиз.
Зугьра Чи ?
Маржанат Ге-бя-къиз !
Зугьра Ил х1ела масхара бургар ?
Маржанат Ах1ен. Даг Урайнаб-зизи рякьи ураркьилри.
Зугьра Мубаракдирулрая. Г1ях1си гелешмеш раргилра. Давла теб, мас теб. Г1ур се г1яг1ниси ?
Маржанат Мар-марти дигай.
Зугьра Се дигай ?
Маржанат Дати дуг1ла гъай. Набчил урк1и гьаргли гъайрик1ес рируд. Бура, х1ед Руслан г1ях1илзулив ?
Зугьра Се абдулти сари х1уни дурути ? Х1ези нуни гьачамалра ирав наб Руслан г1ях1илзули сай или ?
Маржанат Набзи абхьес рируд х1ела диг1яндешлумала кьани. Диг1янти дигайла ц1а дилшмадилшахъид. Г1ур се биубли х1уша Макахъаливан давлачерти х1едиадалли ? Вег1ла талих1 багьандан ургъес г1яг1ниси саби, Зугьра !
Зугьра Сен-сен рургъусира ну ? Ну г1ерруцесси чилра агара : я узи, я рузи, я неш-дудеш…
Маржанат сен илкьяйда рик1уда ? Ну луг1илизи ках1ейсулрав ?
Зугьра Х1уни дек1ар се барес рируда ? Х1ела Г1яйшатлацад бриллиантуни агара, Макалацад арц агара, Урайнаблацад макру агара…
Маржанат Амма дила ца пикрибарибси леб.
Зугьра Се ?
Маржанат Иличила х1ези х1ебурис. Наб белгибаресси сек1ал белгибарра. Х1уни х1едалутив дила адавзила х1ял-т1абиг1ят ?
Зугьра Далути сари. Г1ях1си адам сай Мях1яммад.
Маржанат Х1ера ил г1ях1деш хьулчили буцили дузех1е. Рирхаи набчи, рузи, х1у г1еррурцути чумра адам леб. Лебилра илди вайт1а бамкьи саби Гебякъиз ураркьни багьурх1ели. Адавзила х1ял-т1абиг1ят бусуси аждагьа-лагъуна саби. Гьанна ну хъули аркьяс. Г1ях1личи хьулрик1ен, Аллагьли-зира рулген.
Зугьра Дигай лер урк1илар дунъя биц1ари.
Агара сепайда илдас азаддеш.
Игули сар урк1и дуц1арти ц1али.
Х1елуга изути рух1лис паргъаттдеш.
Ардухая чат1ни дила кьакьадеш
Дуц1арти улкнази ц1али дигахъес.
Кадухая лагьни шадти паргъатдеш
Дила изути рух1 вавнадяхъахъес.
Гьанк1лизир – х1еб сари, х1уруц1ли – яни
Дила урк1илизир зяг1ипбикибси.
Дярг1ибти рух1лизир бац1ахъа дях1и
Дуц1арти дигайла буц1арси гьигьли.
Зугьра Х1ера, гьанна дила дигайличила Маржанатлира багьур. Итини дек1ар се рируси барес, эгер Руслан кьабуликили г1ергъи ? Багьес дига-хъира се сабил Маржанатли пикрибарибси. Рахли Гебякъизлис се биалра вайси барес пикрибарили риэс ? Юх, илкьяйда асух1ебирар. Наб илдала ургала буэс х1ейги. Эгер баласлири Русланна пикри, ну ишкьяйда ц1ум-х1ерик1иши. Чевях1си Аллагь ! тилади саби, кумекбара, дишахъен дила гьарх1едизурти дигай !
Руслан лявкьян.
Зугьра Руслан ? Се… сен вак1ири ?
Руслан Хамис-аба леру хъулир ?
Зугьра Агара… Ил х1ябрачир сари.
Руслан Наб х1ечил гъайухъес дигулра.
Зугьра Гьанна х1ела се гъай дирутив набчил ?
Руслан Хьарбиуси сек1ал леб…
Зугьра Ну лех1ирхъулра. Гьанх1ебикиб. Мубаракирулри гелешмеш урар-кьниличил.
Руслан Зугьра, наб багьес дигулра… Х1у наб шери ляркьяду ?
Зугьра Се ? Шери ? Х1якьяс !
Руслан Х1у марлис рик1улрив ?
Зугьра Ах1енра, масхарлис рик1улра. Ураркьили давла-масла рег1 гелеш-мешра х1ура, гьанна набчи шери ляркьяду или вак1или валанри ? Ц1акьти дигай х1едиалли.
Руслан Зугьра, ит, наб х1йгукъира, бег1тани ураркьибси сари.
Зугьра Х1ера гбанна, бег1тани ураркьибси сари…
Руслан Г1е, бег1тани сари ит ураркьибси. Рахли х1у кьабулрикадли, нуша хъайчикадирех1е.
Зугьра Ну кьабулли ах1енра.
Руслан Зугьра !
Зугьра Г1е, ну гьанна вец1ну гех1ра дус Зугьра сарра. Руслан Аргъа ца сек1ал, х1у кьабулрикадли лерилра гьуйчи диркур.
Зугьра Х1едиркур. Х1ела бег1тас мас лебси гелешмеш сари г1яг1ниси.
Руслан Зугьра, раши набчил рарх.
Зугьра Чина ?
Руслан Чина биалра…
Зугьра Чина биалра. Х1ела бег1тани нуша, цабагьа, х1едалтара. Х1ела неш нуни жагали ралуси сари.
Руслан К1инайс неш дигалра, х1ейгалра кьабулкариркур. Дудеш – къаршили ках1елзан.
Зугьра Х1ейги, ну х1ед шери х1якьяс ! Х1ела гелешмешличил талих1ли-вии. Г1яг1нили биалли, х1ед чумра мисал леркис, сен-сен бег1тани цалис ца бигути жагьил дек1арбарибал. Лех1изи набчи, наб дигули ах1енра ц1ах-дешличил талих1 сархес. Наб дигулра адам кьяйда хъаллариэс.
Руслан Нуша дек1арх1едирура.
Зугьра Х1ези хьарх1ебиу. Буррагу х1якьяс или. Арукьен гьанна.
Руслан Зугьра, х1ед ну арякьи дигулрив ?
Зугьра Дигулра.
Руслан Х1еръа дила х1улбачи… Гьанна бура. Шери ляркьяду наб ?
Зугьра Х1якьяс. Арукьен.
Руслан Х1ебагьурра гьанна бикайчи х1у илгъуна чурха адам риъни. Х1ела михъирлаб къаркъа бургар ?
Зугьра Бургар.
Руслан Г1ях1ил кален.
Зугьра Дигайла ахътерек ахъбик1ар рух1лаб.
Зубартачи баэс бузар х1ячмазиб.
Х1ячми диалли сар дила урк1илар.
Дец1ани, дардани дагьурси азир.
Рахли кабердадри ца кьяли х1уни,
Гулвавнани бирхъи дила ахътерек.
Илх1ели луц1ира х1ед хала нуни
Дигайла вавнала, шаласи берх1и.
Хамдешли диц1ибти хъябхъя дарадли,
Буръар дец1аназиб ахътерек дила.
Илх1ели биц1ибси хумарси дардли
Баргудар бишт1аси урк1и чинала.
К1 И И Б И Л А Ц1 Б У КЬ
С у р а т ц а э с и л
Гебякъиз Рузи, х1уни балули рургуд, нуни циила вайт1а бикьни ? Тилади саби, лебилра дукарк1ух1ели набчи някъли къужбирен.
Маржанат Г1ях1си, дила юлдаш, бирех1е. Сен х1ебирусив ? Иргъулрив, Г1ябидат ?
Г1ябидат Се ?
Маржанат Жумяг1 гьалар иш г1янт1ик1а туке1зир цугрикибну наб, раши рук1ар нушачи шадир. Чайра карт1или сарира, рех1рихьиб хьаррик1ес сен-сен бирусив мекълис чуду или ? Гьар бурибси сек1айс,- «нунира балас»,- рик1и. Илх1ели г1яссириубли нунира ца абдал бурра : « Бег1лара г1ергъи, чуду берц1ибх1ели, кьялли барибси шинк1аси п1яц1а чеди кабирхьуси саби ». Их1елира балас рик1и. Баладли бара ира нунира. Иргъулрив ? Даг илини сненицун чуду барили сари. Х1****ас сегъуна барибал, амма хили ишаб леб.
Г1ябидат Х1уни сели балада ил хибни ?
Маржанат Сели балуси ? Нуша ц1икурличи дякьунх1ели, сунени иб. Гьанна нуни сегъуна дигара чуду бирулра рик1ар. Х1ердик1ех1е сегъуна кьимат кабалтал ц1икурила чуду балэс учибикибтани. Руслан чинава ?
Г1ябидат Ит къарабях1 чераибх1ели, урк1ухъи гьавухъи сай, пакьир.
Маржанат Руслайзи чех1ераахъибсирив иш ?
Г1ябидат Иш дила рузила бек1 бячес г1ях1си саби. Укили г1инизла гьала царх1ил жагаси рурси чераахъили, кьабуликахъибси сай. Ну рик1ух1ели г1янц1а, абдал сари или, набчи вирхх1еур. Нунира кьанни багьурра илизи царх1ил риъни чераахъибси. Гьанна се биру ? К1алт1а бячун – шин ардякьун.
Маржанат Юх, гьанналис я к1алт1а бячи ах1ен, я шин ардякьи.
Г1ябидат Иличибли се бурес дигулри х1ед ?
Маржанат К1инайс балад. Лех1ризи гьари, сейк1улил тамада.
Тамада Ах1ерти юлдашуни, тянишуни, узи-урши ! Ишбарх1и иш халаси, жагаси юртла вег1 Мях1яммадхъала Мях1яммадли сунела цайли цаси урши г1ямрула гьунчи уршули сай. Халаси гьунар саби бег1тала дурх1я варили, халаваахъили, белч1уди касахъили, г1ямрула гьунчи ушни. Иш-барх1и нушала Мях1яммадла ва Урайнабла шадси барх1и саби, чула Руслан, чула ах1ерси Русик сагати, жагати г1ямруличи уршни. Наб гьан-диркур Руслан ак1убх1ели дурибти къугъати гъай : жагасили, духусили, серхурсили, къайгъичевсили, халатала х1урмат бирусили, урк1и аргъибсили ак1аб ибти. Гьанна илди лерилра къиликъуни Русланнизир лер. Цацах1ели наб гьанбиркур, дила урши агарх1ели, сен Руслангъуна урши агарара или. Рахли к1идех1 г1ямру лерти диаллири дила, цадех1 г1ямру дедлугира нуни ишгъуна урши виэсли. Илбагьандан наб дигулра Русланна бег1тала Русланла ва илала ц1икурила, у х1****улра кьадин, арадешлис бержили.
Гебякъиз Вях1я х1я х1я х1я х1яй ! Вях1я х1я х1я х1я х1яй ! Вях1я х1я х1я х1я х1яй !
Тямада Абдалмага риублив иш ? се сари ? Жагьтала арадеш багьандан дерхъаб !
Лебилра Дерхъаб ! Дерхъаб ! Дерхъаб !
Тамада Гьанна гъай бедис дигулра хъа вег1лис. Мях1яммад, дура ца-х1ябал гъай.
Мях1яммад Ишбарх1и дила юртлизиб халаси шадлихъ саби, халаси бай-рам саби – нушала, левсигъуна ца урши, Руслан сагати г1ямрула гьуйчи калзули сай. Руслан нушани гушх1еахъубли, вяг1х1евярг1яхъили, сунес биганта виркьахъули халаваахъибси сай. Наб дигулра иличибад ца-г1ях1ти духути дурх1ни ак1и, илди халабаахъили ва гьанна нушани сай кьяйда г1ямрула гьуйчи бушили. Ах1ерти г1ях1ли, узи-урши, баркалла х1ушаб иша дак1нилис, нушала х1урмат барнилис. Дила юртличир х1уша мурталра дигути г1ях1лани дирудая. Х1ушаб мурталра гьаргти сари нуша-ла хъа унзурби. Къияндешлизиб биаб, мекъ-сях1батлизиб биаб, нуша лерилра цадалги, дарх диэс г1яг1нитира, сенах1енну нуша лерилра адамти узи-рузи сарра. Адамтала цаэсти бег1ти Адамра Х1явара буибти саби. Илбагьандан, къиян бак1ибх1ели, адамли адамлис кумек бирес г1яг1ниси саби. Шадлихъра, разидешра, марайра дарх дурт1ес г1яг1нити сари. Наб дигулра дила урши Русланра, илала ц1икури Гебякъизра Адамра Х1явара кьяйда бархбасунтили биубли, цалис ца бигули, разили, гьайбатли г1ямру дерк1или.
Гебякъиз Вях1я х1я х1я х1я х1яй ! Вях1я х1я х1я х1я х1яй ! Вях1я х1я х1я х1я х1яй !
Мях1яммад Рурсби, се саби х1ушани диг1яй буруси ?! Нушазира бураягу ахъли.
Г1ябидат Шайт1унтазилра рикили х1ериэс иш г1янт1ик1а ?
Урайнаб Х1****ас, сунела чури бялг1, се чебиулил дукаррях1ясси ? Гьанна тамай ц1ахдирура ишини нуша.
Г1ябидат Х1ези х1еирав камариръид или ? Гьанна карарци.
Урайнаб Нуни балусири г1янц1а риъни, амма х1ебагьурра ихгъуна риъни.
Тамадалара, Мях1яммадлара гъайличи дукаррях1ябгу, се гьанбикибара ? Русиклис се гьанбиркура ?
Г1ябидат Х1ера ит х1унт1енра ц1убра вирули мякьла кайили. Русланнизи чех1ераахъибсирив иш ?
Урайнаб Бархьли бурасли, ах1енри. Унрубала рурси сарри чераахъибси.
Г1ябидат Унрубала рурсби чебиахъули г1ергъи, х1ела унра Зугьра чера-ахъадри.
Урайнаб Гьанна чи сейк1улихьалли г1ях1деш агара.
Г1ябидат Наб гьанбиркули саби х1ела урши итичил талих1чевли х1ейрар или. Х1ердик1ех1е сен-сен булъадал Гебякъизли барибси ц1икурила чуду.
С у р а т к1 и э с и л
Тамада Лех1. Ах1ерти юлдашуни, ца минут лех1дизирая. Гьанна нушани ц1икурила лебдеш букех1е. Гьала-гьала, г1ядат х1ясибли, авруша балэс г1яг1ниси саби. Ил булъуси саби хъа рег1ли. Х1ера, Урайнаб, балэн ц1ику-рила авруша.
Урайнаб Бисмиллагьи ррох1мани ррох1им. Я Аллагь, иш авруша кьяйда мурити диаб х1ушала г1ямру, дила дурх1ни. Шадли г1ямру дерк1абая х1ушани, дила ах1ерти.
Тамада Гьанна, гьалмагъуни, цаца бужех1е жагьтала арадеш багьандан. Дерхъаб !
Лебилра Дерхъаб ! Дерхъаб ! Дерхъаб !
Тамада Гьари, ах1ерси ц1икури, чебаахъа х1ела мекъла чуду. Нушани т1ем багьурли кьимат кабалтах1е. Ц1икурила бег1тира т1алаббарая.
Маржанат Х1ера, Гебякъиз, дураса х1ела хабарла чуду.
Гебякъиз Вях1я х1я х1я х1я х1яй ! Вях1я х1я х1я х1я х1яй ! Вях1я х1я х1я х1я х1яй !
Маржанат Ишбарх1и ишичи дукелц1ила изала бак1илигу. Руслан, х1уни селрамага бедирив ишис дукарк1ахъес ?
Руслан Х1ебедира. Ну гьанна сайра иличил гьарли-марли тянишвиубси.
Макара Г1яйшатра лябкьян.
Мях1яммад Адац1ая, х1ушала рурсила чуду булъулрану.
Мака Ассаламуг1ялайкум !
Г1яйшат Г1ях1си сяг1ятлизир къаршидикаб х1ушала сях1батуни.
Урайнаб Баркалла, дила Г1яйшат. Адац1ирая. Даширая иша кадиая.
Г1ябидат Ишаб ца г1яжаибси гяг1 лебгу, х1ушани балулраяв ?
Маржанат Агара, х1ед гьанарули бургар.
Г1ябидат Наб сен-сен гьанаруси гяг1 ?
Маржанат Улкьайлизибад бак1или бургар. Гебякъиз, бак1ахъа х1ела чуду булэх1ену.
Гебякъиз Столла удиб хебну бак1ахъа.
Мях1яммад Гьари, гьари бихая набзи балъахъес. Дила уршила сагаси хъалибарглис ца-х1ябал г1ях1дев дурес дигулра.
Маржанат Х1ера иш мекъла чуду.
Мях1яммад Се саби ишала чедибси ?
Маржанат Урбеч бургар. Х1ебагьурра нуни урбечличил чудни дирни.
Урайнаб Урбеч кьалли саби, амма ишизибси вайси гяг1.
Мях1яммад Марлисра, ца г1яжаибси гяг1 леб ишаб.
Руслан Х1ушани чех1ебиулраяв се сабил чудула чедибси ? Чебиусикъира Х1еиусила дирулраяв ? Х1еръая жагали, ил – берх1ибси нерхличил барибси урбечла чуду саби.
Маржанат Се ?
Руслан Се бируси ? Урбеч саби берх1ибси нерхличил гяг1бик1уси.
Гебякъиз Вях1я х1я х1я х1я х1яй ! Вях1я х1я х1я х1я х1яй ! Вях1я х1я х1я х1я х1яй !
Мях1яммад Нажас ! Ишбарх1ила барх1и нушала гьар бурибси гъайличи дукаррирх1ули, гьанна гяг1биубси урбечла чуду хили чердукаррях1ес кьасбарили раланри ? Пях1ли ретахъи дила юртлизирад, ках1ерушили дигадли.
Мака Х1у, х1у… Сейк1улри гъари, юлдаш ? Дила рурси карушес дигул-рив ?
Мях1яммад Набчив чевдукарвирх1яхъули нуни чилра х1елтис.
Мака Х1ед дила рурси карушес дигулрив ?
Г1яйшат Гьу, кайи гьанна мерличи.
Мака Лех1, хьунул !
Мях1яммад Набчив чевдукарвирх1яхъули нуни чилра х1елтис !
Гебякъиз Вях1я х1я х1я х1я х1яй ! Вях1я х1я х1я х1я х1яй ! Вях1я х1я х1я х1я х1яй !
Руслан Лех1яхъи, х1ела мух1ли хурани берг. Се абдал сарригъари х1у ? Дурарухъен нушала юртлизирад, г1яндх1ек1или дигадли. Г1ях1ли, юлдашуни… Х1уша бикьрили кадатурли нуни магьар ихъулра. Х1ейги наб ихгъуна абдалличил г1ямру дерк1ес. Т1алакь, т1алакь, т1алакь.
Урайнаб Се барадигъари х1уни, дила урши ? Мекъла дуги хьунул гьарир-хъуси г1ядат лебсив ?
Руслан Ца чераахъили царх1ил кариръуси г1ядат чинаб лебсив ? Х1ед Г1йшатла бриллиантуни г1яг1нили диалли, аррука иш абдалну х1ечил рарх х1еркара.
Г1яйшат Агь, х1ушачи няг1на бак1. Дила рурси игъбарагаррарибгу. Х1уша Аллагьла урк1ец1илиурад духъ. Х1ушала жинс г1ебберд.
Урайнаб Мух1ли буца, эмх1е !
Мака Эмх1ни саррая лерилра х1уша.
Мях1яммад Дуравхъен юртличивад.
Мака Нушани гибти савгъатуни чардарая.
Мях1яммад Х1езирад нуни савгъатуни сах1есира.
Г1яйшат Г1яйнибси «Волга» се саби ? Урайнабличирти бриллиантуни се сари ?
Урайнаб Тамаша х1ела илди дяйри.
Г1яйшат Се? Тамаша ? Х1ушала илдигъунтилра агара, мискин язидуни.
Урайнаб Нушарав язидуни ? Ардуха х1ела ца-х1ябал г1яга.
Г1яйшат Х1ушалара дахъ жагати х1едиэс.
Урайнаб Х1едиалли, чардара.
Мака Х1едирех1е.
Г1яйшат Х1едирех1е, илди нушала рурси ц1ахрарнилис кавлути сари.
Урайнаб Х1едириду ?
Г1яйшат Х1едирис.
Урайнабли Г1яйшатла гъез дурцу. Мака урга лявкьян. Мях1яммадра Макара бирх1ур.
Г1яйшат Ва, дила Мака, х1ули хьанц1барилигу…
Мях1яммад Хъули чардирух1ели шалабик1ахъес чирагъ саби.
Макахъали дурабулхъан. Русланни Зугьра някъ буцили хъули лерку.
Руслан Неш. Дудеш. Гьанна баайчи нуни х1уша дик1уси бирира. Гьаннала г1ергъира бирис, амма иш рурси ках1ериили ну уъх1евъус ! Эгер иш кариахъес пурбан х1ебарадалли, г1ур х1ушани х1ушала Руслан чех1ейидая.
Урайнаб (Урц1рира т1улекара г1ямзила иргьули) Кьярт1илис г1яг1нидикаб сари. Се дирути ихди наб дила уршила талих1лис диргаладулхъули диалли? Чиналра армякьяд, дила урши. Х1ед дигуси бирех1е нушани.
Мях1яммад Г1е, бирех1е, дила урши. Ит арбукибси къарабях1ла гьалар ил х1урулг1ян сари. Х1уни Зугьра кьабуллил хьарбаирив ?
Руслан Зугьра, бура гьанналра, х1у наб шери ляркьяду ?
Зугьра Ляркьяс.
Урайнаб Г1е, абдалра, сукъурра, Г1янц1ара ну руилра. Ишгъуна жагаси, духуси, г1ях1си урк1ила рег1 исбагьи ратурли хъа гьалар, ит г1янц1а абдалгяг1 кирагу дила Русиклис. Чевверхи, дила урши, нешла хат1аличивад.
Руслан Неш, г1яг1нили ах1ен илкьяйда рик1ес. Ишдуги х1уни наб бег1лара дурхъаси савгъат барри дила г1ямрулизиб – наб ригуси рурси …
Дила талих1лис гьунираади.
Тамада Илбагьандан, ах1ерти юлдашуни, Русланла ва Зугьрала къугъати дигай вавалидяхъяхъес бужех1е ! Дерхъаб !
Лебилра Дерхъаб ! Дерхъаб ! Дерхъаб !
22 март 2000д.