Минги тауну турушунда бир мыдахлыкъ бар,
Тёгерегин къаблагъанды гыйыланган къар,
Огъары джел сызгъыргъанды, булутну къуа,
Уакъ джангур себелейди, джанларын джуа.
Кабказ таула турадыла тюбюнден къарай,
Къачхы чегет къаралады, къыш кюнюн сакълай,
Мен да къараб олтурама, джатма тюбюнде,
Кесекле бла тутушханлай, аман кеминде.
Эй, джашауум ушагъанды бу къачхы кюннге,
Энди хазна эс бёлмейме, тюшюме, тюннге,
Джашау саркъыб кетиб бара, шоркъа баргъанлай,
Хузур – къайда, ёлюм келиб, сакълаб тургъанлай.
Эй, Аллахым, бой салгъанма сербаш къартлыкъгъа,
Сен къулунгу атыб къойма илму ачлыкъда,
Намазымы къылыр кибик санымы тире,
Тилегими къабыл айля, халымы кёре.
Балалагъа джюк болмазлай, ташыт кесими,
Серегура сёлешмезлей къатдыр эсими,
Гюнахымы аффуайля, я - Аффюбу, я - Хай,
Ахыр чакъгъа аякъ салдым, кюнюмю санай.
1980.