АКАФИСТ преподобному старцу АМВРОСИЮ БАЛАБАНОВСКОМУ(ИВАНОВУ)(для келейного чтения)
Тропарь, глас 5
Сокровенного подвига подвижниче / и последних времен чудотворче,/
преподобне отче Амвросие/, во дни гонений и скорби тайный женский монастырь собрал еси; / под покровом молитв Богородицы/ совершаяй монашеские постриги,/подаваяй верным утверждение,/ адамантову крепость имел еси и велие дерзновение ко Господу./ Не забываяй и ныне чада твоя пред престолом Вседержителя, / спасай нас молитвами своими, отче Амвросие,// Оптинская похвало и вселенский светильниче.
Кондак, глас 2
Амвросия второго восхвалим,/ яко всемирного светильника и Оптинского подвижника,/ стезею святых старцев удобно возшедшаго во Иерусалим Горний./ О мосте светловидный,/ соединивый век минувший и нынешний,/ тебе хвалим, богоносне отче Амвросие,/ да молитвами твоими подаст нам Господь грехов оставление,// мир и велию милость.
Кондак 1
Избранный на служение Истинному Богу и к лику святых сопричтенный, преподобне и богоносне отче наш Амвросие, воспевающе труды и подвиги твоя , на ниве Божией совершенныя, величающе прославльшаго тя Господа, похвальная восписуем ти, недостойнии; ты же, яко имеяй велие дерзновение ко Господу, от всяких нас бед свободи, да зовем ти:
Радуйся преподобне и богоносне отче наш Амвросие, кротости стяжателю, скорбящих утешителю.
Икос 1
Ангельского жития изрядный подражателю, отче Амвросие, един во утешение и радование родителем оставлен быв, млад леты, но не разумом, скорбную матерь свою после смерти отца вразумил еси благочестивым пожеланием жизни иноческия. И внимающи ти, мати твоя во обитель женскую вступи. Ты же вслед братьев ея направился еси во обитель Введенскую, не свою волю, но Божию исполняя, усты преподобного Амвросия Оптинскаго прореченную. Мы же, зряще сие дивное промышление Божие, благодарно взываем ти:
Радуйся, отрасле духовная рода благочестиваго; радуйся, лозо Христова, в младенчестве богоизбранная. Радуйся, достойный подражатель старцу тебе благословившему; радуйся усердие и разсуждение на пути духовном скоро стяжавый. Радуйся, с одушевлением подъявый благое иго Христово и с благодарением его во всю жизнь пронесый; радуйся упованию на Бога учивый и выю пред Ним смиренно склонивый.
Радуйся, преподобне и богоносне отче наш, Амвросие, кротости стяжателю, скорбящих утешителю.
Кондак 2
От руки преподобного Амвросия драгоценный дар Господень – сладкогласие получив, неустанно прославлял еси в молитвах величие Божие, первее певец, послежде и начальник хора быв, науку духовную сердечно постигая и вопия Богу: Аллилуия.
Икос 2
Благочестию с детства материю наученный и в послушание старцем отданный, возрастая в меру возраста духовнаго, день от дне, яко мед и млеко, вкушал еси наставления преподобных отец и всем сердцем возлюбил еси колыбель свою Оптинскую, Духом Божиим осиянную. Сего ради взываем ти сице:
Радуйся, избравый тесный путь благочестивых; радуйся, отвращавыйся дел пагубных и душевредных. Радуйся, целомудрие, яко цвет благоуханный, сохранивый; радуйся не осуждати, но миловати ближних желавый. Радуйся, по слову Евангелия, вся обидчикам прощавый; радуйся, мудрость змиину и простоту голубиную сочетавый.
Радуйся, преподобне и богоносне отче наш Амвросие, кротости стяжателю, скорбящих утешетелю.
Кондак 3
Слушая рассказы матери твоея Наталии о паломничестве ея ко Гробу Господню, возгорелся еси сердцем и желанием работати Господеви. Усердно проходя многотрудная послушания в обители иночестей, удобно восходил еси во Иерусалим Небесный и едино благое желание имел еси, восприяти образ ангельский и воспети благодеющему Богу: Аллилуия.
Икос 3
Душу свою уготовляя горе, призывая в молитвах Царицу Небесную, в день образа Ея чтимаго Феодороровскаго и в празднование памяти преподобного Венедикта готовился еси, еще отрок сый, отбыти во обитель Введенскую. И начат тамо служение свое во славу Божию; егда же седмь лет истече, молитвами преподобнаго призван бысть на ино место подвига во обитель Боровскую. Мы же, дивящеся таковому о тебе Божию произволению, со умилением зовем ти:
Радуйся, яко храмину души своея уподобил еси нетленным чертогом царским Предвечнаго Жениха; радуйся, Царицею Небесною во обитель Введенскую призванный, преподобным же Венедиктом на место иного служения благословленный. Радуйся, заветы старчества на новем месте сохранивый и преумноживый; радуйся, ко славе обители сея благолепное пение в ней устроивый и многия вне пределов ея молитвенно петь научивый. Радуйся, любовь прихожан стяжавый, детям же нотную грамоту и богодухновенныя истины преподавый; радуся, за сие старание молитвами преподобного Пафнутия в ангельский чин облеченный и во иерея поставленный. Радуйся преподобне и богоносне отче наш Амвросие, кротости стяжателю, скорбящих утешетелю.
Кондак 4
Все упование наше по Господе и Богородице ты еси, преподобне Амвросие, вкусивый от чаши скорби народныя, истязаниям за веру преданный, крест гонений и скорби понесый, в страданиих радостно вопиявый Господеви: Аллилуия.
Икос 4
Вслед за Христом рекий: прискорбна есть душа моя до смерти, - преподобне отче Амвросие, гонения и ссылку претерпев, яко адамант укрепился еси и яко злато в горниле очистился еси. Мы же, воспоминающе страдания подвиги твоя, в заключении понесенныя, воспеваем ти сице:
Радуйся, великомучеником Георгием в храм его призванный, яко знаменовася единство победоносное за имя Христово пострадавших; радуйся, в страданиих своих смирения и терпения исполненный. Радуйся, по примеру страстотерпцев взор свой горе устремивый; радуйся, подобне богоносным отцем в сердце своем сохранивый едино сладчайшее имя Иисусово. Радуся, яко тем преодолевал еси вся наветы вражия, от богоборцев находящия; радуйся изъязвления ради плоти твоея награжденный от Господа даром исцеления недугов и скорбей. Радуйся, преподобне и богоносне отче наш Амвросие, кротости стяжателю, скорбящих утешетелю.
Кондак 5
По слову апостола, всем быв вся, привлекл еси к себе, отче Амвросие, труждающихся и обремененных. От любви Божией истаевая и всем сердцем сострадая малым сим, под крыло свое, яко кокош, собрал еси, старче, скорбныя, недужныя и Царствия Небесного взыскующия и воспел еси с ними единем сердцем и едиными усты победную песнь Богу: Аллилуия.
Икос 5
Слыша еженощныя слезныя молитвы твоя о мире, во зле лежащем, о бедных и сирых, тобою пригреваемых, Всемилостивая Всемогущая Владычица посети место твоего служения и , воле Сына Своего следующи, прорече о устроении обители на месте сем. Сему посещению дивящеся и на обетование Ея уповающе, прославим тя, отче Амвросие, яко многомилостиваго заступника нашего: Радуйся, день и нощь молитвенно Богородицу призывавый и обетования от Нея исполненный; радуйся, на месте своего служения тайный женский монастырь собравый. Радуйся, тишино и отрадо к тебе прибегающих; радуйся, вместе с помощницею твоею богодухновенною старицею Серафимою многия погибели исхитивый и в ангельский образ облекий. Радуйся, яко в память чудеснаго посещения Богородицы образ Всечестныя Игумении осени храм сей; радуйся, по смирению никомуже открываяй высоты и тайны твоего служения и силы покрова Богоматере. Радуйся, преподобне и богоносне отче наш Амвросие, кротости стяжателю, скорящих утешетелю.
Кондак 6
От Самаго Господа прославлен был еси, преподобне отче, егда во время каждения твоего по храму блаженная Еликонида, узревши тя светом Божественным осияннаго и белаго голубя на тебе почивающа, хотяше возопити, изумевающи в сердце своем. Ты же заградил еси уста ея, в смирении поя Богу: Аллилуия.
Икос 6
Подражатель преподобным отцем , души свои за овца полагавшим, милостивый отче Амвросие, в храме Преображения во олтари, яко во огни, стояй у Престола Божия, ничесоже хотяше разве Сладчайшаго, во умилениии тишине сердечней предая себе и чада в руце Его. Сие богоподобное смирение зря, Господь послаше тебе Духа Своего в виде голубине. Мы же, сие воспоминающе, со умилением похвальная восписуем ти сице:
Радуйся, кротости от Самаго Господа наученный; радуйся, вожделевый небесных благ паче всех лестных земных. Радуйся, сонаследник Царства Небеснаго еще на земли сподобивыйся быти; радуйся, земный Ангеле и небесный человече, христоподражательным подвигом твоим ленивых подвигнувый. Радуйся, яко тобою сладостей духовных испоняемся; радуйся, доброзрачное света евангельскаго всесветлое сияние. Радуйся, преподобне и богоносне отче наш Амвросие, кротости стяжателю, скорбящих утешителю.
Кондак 7
Соблюдай заповеди Моя, той любяй Мя, - согласно реченному Спасителем жизнь свою устроил еси и других тому же учил еси. Воспоминающе милости твоя к нам, немощным, прославляем великое твое сострадание к малым сим и в радости вопием Богу: Аллилуия.
Икос 7
Старцу Александру, в затворе сущу, с небес о тебе глас бысть, яко об истинном делателе заповедей Божиих, в единстве с соборным разумом Церкве Святыя Православныя пребывающем. Мы же воспоминаем сие дивное о тебе Божие речение и сего ради приносим ти похвалы сия:
Радуйся, последний старче, благоухание Оптины до наших дней донесый;
Радуйся, яко, по слову Спасителя, последнии нарекутся первии во Царствии Небеснем. Радуйся, Церкве Христовы похвало и чистоты православия цвете непорочный; радуйся, неустанный совершителю тайны Безкровныя Жертвы, святыя Евхаристии. Радуйся, совершенный исполнителю догматов седми Вселенских Соборов; радуйся, преподавый подкрепление веры всем истинным православным христианом. Радуйся, преподобне и богоносне отче наш Амвросие, кротости стяжателю, скорбящих утешителю.
Кондак 8
Ангельские силы удивишася, како по молитве твоей болящии исцеляются, беснии очищаются, немощнии в вере укрепляются и разумом просвещаются. Якоже при житии, тако и по смерти твоей молитвами твоими приемлем облегчение в скорбех и болезней исцеление. Сия зряще, поем с тобою благодеющему Богу: Аллилуия.
Икос 8
Витийствуяй всяк язык недоумеет благохвалити тя по достоянию, изумлевает же ум и премирный пети тя, обаче приими любовь нашу, милостиве и достохвальне отче Амвросие, ты бо верный ходатай и предстатель еси за христианы, тебе зовущия: Радуйся, от юности твоея премудрости Божия исполненный и любовию к Богу и ближним уязвленный; радуйся, к тебе бо шествоваху Предтеча Господень, преподобный Серафим и святитель Божий, Богу ведомый. Радуйся, яко о тебе радуются земнии и небеснии, демони же трепещут; радуйся таин Божиих богодухновенное ведение стяжавый. Радуйся, сонаследниче священномученика Киприана, в день памяти его ко Господу возшедый; радуйся, свете златозарный и непорочный. Радуйся, преподобне и богоносне отче наш Амвросие, кротости стяжателю, скорбящих утешителю.
Кондак 9
Силою, данною ти свыше, всяку слезу отъял еси от лица люте страждущих, богоносне отче наш Амвросие: алчущих бо явился еси кормитель, в нечаянных скорбных обстояниих свободитель, от внезапного нападения милосердный защититель, недугующим исцелитель и всем помощник показался еси, вопиющим Богу: Аллилуия.
Икос 9
Весь еси всем воистину помощник, богоносне отче наш Амвросие, и собрал еси вкупе вся прибегающия к тебе с верою, яко наставник и утешитель в бедах сущих, скорый исцелитель страждущих и винопитием недугующих, воздвизая всех вопити тебе сице:
Радуйся, недуги неисцельныя силою молитвы уврачевавый; радуйся ногама болящий, недужным шествие безболезненное устроивый. Радуйся, люте страждущим помощниче; радуйся, заре, сияющая в нощи греховной блуждающим. Радуйся, многажды прошения предваряяй; радуйся, не имевшему ни гласа, ни слуха дивный глас даровавый. Радуйся, преподобне и богоносне отче наш Амвросие, кротости стяжателю, скорбящих утешителю.
Кондак 10
Недоумением и смятением объята быша чада твоя, егда ты, старче претружденный, на смертном одре возлежай, поднялся еси и, епитрахиль преподобнаго Серафима на себе возложив, чада своя исповедал еси, прощая и разрешая им вся согряшения их, в житии сем до сего часа содеянная. Мы же, сие дивное чудо воспоминающе, со умилением вопием Богу: Аллилуия.
Икос 10
Новаго видим тя избранника Божия, старче Амвросие, аки помазанника духовнаго древлих отец, ты бо явился еси в последняя времена якоже един от них. В ознаменование высоты и тайны подвига благодатнаго прикровенно посети тя преподобный Серафим, велие сокровище – камилавку, епитрахиль и поручи своя преподав ти, тем являя сродство подвига духовнаго. Прославляюще сие дивное деяние Божие, вопием ти сице: Радуйся, драгценный смарагде в венце Царя царей; радуйся, яко с преподобным Серафимом в обителях Небесных вечно царствуеши. Радуйся, радость преподобнаго восхитивый еще на земли; радуйся, якоже старец Серафим, любовию согреваяй чада своя. Радуйся, подобно ему рекий: яко к живому грядите на место упокоения моего и нужды своя рцыте ми такожде; радуйся, препоручивый чада своя Всемогущей Преблагословенней Царице Небесней, Ейже во вся дни жития молился еси. Радуйся, преподобне и богоносне отче наш Амвросие, кротосте стяжателю, скорбящих утешителю.
Кондак 11
Духом прозревый время своего отшествия ко Господу, чада своя о том задолго предупреждая, время отхода своего день Покрова Пресвятыя Богородицы указал еси, честный отче, и вселился еси в селения праведных под покровом молитв Ея на второй день праздника Благодатныя, идеже со всеми святыми воспеваеши Богу победную песнь: Аллилуия.
Икос 11
Стена еси всем прибегающим к твоему небесному заступлению, Отче Амвросие, темже и нас от демонскаго ополчения ограждаяй, напастей и нужд различных свобождаяй, с верою к тебе взывающих: Радуйся, Царицею Небесною прославленный и под покровом Ея всю жизнь проводивый; радуйся, молитвами к Ней, яко драгоценным камением, устлавый пусть свой в Царствие Небесное. Радуйся, покров молитв твоих ширший облака есть прибегающим к тебе с верою и благоговением; радуйся, сирых и оставленных отеческое заступление. Радуйся, щите, ограждаяй от поношений и клеветы; радуйся, скорый утешителю кающихся во гресех своих. Радуйся, преподобне и богоносне отче наш Амвросие, кротости стяжателю, скорбящих утешителю.
Кондак 12
Милосердия исполненный, отче Амвросие, явлением своим по смерти утешил еси чада твоя, объятия отверзл еси им, печаль их избывая и в вере укрепление даруя, показуя тако, яко Бог не есть Бог мертвых, но живых. Изумлением объятая, воззваша ти чада твоя: жив еси, отче! И с Царем вечно царствуеши! Сему дивящеся и милосердие Божие пославляюще, возопиим Ему: Аллилуия.
Икос 12
Весь еси желание, весь сладость, Сладчайший Иисусе! – воззвал еси, святе, на смертнем одре возлежа. Следуя зову сердца твоего, посети тя Божественный Искупитель, разрешая тленных уз плоти и в вечную радость вселяя, идеже с Ним дерзновенно царствуеши. Отче Амвросие, в селениих праведных не забывай и нас, грехом пораженных, поющих ти таковая:
Радуйся, едино точию приобретение стяжавый – Единаго Господа; радуйся, драгоценный бисере блистающия ризы Христовы. Радуйся, пастырей Божиих кроткое вразумление; радуйся, заблуждших и с собою паству увлекающих грозное обличение. Радуйся, воплотивый слово апостола: мне еже жити Христос и еже умрети приобретение есть; радуйся, о всем мире, недостойнем тебе, моливыйся, Божественною любовию объятый. Радуйся, преподбне и богоносне отче наш Амвросие, кротости стяжателю, скорбящих утешителю.
Кондак 13
О пресветлый и предивный угодниче Божий, дерзновенный молитвенниче, преподобне и богоносне отче наш Амвросие, призри милостивым твоим оком на чада твоя, в бедах и гресех сущия, нынешнее наше приими приношение и умоли Господа сил силу свыше нам явити и от геены избавити милосердым твоим ходатайством. Да избавит Он нас твоим заступлением от всяких бед и скорбей мимотекущего века сего и дарует нам до конца пребывание во Святей Своей Церкви, да сподобит по кончине и последнем Суде с тобой и со всеми святыми воспевати Богу победную песнь: Аллилуия, Аллилуия, Аллилуия!
Сей кондак глаголи трижды. Посем икос 1: Ангельскаго жития… и кондак 1: Избранный на служение…
Молитва 1
О великий последних времен чудотворче, отче Амвросие, предивный и преизрядный угодниче Господень, во дни земнаго жития твоего никтоже от тебе тощ и неутешен отыде, но всем в сладость бысть благоуветливый глас словес твоих. К сим же и дар прозрения, дар немощных душ врачевания обилен в тебе явися. И ныне призри на ны, грешныя и немощныя, к раце мощей твоих притекающия и со слезами молящиеся ти: постри нам руку помощи, исхити нас челюстей адовых! Не допусти, милостиве отче, поколебатися нам в вере нашей и в уповании на милость Божию. В век ересей и расколов да не отпадем от Матере нашея, святыя Соборныя Апостольския Церкве, укрепи православных иерархов, весь священический и
монашеский чин и всех к помощи твоей притекающих и молящихся ти. В сонме святых пребывая, призри на бедственное положение Отечества нашего, не допусти погубити его врагом Православия и устраши, отче преподобне, всех возстающих на ны. Избави нас глада и мора и всякия напасти вражия. Со святым преподоным Серафимом в вечней славе Царя царствующе, огради ны молитвами своими и покрый от всякаго зла, да прославим с тобою благих подателя Бога и ныне, и присно, и во веки веков. Аминь.
Молитва 2
Милостиве, драгоценне и кротце отче наш Амвросие! Не остави нас, чад твоих, к милосердию твоему прибегающих, сохрани от всякаго дела и слова душетленнаго; в вере, надежде и уповании на Господа укрепи, любовию Божиею согрей и в оное время в Небесныя Кровы Его проводи. Царицу Небесную умоли, да ходатайствует за ны ко Господу. Огради наше недостоинство твоим предстательством и не укори во гресех все житие свое иждивших. Болезни наша исцели, колеблющиеся поддержи, сомнящихся покрый и просвети, уныния избави, в уповании на милость Божию возстави. Посли и нам тебе присущий дух кротости, дух умиления, да ничтоже скверное исходит из уст наших. Возносивый день и нощь теплую молитву ко Господу, и наша хладная сердца огнем молитвенным сгрей. Подаждь нам дух сокрушения о гресех наших и ко исправлению решимость, да возславим имя Божие и новаго угодника Его, преподобнаго и богоноснаго старца Амвросия, во веки веков. Аминь.