Йяджудж бла Маджудж этерни этиб,
Зулкъарнай салгъан хунаны тешиб,
Дуния халкълагъа къаршчы турдула,
Джан, фатар демей, барын урдула,
Бир - аурууларын дуниягъа джая,
Алай бла ёлюм джасакъны джыя,
Бир да - къазауат ёртенин джагъыб
Баралла теплеб, ёлтюрюб, къагъыб.
Бу зулму алкъын талай джыл барыр,
Махди келгинчи Ибилис джарыр,
Шайтан къауумла къуанч этерле,
"Аллах" дегенни къаты эзерле,
Илму тутханла таргъа тыйылыб,
Артыкълыкъ Джерге саулай джайылыб,
Атайтмаз уммет бийлигин этер,
Дун-дуниягъа хакъ-заран джетер.
Бала атасын, анасын билмей,
Къарнаш эгечни сыйын кёлтюрмей,
Намыс-бет деген ортадан къачыб,
Бетсизлик деген ёзегин ачыб,
Аллай заманга келиб турабыз,
Шайтан джолунда, зор бла, барабыз,
Алай кёлледен "Аллах" кетмесин,
Джекге табыныу бизге джетмесин.
Джаратхан кёред зарауатлыкъны,
Ибилис этген бу къазауатны,
Ол Адам улун къорумай къоймаз,
Къуран айтхандан бир зат да таймаз,
Ахыр сермешни этген къарала,
Кёб салсала да халкъгъа джарала,
Гъаршдан урху бла сын турлукъдула,
Махшаргъа дери джокъ боллукъдула.
Махди келликди, "булутну" ача,
Сёз айтырыкъды, илмусун чача,
Зулмугъа тёзюб динин тутханнга,
"Аллах" аты бла къаршчы тургъаннга,
Къуаныр заман келликди, бузмай,
Аны сакълайыкъ, кёлюбюз азмай...
Илму чагъына бёленир алам,
Тирилир кибик эзилген Адам.