ДЮЗ АЛАУБ
Хайрар ишри, Гьюлягьмад!
Магомед Гасановдин Пирмягьямад халуйикан вуйи макьалайиъ гьамци дибик1на:
… Он (Пирмагомед Касимов), …перевел на табасаранский язык … двухчасового видео-художественного фильма «Иса»...
Му, «Магомед Гасанов» к1урар, йиз хиялиан, гьадму историк вушул, гьамцдар статьяр жвери-жвериди кашулдиячв газтик, гъит ишри, хъа вуйиш… къуриди ву сарун, кьяш кадиси дик1уз гъудубгънийиш дугъу, мас адайи, хъуркьувалар ишричаз!
Хъа вушра улхуб жарабдикан вуйиз, «Магомед Гасанов» жара кас вуш ясана фуж вушра, гьадгъаз кайиб вуйиз. Тарихариъ сифте табасаран ч1алназ полнометражный художественный фильм илт1ибк1ур Пирмягьямад халу дар. Думу касди думу кинойик авторихьан вуйи гафарт1ан озвучиват ап1урадар. Дурари гьаз, текст илт1ибк1ур Пирмягьямад Касимов ву к1ураш гъавриъ адарза.
Пирмягьямад халуйин хъуркьувал гьаддиъ аки, думу кино озвучивать ап1руган дугъу гизаф жафа гъизигну, сифте чав гъавриъ ахъну, хъа имбуну иштракчйиризра гъавриъ хьуз кюмек ап1ури гъахьну. Гьадму текстналантина дугъу ихь ч1алниинди вуйи йиц1уб-йиц1икьюб передачара радиойиз гьязур гъап1ну. Думу кинойик гьарсар ихь бажаранлу поэтар-писателари чпин пай кивну ва наслариан-наслариз гъубзруси, чпин ч1иви сесер ихь арайиъ гъитну. Мут1ан аьхю девлет: жвуваз ккуни инсанарин, табасаран заан к1улариз адап1ури гъахьи касарин сес ебхьубт1ан артухъ ширинвал айин? Гьаддиз, кинойин сценарий илт1ибк1ур, жара кас ву. Думу касди, специально гьадму кинойиин лихузди Москвайиъ актерский курсарра ккудук1ну ва хъуркьувалиинди табасаран ч1алнан звуковой режиссердира гъилихну. Думу кас фуж вуш учвуз аьгъюди ккунду.
Ари гьаму кагъаз, Гюлягьмад (учвуз, жигьилариз, мицдар тарихи гьядисйирикан аьгъдарчвуз), гьадму «Магомед Гасанов» фуж вуш, гьадгъахьна хътап1уб увкан т1алаб ап1ураза. Гъит чаз аьгъдрубдикан сац1иб аьгъю ибшри ва чан гъалат1 дюз алап1ри.