Изображение: источник - интернет.
/Мокшанский язык/
Тялось тя кизоть поздавсь. Инголи ламос ашезь пра лов. Паксятне учсть ляпе акша вельхтямат – пельсть эйдафтомс пряснон. Шуфттне, визнемок штада ронгснон, анасть лешень панархт и руцят. А тяни тялось кодавок аф паневи. Мартсь ни аделавома лангса, а мярьгат, бта якшама пингть кучкац моли. Нурдсь курьксты валазьста, Ванькань алашанц пильгонза аф пезондыхть ловти.
«Но! Манюня! Но! – дозоряй вожиятнень алясь. – Удат кали?» Шямоню тюсса алашась содаф киге моли саворне, прянцка аф кеподьсы. А пади и матодовсь. Совхозста куду сон сельмоньконть и удомбачк пачкоди – тнярксть ни меку-васу якаф. Тялонда азоронц нурдса усксы, сёксенда и тунда – крандазса. А кизонда Ванька, совхозонь постуфсь, арни ластя. Тяшка стадась ялга аф ванови. Сонь кизосонза лия алятне атякс ни пряснон лувсазь, пакарьхть пянаклангса эжнихть, а Ванька кемоста нинге камбразса кирди. И аф валги, мзярс сонць председательсь аф паньцы. Мярьги: «Саты, Иван Сергеевич, трудямс, пинге ни ваймамс сась». Эста пади и кадсы шабакс кизоста мянь сявомок содаф тевонц. Но совхозонь оцюнясь нинге аф кашторды, сяс мес постуфть полафтыец аш.
Оттне тушендыхть покодема ошу, а курмозьшка веленязост лядондыхть сят, кит кизосот ни. Хуш и тазанят нинге, но стадань ванома кивок аф васькафтови, кивок аф тердеви. Стака. Эрька варжака шиньберьф ластя киртте! Пара шкайсь ванозе Ванькань, урозкс войнада меле ляды иднять, макссь кеме шумбраши. Сизьгемонь ни теенза топодсь, но аф седиень сярядема, аф копорень-пильгонь шулкфтома аф содай. Тише ляди – киндивок аф ётави. Капать пряска куцись сон. Нява кодама од картт путсь! Мезенди? А кати… Арьси, цёрац сизи шятяма-бралгома, вастонь полафнема и мрдай вели. Ламоц алятне тяфтама надиямань мяльхть прясост кирдихть, но аф най лисенди лацост.
Маладсть аф оцю келунь поранять ваксс. Вов ни велесь прянц няфтезе. Варсихнень каркнамасна алашатьке стяфтозь. Синьге панихть тялоть эса и, мярьгат, эсь ётковаст абонкшнихть, мес, шта, тяфта ламос аф туй. Ванька мяндезень куфайкастонза пунятнень, крхкаста таргазе ваймонц и ашкодозе кельги сельмованфса перьфпяльть.
Кизонда тя васттне прокс ваяйхть туста сянгяря лугати. Вазнять сотсак – аф няеви потмостонза. Туйхть имошне-панкне, сайхть ошста иттне унокнень мархта. Ару велень кожфкясь, калдазса касфтф жуватань палнясь, эсь траксонь лофцонясь канды оцю параши. Ащельхть ба ламняс, ярхцсельхть топодемс, вийхть кочксельхть. Ванькань жуватадонза лама – тязовок эрьгац саты. Тракстьке нльне сонць потцесы. Рьванц кяденза ёфси аф кондястихть, суронзовок кичкоргодсть. Мезень потяма! Пяшксе ведаркаське аф кеподеви.
Стирнякс киге Шура ушедсь дояркакс покодема. А вдь инголень пинкнень тракст кядьса потцесть. Лама стакада ланганза ётась. Мзярда сембе алятнень сявозь войнас, тракторс озась. Кинди-бди сокамаль-видемаль, велесь андомаль. Да нинге фронту эряволь кши кучсемс. Сяськомада меле синь рьвяясть, и Шура меки мрдась фермав. Но и кизонь коре сон Ванькада сяда сире – 9 кизот ётксост. Одста тя аф няеви, а сиредезь эх кода маряви… Аф стак уноконза сонь аф «атяй» лемдьсазь, а «од атяй».
Вов тяфта синь и эряйхть тяни кафонест – од атясь сире бабанц мархта. Ванька ужяльдьсы, кода машты. Пиди и пара. Да и корхтай ялга кудса ули. Манюня хуш алашась и ёню, семботь шарьхкодьсы, а кялец вдь аш.
«Кода курокста, Манюня, эряфсь ётась…» – ужяльдезь азозе Ванька и шарфтозе прянц, бта фталу синь кадондыхть аф нурдонь кит, а марнек сонцень эряфть кинц. «Вай, а тя вирень шяйтанць коста сявовсь?» – сргозсь арьсематнень эзда алясь. Мельгаст, кяшендезне, пильгонь путнезне мольсь врьгаз.
Ванька варжазе нуртти путф ружиянц – вастсонза, и мезе ули виец дёрнофтозень вожиятнень. Алашась ардозь – врьгазське ардозь. Алашать сетьмотьфтсы – шяйтанцьке сетьми.
«Сак, сак маланяти, – аноклазе Ванька ружиянц, – тескафтте эстокиге коняти». Сяльде ванць-ванць оржаняста и смеказе – тя аф врьгаз колендезне панци мельгаст, а пине. Но тя та сядонга дивандафтозе алять! Врьгазтивок аш коста сявовомс тя вастса, вирсь ичкозе. А пинесь мезе тяса юкстась?
Стане и пачкодсть куду марса, шяйтанць – мельгаст. Ванька панжезень ортатнень, сувафтозе алашанц. Пинеське сувась – бта най тяса и эрясь. Оцю, сонцень понац равжа-равжа – мярьгат, афкуксонь цыганонь шяярь. Стама и лем теенза алясь макссь – Цыган. Увай жуватац сонь вестевок ашель, а мес? Да кати-мес. А тя, няк, сонць пялонза кить музе. «Тянди и улема, – мярьгсь эсь потмованза азорсь, – катк эряй, марса стада карматама ванома».
И виде, постуфсь Цыганть эзда стама цебярь лиссь – вешентть лия, аф вешеват. Тянь Ванька васенце шиста шарьхкодезе, кодак лихтезе колхозонь стадать сянгяря паксять лангс. Аньцек ювади «Цыган!» – пинесь вармакс лии и меки мрдафтсы ворьгоди жуватать лядыхнень ёткс. Постуфть тевоц ниле пильгса ялганц мархта сяда тёждяста тусь. А мес, шта, инголькиге пине ашезь сяве? Эх шава пря…
Но аф ламос кеняртькшнесь Ванька ёню пиненц лангс. Сараст кармась сязендема. Да хуш сонць эздост ярхцаль! Аф! Срафтсыне тюрьхкокс и ладясыне куцема прять инголи. Ванька тянкса тетькозе кеденц байдекса, тонафтокшезе тяфта. Аф ламода прявиясь, но салама услонц сяка ашезе када. Мзярда повсезень шабрать мацинянзон (мянь кемгафтува пря!), алясь кармась озафнема сонь кшнинь пиксс. Сайхть совхозста – пиксть кргати, лиякс аш кода. Разе панневи зиянць, конань салава тиендезе тя шяйтанць?!
– Ашель пиненьке, и тявок аф пине! – ашезь лотксе сюцемдонза Шура. – Маштфтк и маштфтк!
– Да кода истожаса? Кода кядезе кеподи… – нинге кирдсь каршезонза Ванька. А сонць ни вов мзярс аф уды, сяс мес сотнеф пинесь ве-вешка то суви, то печкф жуватакс ювади – воляшис тяфта пря анай. Аф эстеест, аф шабратненди – киндивок удомс аф максы.
«Пади тонады», – петнезе эсь мяленц Ванька, кунцемок шабранзон кяжи сельмованфснон.
Цыганць тонадсь. Кармась кудса сяда сетьмоста прянц вятема, но ушедсь охотас стадань ваномста якама. Повась фкя уча – Ванька аралазе пиненц, кле, эрьгодсь учась, врьгазсь сязендезе. А кда ни омбоцеть, колмоцеть веляфтозе, ласьксь алять седис. Салайсь кодавок аф тонафтови – хуш кеденц ваткак. Кода и врьгазсь. Кода тят анда, сяка вири ваны.
«А пади и Цыгантьке вероц врьгазонне? – сась Ванькань пряс мяль, – сяс и колай-салай, сяс и кода тят анда, аф топафтови».
«Тячи мольхтяма пангс, Цыган», – азозе весть пинети алясь и кильдезе крандазс алашанц. А кептернять вастс путсь тоза узерь и кайме. Цыганць вхонзась инголи, а Манюнясь мольсь мельганза. Пинесь тонадсь ни и шарьхкодезе, кда азорсь аф ластя, виде киге ласькома, совхозть шири аф пувордама. Ванька ваймама шистонза, мзярда полафнезе постуф ялгац, кармась Цыганть вири сяда сиденяста сявондемонза. Пади ляды эздонза, эрьгоди, грефска сувамс аф сави. Но разе тя шяйтанць юмай?
Пинесь лоткась вирть малас и учсь, мзярда молембачк уды Манюнясь пачфтьсы крандазть и азорсь комоти потмостонза.
– Эрь, Цыган, тонга ваймак, – мярьгсь Ванька и, сявомок кядезонза узерь, озась сери пичеть алу. Пинесь, мезеньге кальдяв ашезь уче и велясь азоронц ваксс. Яфиесь кафта пяли пулонц эса и весяласта ванондсь азоронц лангс. Шобдавань расась кенерсь ни коськомс. Шинь сюролдатне эцесть салмоксу тараттнень пачк и котькофтезь Ванькань шамац.
Алясь кеподезе прянц – менельге уйсть тёждя акша коволхт. Ванька нежедезе копорец шуфтти и кармась ванонома мельгаст. Синь бта парьхциень шуваняня сюреста кодафт. Вага уи корабля, парусонц вармась фасы. А мельганза алаша. Аф ни Манюнянц лаца, менельсоннесь сери пильге, кувака шяярь, акша – тяфтапнень телевизорса няфнесазь. А тя кие? Пиненди шарфни. Пиленза стядот, оцю пря – врас Цыганць, аньцек аф равжа.
Ванька фкя кядьса фатязе пинеть пиледа, лкнафтозе, а омбоцеса ни узерсь аноколь. Тона мянць, нолазе ктморяй кядть и шаштсь сяда маланяти. Ванькань сдиец цють изь сязев пачку. Стясь – пинесь мельганза. Озась лия васту – Цыганць ландясь пильгонзон ваксс.
«Тяни кода тя шяйтанть ваймоц сявома? – эрьхнесь молаткакс прязонза мяльсь. – А вдь сявома… Монць вятине, эстине и явфтома эздон». И Ванька шарьхкодезе: кда аф тя минутать, то эста мзярдовок аф. Кеподезе кяденц и тескафтозе узерь шовоньца Цыганть коняс. Весть, кафксть. Пинесь велясь и лпакодсь.
«Простямак, Цыган, но лиякс аш кода мархтот», – тяряфтсь араламс прянц алясь. Шувсь лотка, шаштозе тоза пинеть и ёрдась лангозонза кафта-колма кайме мода. Тукшесь ни, но вешсь пичень тарад и вельхтязе пинень калмоть.
«Но! Манюня! Но!» Алашать куду Ванька ласькфтезе стане, бта мельгаст панцть врьгаст. Шура шарьхкодезе, мезень тевста мирдец мрдась, и валга ашезь пшкяде. «Ётай ши-кафта, сетьми седисонза толсь», – азозе эсь потмованза бабась.
Сон фалу тяфта таколдсь жувататнень инкса. Весть кода-бди тракссна ашезь вазыяв. Урадсь траксське и вазняське. Пяк пичедсь инксост Ванька, нльне сельмонзовок аф фкя ши начктольхть. Траксть инкса кода аф ризнат, сон вдь велеряйти и симдиня, и андыня. А колай пинеть инкса мезенди пряцень сярятьфнемс? Хуш тя и стане, но Шура лац содазе мирденц тяфтама обуцянц и кой-коста кельгозь рахсекшнесь лангсонза, мзярда Ванька авардсь кинонь ваномста.
– Дураконя, – корхнесь теенза эста Шура, – тя вдь аф афкуксонь эряф, а арьсеф!
– Катк арьсеф, но ломаттне сяка ужяльхть, – вов и сембе отвецоц.
Ётась ни неделя, кода Ванька пиненц вири калмазе.
– Тяни мон пинень шавиян, Шура, – азозе рьванцты кода-бди алясь.
– Да кодама шавият? – вярьгянь вайгяльхть ювадсь бабац. – Муть кинь инкса пряцень апрякамс! Тя аф пине, а шяйтан! Сюронза аньцек ашесть сатне! – И поладозе: – Коза ускить, тоса и вастоц! Саты! Архт ваймак.
Тракссь потяф, жувататне антфт. Шопотькшни. Ванька лакафтсь тишень чай, каязе кружкати и маладсь вальмяти. Ванды кильдьсы крандазс алашанц и арды лавкав, пади, панжада кармай. Рамай кафтошка ящек лимонад, ламбама «атёкшт», эрь кодама конфетат – ня шитнень унокне каникулас сайхть. Яфодезе вальмянь занавескать и лофташкодсь.
– Шура, ватта, тя кодама жувата ортаньконь инголи велясь?» – тердезе Ванька рьванц.
Шура варжакстсь вальмава и сетьмоста азозе:
– Афли тя… афли тя Цыганце, Ванька?
Алясь кадозе чаенц и ласькозь ушу. И виде сон. «Да кода тяфта? – дивандазевсь азорсь, – мон вдь монць, эсь кятть, маштфтыне ёжензон и калмайне вири? А сон эреклась и сась».
Ванька кеподезе пинеть прянц и, абондозь и сияк кенярдезь, мярьгсь:
– Сяка мрдать, шяйтан!
А пинесь комафтозе узерьса тапаф конянц и, кода най тиендсь, нолазе азоронц кяденц. А тоса нолдазе ваймонц. Врьгазонь версь, родфтома-плямафтома цыганць, колай-салай шяйтанць кулома сась куду.