Аралай, лай,
Лай, лай, лай, лай
Олтуругъуз табыракъ
Манга тынгылай!
Бир оюн ийнарчыкъ
Сизге айтайым
Сизден бир махтаучукъ
Жырлап алайым!
Жартысы кемчиди
Жартысы армау!
Жартысы кертиди
Жартысы алдау!
Аралай-лай,
Лай лай, лай, лай
Айтыб а башлайма
Ойнай, сандырай!
Суратха тюшген эдим
Эшекге минип
Юйюме ийген эдим
Почтагъа кирип
Бийчеме жазама
Жангылмагъын сен
Тюбюнде эшекди.
Башындама мен!
Аралай-лай
Лай, лай, лай, лай
Жашауум барады
Мени ма былай!
Сюдюге барама
Жиляп, тарыгъып
Судьягъа айтама
Бурунум салынып
Бийчемден айырчы
Солуюм къоюп
Этими ашайды
Терими союп!
Тырманы чарлайды
Кече- кюн деп жокъ
Аузу от чагъады
Кёзлеринде- окъ!
Сыфаты, хали да
Бек аман осал!
Манга ийнанмай эсенг
Барда кесинг ал!
Аралай, лай
Лай лай, лай, лай.
Жиляп тарыгъама
Жюрегим талай!
Бир кредит алгъан эдим
Жалнамы салып
Палахха къалгън эдим
Таякъча сазып!
Проценти ёседи
Такъйкъа сайын
Мени ёлтюреди
Болмайын сабыр!
Жалнамы ашайды
Къарыным болмай токъ
Жанымы алады
Ахыры уа жокъ!
Аралай лай
Лай, лай, лай, лай
Жашауум барады
Мени ма былай!
Келечи ийген эдим
Бир къызны сюйюп
Бек къара кийген эдим
Ачыудан кюйюп
Келечим мени таба
Басмайын къалды
Сюйген къызымы уа
Кесине алды.
Аралай лай
Лай лай, лай, лай
Ма былай жашайма
Жашаугъа къарай!
Тюкенде турама
Сейирден ёлюп
Тюненеги багъала
Бюгюнге ёсюп
Тюкенчиге айтама
Мен болама сер!
Бир ётмек аллыкъ эдим.
Тюненегин бер!
Аралай, лай!
Лай, лай, лай,лай
Энди уа сау къалыгъыз
Жол да мамукълай!