Ну, Кьурбанова Г1яйша Ханаевна, ак1убсира Дахадаевла района Кьярбач1имахьила шилизир 1958 ибил дуслизир. Нуни 1986 ибил дуслизиб ДГУ-ла филологияла факультет таманаибсири.
Гьала-гьала Худуц1ла шилизир урус мезла ва литературала учительницали рузули калунра. Гьанна биалли Сагаси Къаякентла урга даражала школализир дарган мезла ва литературала дурсри кадирхьули рузулра.
1980 ибил дусличирад дех1дихьили дила назмурти, хабурти, очеркуни районна ва республикала газетабазир ва журналтазир дурадулхъули сари.
1984 ибил дуслизиб «Бег1лара г1ях1си хабар багьандан» ибси конкурсличиб Дагъиста АССР-ла Дипломличи ва премияличи дила «Муртузла зубари» («Лачин» № 10) бик1уси хабар лайикьбикибсири.
Ну 2003 ибил дуслизир Россияла журналистунала Союзлизи, 2016 дуслизир Россияла писательтала Союзлизи кьабулрарибсири.
«Замана», «Дагъиста бархьдеш», «Шила г1ямру», «Бархьдешла шала» бик1ути газетабазир ва «Дагъиста хьунул адам», «Дагъиста халкьани» ва «Дагъистан» бик1ути журналтазир дурадухъунти макьалаби багьандан 2003 ва 2004 ибти дусмазир дурадерк1ибти Дагъиста журналистунала Союзла «Мургьила ч1ака» бик1ути конкурсунала лауреат ретаурсири.
Дила гьалар-гьаларти назмурти «Макьамти», «Сагати урунжуни», «Савгъат» бик1ути сборникуназир дурадухъун.
«Сих1рукья ретарас», «Агь, жан датла барскъаби», «Дила дунъяра нура» бик1ути назмуртала жузи Дагъиста жузала издательстволи дарган мезличил дуракаиб.
Дила жузи: «Дурх1нани бурули саби» (2003 д.), «Ник1а г1якьлукарти» (2005 д.), «Г1ямру руркъулра» (2007 д.), «Гьанарути» (2008 д.), «Г1ярала дурх1я» (2009 д.), «Хамидра Хамисра – разити инсанти» (2009 д.), «Ват1ан багьандан» (2015 д.) урус мезличилра дурадухъун.
Фольклорист сарливан, дуракаира «Халкьла мух1лила пагьму» бик1уси сборникра (2013 д.).
Дурадухъун нуни делк1унти методикала «Г1яжаибси азбука» (2007 д.) бик1уси жузра, «Дарган мезла кружок бирнила методика» (2010 д.) бик1уси пособиера.
Нуни 2008 дусличирад рех1рихьили, Къаякенлизибси г1илмула ва методикала центрлизир рузули, 1-ибил классличирад 11-ибил классличи бикачи буч1антас хасдарибти, чусра «Инсантази адамдешлати къилликъуни минадирни» бик1ути пособиебала проектуни х1ядурдирнилизир бут1акьяндеш дарира.
Ну шабагъатларарибсира:
1. Грамоталичил Дагъиста Республикала писательтала Союзли дураберк1ибси «Дагъиста урунжуни» бик1уси конкурсла лауреат риъни багьандан.
2. Цаибил даражала Дипломличил – «Россияла патриотуни абилкьулра» бик1уси конкурсличиб «Ват1ан багьандан» бик1уси жузли цаибил мер буцни багьандан.
3. Дагъиста Республикала Миллатла политикала Министерстволи «Вег1ла мез руркъни, т1инт1дик1ахъни багьандан ва чеалк1уси наслулис г1ях1си бяркъ лугни багьандан» бик1уси Гапла грамоталичил.
4. Дагъиста Республикала Багьудила ва г1илмула Министерстволи «Багьуди т1инт1бирнилизиб халаси пай кабихьни ва дахъал дусмазиб чебетаибси х1янчи барни багьандан» бик1уси Гапла грамоталичил.
5. Дагъиста Республикала печатьла ва информацияла Министерстволи терроризмаличи къаршидеш дирнила журналистуни-ургабси конкурсличир 1 мерличи лайикьрикни багьандан 2017 ибил дуслизир Дипломличил шабагъатларарибсири ва дахъал царх1илти Х1урматла грамотабачил.
Гьаннала г1ергъира ну, учительла х1янчира х1ялалли бирули, дила творчествора мурхьбиахъес къайгъилизирра.