ФИЦИБ ЧЧВУР ИЛИВУЗА МУ ИХТЛАТНИИН?
Сабпи к1ул.
Авгъустди ав к1ура. Хярариз удуч1вуз шулу.
Сивин т1умт1ар ут1уснайи гъварзарихъ ккилигура чпи дисру т1убариз.
Манишназ ккилигура уьру гьибар инсандин, ушвнихъна чпи гъахайиз вуйи гегьнан.
Швярх-швярх, швярх-швярх – уршвура машар! Гагь-гагьнак илжвни илдандихь мурзра гьап1ра. Ац1абхура к1ан урус дейрси! Дабхьра рюгьел пирсна кьиничч дарпиди! Ругъаригъянтинара гъюдубч1вура шттиук1гъянси, я кьал, я зюрд дарпиди.
Ич1игна Ляхла бай, му гафарин эйси, хиц1си хяран к1ваъ, учвубхури чрушин, хьуб вазлин манишин!
Гъидритарза к1урубси саб мурц1, ккадап1урадар дийибгънайи гьич саб ц1аб!
Тямягькар дарин фукьан учв!
Цаххххххх! Ац1аху дейрас фтиан вуш! Тямягькрин маш, ярабин, сарун фу пузачвуз! Кьюкь гъабхьи, к1ару, т1урфниз ккирибшурайи, сфат! Куч1вубкь! Чич1!! Увуз!!!
Ав, гьамцдарган, вуйишт1ан, маш илт1ибк1уйи сфатназ! Агъдайзуз мидкан кьандириз!
Дук1 гьич! Гъядабхьрубси дайи чямяхи гъяаьбхьнийиш!
Фужк1ара хьтайи сану. Хьайи къакъ’вйирра – аяванавууур!!!
Мугъан сфат гъябкъюдар, чагъивалин гъагъишнаан, пр-пр-прррр, бомбардировщикарси – ялллаааагь! Гъит1ирху! Баркавнар!
Улч1вмарикк ккуч1внайи мугъан уларра гъушу гъушарихъди! Гьац1аз душну, хътрукьган, кьяляхъра гъахи чпин писпсаригъна миди! Ва… Вааааа!!!
Ут1убснайи лизи гъван! Дейрсин жан гъадабгъу душман!!
Кьюбпи к;ул
«Душман» гъит1ибгъюрдайи ук1аригъян. Ц1абарин канч1арикк ккайи учв. Паччагьдиз мик1 ккап1уз алаънайи швушварси чаин к1ажар т1урччвуз гъитрайи уртим али ятли!
Ятул, гъапида, зарал-зиян кайи къицибкъайиз! Чру уртимра улубк1на гьа баккаси, баркавни, учв дейрсиз аьгъю даршуз! Гиди-гаву, убч1вну, цалиъ убжуз ужуб!! Тевертишдин мурзнахь гьаз гьабхъундарвахъа уву душман!? Диди увкан, къицибкъай, ужуб мурччван гъван ктап1идийи, дарамат ап1рубсиб уткан!
Хъа сарун яв язухъу, чямяхи гъядадабхьрайи сфатнахьан! Гутйир ккив гъюнарикк!
– Уртим ккайиз!
– Сфатназ яв уртим фу ву! Сил кч1ябгъюз ац1найи кьюкьяз!
– Хъа узу жилиз зибгидиза!
– Дейрсин к1ак1 ккубччвну, хъахъну яв йирфарихъ, гатди кьюлси адабгъидиву!
– Хъа узу хки хьивдиза!
– Хуки дардина, раббивере, увуз куш бишируг йибхь!
– Хъа гъабшиш гъап1ди, маш к1ару дап1найибди?
– Улубзну шид кьуриш ап1идивукан ва дубхну цалигъ гъябт1дива, ма увуз душман, ап1ури, яв йишв гьамшвягъ ву, дупну!
– Хъа цалигъ гъяш гьап1рухъа?
– Ахмакъ! Увустар гъванарин к;анакк ккабхъну, дурарин вари гъагъ яв гъюнариин ужу шулин, хъц1уц1убхди адмийирин агьна-суза, ху йирин аьмпарна гатарин мяаьр, даршиш, улубк1ну ужуб чру бакка, шушваригъ уьру гьибар ккайи паччагьси деънайир марцци гьавайихь, хъпехъури жакьварин мукьмарихъ?
– Къарагюну!!!
– Ари йибк1 увуз! Дарап1ийва душманвал!
– Душманвал? Узу душманвал гъап1нийинхъа!? Тахсир алап1уз ужур гъидихъчвуз!!
– Адми тахсир шлуб дар. Дугъу, учв хьайиз, фуж вушра тахсир ап1ур!
– Маар адру узура?
– Маар айир фици тахсир шул, адрур миди!?
– Язухъийи йиз, язухъийи йиз!
Язухъу сарун му гъвандин! Рягъ-рягъ ап1уру к1ару сфатну!
Вай-ва, узу дидкан, йиз дергес гьабшубдикан карк ктатидиза!
Алахъунза, ягъадаш, уч1вру маш, ап1идиза к1ури му гъван битмиш, исина, фу лигурва, ттугъар айи биц1и к1ажаригъ, уьру гьибарстар сивин т1умт1арин каввар гъя! Гъван вуйибси хъит1ик1на! Йиз уч1вру маш, хъюбгъю хьуз дигиш! Уччвуйи гъюн гъивунза му дюзи гюнейик ва кьюбиб т1убарихьди, гьарсаб карказди ап1ури уч назукди хъюгъюнза ит1уз. Ярабин, женнетдиъ адар мициб нуш! Хуш гъабхи жандин гьава!
Машнаъ айи кьюкьнакан ригъ гъабши!
Гъабши йигъра лавлан, агури гъварзар чру к1ажар хъайи, уьру гьибар ккайи.
Вуйишт1ан, ккилигуради дурар, чпи дисру т1убариз! Ккилигуради манишназ инсандин, ушвнихъна гъахайиз вуйи герендиъкьан!
Герен дарин уьмрин т1яаьм?!
Т1яаьм туврайиб дарин герен?!