Дерхъаб х1ела г1ямру, Пат1имат
(Пат1имат Кьурбановачи гьаргси кагъар)
Рях1ятси маркали даим ванзаван
Игъбарли, Пат1имат, х1у г1ерруцаби!
Дурк1ути бурх1нала х1улрук1ибдешван
Талих1ла мурхьдешра х1уни багьаби!
Рузи Пат1имат, х1уни балуливан, миллат калахънилизиб, илала хасдеш даимбарнилизиб тяп нешлагъуна кьадри лебси саби даргала литературный мезла ва вег1-вег1ла лугъатла.
Илди мезли саби нуша, дарганти, ца кьамла наслу диъни кабилзахъуси. (Х1язлис ах1ен Дагъиста дурав х1ерируси дарган адамлис дарган мезличил гъайик1уси тянишли ах1енси адамра даргала узиван илзуси). Х1ебиалли нешла мезла г1ях1дешли нуша тяп ца тухум-агьлуван цадиэс дирулра, дагьрилизир нушала кьамличи хасти адабла къилликъуни дургес дирулра, илди мез миц1ирли лерниличи харидирулра.
«Мез – гьанна миц1ирли агарти, х1ербирули лебти, г1ур алк1ути наслуби-ургабси бег1лара миц1ирси ва зумаси бархбас саби», – вик1усири урусла машгьурси педагог К. Ушинский. Х1ебиали мезла кумекличибли нушани нушала хала бег1тала жявх1елила г1ямруличила, бусаг1ят лебси х1якьикьатличила, даргантала челябкьлаличила дурусли багьес дирулра.
Нешла мез калахъес багьандан, рузи Пат1имат, нушала мезли дурабулхъуси «Замана» газетала кьадри ахъбуцес багьандан, х1уни риубсигъуна къайгъибирулри, Дагъистайзир дурадурк1ути гьарилра-сера далдуцуначил дарганти дарган мезличил тянишбирулри. Баркалла биаб х1ед!
Х1уни, рузи Пат1имат, вавнадяхъибх1ели Сирх1яла дубуртала жагадеш ва умудеш гьанарахъути, х1у-алавти адамтачи дигили рамчдик1ути назмурти лук1улри. Х1ебиалли х1уни шурми-ургаб ак1убси, сунечи лех1ирхъусила чарх рях1ятбируси урунжличи мешуси лирикала жура даргала литературализи бух1накаилри. Илбагьандара баркаллабиаб х1ед!
Х1уни, даргантала лугъатуначила, нушала кьаманала хасдешуначила хъумуртули ах1енри. Цацабех1ти дарганти нушала мез руркъх1еруркъули, урус мезличицун хъарахъили х1еркабирираллира, х1уни х1у-рег1си урк1ила х1ялани нешла мезличил газетала буч1антази иргъахъулри, илдачи г1ях1си г1ях1ялван ариц1улри. Нушала литератураличила, культураличила, нушала халкьла историяличила, даргантала рух1лизир лерти адаблати къилликъуначила, мурталра дарганти-ургар черях1дирути ях1-ламусличила, урк1ец1и-рях1муличила, сахаватдешличила, нуша-дег1ти мер-мусаличи ва ват1айчи дак1удирути диги-карц1иличила, узидеш-мардешличила хабурти лук1улри. Дила пикри х1ясибли, илдигъунти хабуртачирли х1уни даргала литература давлачеббарилри.
«Мез далуси мурдали, х1едалуси хьурали» иру халкьли. Сегъунти мезли лук1адлира, даргала журналистика ва литература чебирц1ахъес, дарганти-ургар диги имц1адирути макьалаби лук1ахъес, х1ед Аллагьли духъянти г1ямру габ!
Рузи Пат1имат,
Адамтас дях1 шалали,
Шантас дай урк1и гьаргли,
Х1ед дигуцад арали,
Калаби талих1черли!