Наидази унрали хьарбаиб:
– Бура, гьари, унра рурси, х1ед дудеш дигахъиду яра неш?
– Дудеш, – гъинч1ризур рурси.
Г1ергъила барх1и чудни-хинк1али рукуси Наидази унрани г1урра хьарбаиб:
– Бурагу, х1ела жан дат, хъумартурлирану, х1ед чи дигахъида: неш яра дудеш?
– Неш диги! – жаваб чарбатур рурсили.
– Ягъари, дагк1ун х1у: «Дудеш диги!» – рик1ади. Ишбарх1и сен или рик1улри?
– Ишбарх1и хъулив дудеш агара кьалли…
***
Х1ябал дус риубси Заирали луг1ули сари:
--… Вец1ну гех1ра, вец1ну урч1емра, вец1ну... вец1ра!
***
Нешли Ислам усалъахъулри.
– Усен, дила г1язиз, дусули сари житнира, дусули сари хурира, бусули саби адамтира. Усен х1ура…
Хапли улкьайлиуб хя авбик1есбииб.
– Неш, чебиулрив, хя бусх1ебусули… Илис, неш, буг1ярли бургар… Кьан-кьанни усалъасну, раши, хялис буруш-г1янала архех1е.
***
– Х1ямид, ишбарх1и х1уни гумайла кабиибтази «Делх1унраяв!» х1еиригу…
– Г1урра х1ейк1ус.
– Сен?
– Илди иткъира белх1унх1ели.
***
Маржанатли вишт1аси Х1яжис гардла далайра белч1и, урши ляввариб:
– Адамтира бусаи саби, миц1ирагра дусули сари. Гьанна х1ура усен, дила г1язиз, кьяп1дара х1улби, – уршиличи юргъанра чебушили, ил усалъан или, кухнялизи дурарухъун.
Хъулиб лех1деш чебихьун. Цакамси замана дикили г1еръи холодильникла гъугъла т1амара бишун.
Х1яжили х1улби абхьиб:
– Холодильникра бусаив, неш?
***
Сунела дишт1ати дурх1начил х1язтабиркьуси супелтар неш-житачи х1ерик1уси Г1яли аъкяхъиб:
– Хала дудеш, иш житала х1елагъунти супелти лергу, мурул адамти ах1енталара супелти дирутив?
***
– Зарипат, вари х1уни мухоморти мавдид.
– Сен?
– Сенах1енну илди агъула сари.
– Гьуя, гьанна ну агъулариублирав?
***
Халал рузини эскимо журала мороженое таманаиб. Илис г1урра мороженое дигулри. Илини ришт1ал рузи сунечи жирариб:
– Эльмира, рукьенну дудушличи, бура: «Дудеш, гьаб г1урра эскимо дигулрану, арц диха»
Эльмира дуц1ли тавханализи ретац1иб. Ца минутла г1ергъи т1амадариб:
– Замийя! Нуни дудеслизи х1уни ибти дулила! Г1ул се иса?
***
Неш хъулирад дурарухъунмад Мажидли морозильникла унза абхьиб ва урк1кавхъун:
– Вях1! Жявлил х1еб дак1или сари. Ишаб биалли яни лебал.
***
– Неш, адердагу наб розаби, – тиладиухъун вишт1аси Рашид.
– Ик1ди розаби ах1енну, дила урши, г1инт1ла вавни сари. Кьадаличирти занзбани вавни касахъес х1едалта.
– Тамаша! Ик1цада жагати вавнира занзбира ца кьадаличир дашес дирутив?
***
Детсадлизивад чариубси Камил дудешла х1янчиличи х1якизур, ил уркьуйчиб х1усбулхъуси хуркали алк1ахъути мявначил х1язтавиркьесвииб.
– Дудеш, набзира бихагу х1ела хурка…
– Хурка бузахъес х1у гьачамлис вишт1алири. Х1уни, дила урши, кашалра беркес вирули ах1енри.
– Вирулра, дудеш. Нуни ишбарх1и кашла к1ел вакъ деркунра.
***
Савгъатуначи бурсириубси Кериматлис унрали х1ябал хъяр дедиб. Иштях1личил хъярба рукуси рурсиличи Муртуз гъамиуб.
– Ца хъяр набра бихагу, рузи.
– Х1елугас, – къакъбяхъиб рурсили.
– Кьиркьир! Х1елугадли, малугад!
– Кьиркьир леври х1у. х1ед костюмти асибхели, х1уни наб я шалбар, я х1ева, я жилет х1егири.
***
Х1янчиличирад чаррулхъух1ели, Жавайратли садиклизивад Муслим арикусири ва гьуникад къаршидиркути тукентази рух1нарухъи, берк-бержла продуктуни исутири. Кондитерская фабрикала гьалабси киоскличи ветаибх1ели, Муслимли нешлизи сегъуна-биалра муридеш асахъили, х1улк1ули хъули вашусири.
Ца барх1и Жавайратли Муслим уршили гьачамалра чех1ебаибси кьакьакад арукиб.
Муслим хапли висесииб.
– Гьуя, дила урши, х1ед се бетаурли? Кьяш изулив?
– Изули ах1ен.
– Бек1 изулив?
– Изули ах1ен.
– Х1ебиалли се висулри?
– Наб иш кьакьад вашес дигули ах1енра. Наб муридешунала кьакьад вашес дигулра…
***
Ца гьачам Х1яжини больницала жанях1лизив унра урши чеиб ва иличи гъамиуб.
– Салам! Х1у сен иша вак1илри?
– Дила чулби ижули шари. Чулбала тухтурли жиайчи х1ерлира.
– Дила биалли кани изули саби. Дудешли ну бег1лара г1ях1си кунбала тухтурличи кибсира.
***
Абакар х1янчиличи гьалаклири. Илала уршира машиналичи айэс хьулухъун.
– Нариман, укьен хъули, ну х1янчиличи аркьулрану.
– Нура варх укабагу.
– Ягъари, ну шадибгьуйчи дуравхъи ах1енрагу, узес аркьулра.
– Нура х1ечил варх узус.
– Гьала-гьала халаваи, г1ур узудну.
– Наб гьаннаял узес дигулра.
– Х1ед селис г1яг1ниси узес?
– Сенк1унайлан арц касес.
– Х1ед арц г1яг1нили диалли, каса ишди арцра, укьен хъули.
– Илди арц камли сари.
– Х1ед дахъал арц селис г1яг1нити?
– Машина асес. Х1ези тиладих1ейк1ули, чина-дигара вашес.
***
Гьарунни уршилис шоколадунала плиткаби асиб. Нергъла вакъра бархьбатурли, Х1ясан муридешли укесииб:
– Неш, чейулрав ну гьанна г1ях1ил укули… Ну укули дигалли, нергъ мадиридну, шоколадуни аса.
***
Житали, цулбази буцили, сунела ца барх1и биубси дурх1я ухьаличи архули, Заурли чебаиб. Урши неш-житачи вачавархиб ва илис г1елавадкайкиб:
– Агь урезиагар! Халакабаибси жита бишт1аси дурх1яличи кьац1башулигу! Ц1ахли ах1ену х1ед?
***
Г1ях1лад вякьунси вякьунси Рустам мурталра, гьагьик1ули, аъкархъулри. Неш илизи г1яшли тиладирухъун:
– Дила г1язиз, х1у илкьяйда аъмархъуд, мух1лилизи жибин абиц1урну.
– Юх, неш, ах1ебиц1ур. Жибин мех1ур ах1ен: мух1лилизи абац1алли, сунес се бетарарал, илини бала.
***
– Казим, х1ябилра багьлали чяй дужулригу х1уни. Х1уни чайла ца пигьала бержайчи, нуни х1ябал держилира. Гьалакии: поездличи кьандирех1ену.
– Неш, къяна мабурид: х1ела някъбазир х1ябал пигьала ах1енну, ца пигьала саби лебси.
***
«Дурх1нала дунъя» бик1уси тукейзиб Мях1ячли халаси машина чеббик1иб.
– Неш, асагу наб иш жагаси машина.
– Ил дебали дурхъаси саби. Илгъуна машина асесцад дила арц агара.
– Х1ебиалли бура зизи Тукенчизи, г1урх1ейс хъулирад лерхисну, биха или.
– Ва дила ах1ерси урши, хъулирра агара кьалли ил машина асесцад арц. Х1еръа сумкализи, сецад х1язла ваях1 асирал х1ед нуни…
– Наб иш машинара дигулра.
– Гьари лех1кахъину, ваши хъули, вайт1а витх1ейтили левай!
– Рахли витасли, ну ахъли висус. Дила бисаличи аламти цалабиркур, х1ед г1яйиббиру: «Ятимиубси, цайли цаси уршилис х1язла ваях1 асес кьиркьирли сари» иру.
***
Халал рузини начила х1улбачирти ранг урасиб. Нана х1улби агарли, ц1уба духурибачи мешудикибти х1улбачи х1ерик1ули, Марат тиладаухъун:
– Салих1ят, гьаргдарагу, рузи, начила х1улби, ишини селра чебиули ах1енну…
***
Халал узила хьунул торт барес алаврак1иб. Дахъдалгь Кьасум илини секьяйда торт бирулил, ибкьли х1ерик1есииб.
– Эльмира, х1ела г1ях1си торт бетх1ерар. Дила нешли ил царх1илван биру.
– Жалмайк1уд набчил, х1ела к1унт1убачир гьачамлис ниъ деръубли ах1енну.
– Сен х1едуръути? Нуник1ун салфеткаличил к1унт1уби г1ях1ил душкира…
***
– Х1ямид, укьенну, дила г1язиз, илди палтарра чердати, х1ура усес кайхьен.
Урши шала ах1елкунси хъули ух1навхъун ва итмадан илавад дуравях1 вебшиб.
– Ва дила г1язиз, сен х1у усес ках1елхьулри?
– Их хъулиб аждагьа хеб. Ил ахъли шят1бик1ули саби.
– Гьуя, дила г1язиз, их шят1бик1усик1ун аждагьа ах1енну, дяг1 саби, – шала абалкун нешли, – чебиулрив, чинабалра аждагьа агара.
– Гьари, шала бишен, аждагьа ц1ябси мерлаб бируси сабину.
Шамиль х1яка челгьуси нешличи х1ерик1ули, кьяшмала гьалав лукьесииб:
– Неш, х1у чина аркьулри?
– Шери.
– Нура варх укаба…
***
Буг1ярси янила барх1и Г1ях1мад улкьайкад дура х1ерик1улри. Миъ бячи, шарализир курт1дик1ути къузри чедаили, урши урк1кавхъун:
– Неш! Ва неш, х1ерагу ца, миъдярг1ибти шиннизир къузри дизули! Гьуя, гьанна ихди зяг1ипдиркургу!
– Зяг1ипх1едиркур, дила урши, илдала пух1ли шинк1адирути ах1ен.
– Г1ях1ил хеб къузрас: чус диганта диркьес дирули…
***
Мурадли халал рузила жузи паргъатли х1едалти: х1ясибдарес чина-биалра ардухили, илар дархкадалти. Гьачам илини биологияла жуз сабяхъиб ва итмадан илра лайбак1или, ч1ярик1есииб:
– Зарема-а-а-а! Къалабали убаса их жуз!
– Се бетаурли, дила узи? Сен ч1ярик1улри?
– Къалабали убаса их жуз: ихаб ч1ич1ала хебну.
***
Арх1яличи аркьуси Мях1ячличи дуц1ли Заур вак1иб:
– Дудеш, къалаба-къалабали арц диха,
– Се багьандан арц лугути х1ед нуни?
– Сенк1унайлан, арц гадли, арх1яличи нура арукаба или тиладих1ейк1ух1ели.
***
Ц1а дикибх1ели, цаибил класслизи рашуси Салиматла сумка бигуб. Рурси, сунела къугъати суратуначибти жузи ц1али дигуб или, рахъх1и риси. Нешла маслиг1ятуначира лех1ризурли, рисесра рамсурли, ил циила паргъатриуб. Ца камси замана дикили г1ергъи ил г1урра агьирик1есрииб.
– Салимат, х1у сен г1урра рисулри. Г1ур рисх1ерисус или, х1уник1ун гъай гибсири.
Рурсили байхъу бигубли, байхъу калунси тетрадь чебаахъиб:
– Дила «Зубарти» ц1али дигубли сари. Илдик1ун наб шулабас кьадин кататуртири. Гьанна дила «Зубарти» лебталайчир камли дирар. Агьи-агьи-агьи…
***
– Неш, х1уни ну г1ямзила катаба.
– Ва дила г1ях1си урши, се сабабли нуни х1у г1ямзила калтусири? Ишбарх1и х1уни селра вайси х1ебарири, селра х1ебячунри…
– Ну г1ях1си уршили калес вамсурлира.
***
Зумрият, таврумази дирцути ваях1ра кадирхьили, базарличи рукьес или х1ядурриуб. Иличи дуц1ли Валих1ян вак1иб:
– Абзи, иш камалра бицагу.
– Илк1ун х1ела дудешла байхъу буркьбиубси камал саби. Ил чилилра х1ейсу.
– Сунела багьалис х1ейсалли, байхъу багьалис бица.
– Ягъари, сен бирцуси ил нуни, х1ела дудешлис ил г1урра г1яг1ниси биалли?
– Нуни се вайси барасра, дудеш вех1илзули сай: «Диркахъисгу иш камалличил х1ед нуни…»
***
Халал узини, гъярудули, лайдик1ути к1ап1рачи х1ерик1ули, Г1язиз урк1кавхъун:
– Х1ямжат, х1уни дахъал кагъулти гъялделдили, лайдак1илли. Нуни кагъулти диха асли, кьилкьилилулли…
– Гьари, мух1ли буца!
– Чила буциша?
***
– Дудес, х1ела някъ изулив? – хьарбииб савли арузурмад Заирали.
– Ах1ен. Сен хьарбиулри, дила рурси?
– Х1ела някълици хя кьац1бикунх1ели.
– Набчи сегъуналра хя кьац1х1ебикун, дила духул жан.
– Нуни цебаила! – х1ела тяп искьяйда ил х1еци кьац1бикун, – дудешла дулгъаличи кьац1карики, бек1ли гьак1рик1есрииб рурси.
– Х1уни муэр сабри чебаибси, дила духул жан.
– Юх, дудес, ил муэл ах1енли, багьбиубси хя сабли.
***
Жамилат, рузира рарх рукили, Сяг1идличи ва Заирачи шадир рякьун.
– Сяг1идра Заирара, даширая х1яз бирех1е. Разилирав?
– Г1е-е-е-е!
Жамилатли ящикуназирти лерилра х1язла ваях1 дурасиб.
– Нушала х1язлис «Тукен» бик1уси саби. Х1ера ишди ваях1 тукейзир сари. Ну тукенчи сарра. Х1уша биалли сек1ал асес дак1ибти адамти саррая. Арцра хили, гъамдиирая набчи.
Сяг1идли шалбарла кисализирад арц дурасиб.
– Сяг1ид, х1ед сегъуна х1язла ваях1 дигулрил, дек1арбара. Х1елак1ун дахъал арц лер.
– Наб машина дигулра.
– Х1ера иш х1ед жагаси мерседесра. Диха гьанна арцра.
Сяг1ид г1ях1цадх1и арцличи х1ерик1ули, г1ур илди шалбарла кисализи чардарили, иб:
– Легх1елугас! Иш машина иткъира дила саби. Иш наб дудешли жявлил асибси саби.
***
Арсла хала неш ребк1иб. Дец1ик1уси хъяшачи унруби дугьабизур:
– Ва нушала ах1ерси Арсланчик, хала неш агарли, гьанна х1едра ац1булкьан.
– Анц1букьни селра ах1енри, – жаваб чарбатур уршили. – Г1ур илини шоколадуни х1ейсу кьадин.
Телевизорличи х1ерик1уси Г1ямар замана-заманаличив креслоличивад харчилзулри ва някъба гьак1ик1улри:
– Агь, х1ушаб х1ялалдиъла гъубзни! Гьу гьария, г1урра гол бархьаая! Гьу! Гьу! Го-о-о-ол! Агь, х1ушаб х1ялалдиъ! Аралии датабая, «Динамола» команда!
Вишт1аси Анзор Г1ямарличи х1яккайзур:
– Дудеш, сен х1у илцад вявик1усири. Х1ела т1амак1ун футболистунани сеналра х1ебикьу.
***
Мультфильмаби тамандиуб.
– Гьанна, дила узи, укьен кьакьализи, сагаси гьаваличив х1язтаиркьен. Гьар мурталра телевизорличи х1ерик1адли, х1ела х1улби изесдирх1урну, – Раисатли телевизор бишун ва, хъулри умудирули, далайрик1есрииб.
Г1урра мультфильмабачи хьулик1уси Рашид рузичи разиагарли х1еризур:
– Раиска, х1уни телевизор бишунрину, х1ела далуйтира дишахъен!
***
– Ягъари, дила дурх1ни, вявмадик1удаягу илцад ахъли: иткъира бек1 изули сабину.
Г1яшурара Шакирра унзаличибях1 гьайбиуб.
– Чина аркьулра х1уша?
– Кьакьализи. Нушалак1ун жал таманбиубли ах1ен.
***
– Чуйна ира х1ези: «Увях1иркудну, галгубачи амайц1уд» или. Г1ях1лив гьанна, кьяш бячунх1ели? – хьарбаиб Рабазайзи абзи Рабиятли.
– Г1ях1ил саби, – жаваб чарбатур Рабазай. – гьанна ну садиклизира вашули ах1енра, лебил больницализи башутани савгъатунира дихули сари.
***
Мавлутдиннис шадибгьуни г1ях1бизурлири. Хала нешли хъяша вац1ализивад хъули урукес рирули ах1енри. Рухъна уршилизи сецад тиладирик1алра, ил лех1илзули ах1енри.
– Хъулиб буц1арли саби. Илаб наб анц1булкьули саби, – жаваб чарбалтулри хъяшани.
Се рик1ули хьалли, сунечи лех1х1елзуси хъяшачи рухъна г1ясириуб ва, маймайварили, гуж-гужли дурх1я хъули савкиб, вазиб, столла г1ела катур. Илала гьала чабдигунала сукура кабихьиб, сари биалли, дурарухъи, диг1яй уршиличи х1еррик1есрииб.
Иштях1личил чабдигуна укуси хъяшачи рухъна разириуб: «Ва дила г1язиз, набчи гьимук1или, укх1евкан или гьанбикиб. Укули сай, шукру Аллагьлизи». Рухъна, гъинч1ризурли, уршила уршиличи гъамриуб.
– Гьу, дила ах1ерси, г1ях1дилзулив х1ед чабдигуни?
– Ах1ен.
– Илдик1ун х1ед дигахъути сари. Чабдигуник1ун нуни х1ела тилади х1ясибли х1ядурдарира.
– Сеналра г1ях1дилзули ах1ен.
– Сен г1ях1дилзути?
– Сенк1унайлан ишди х1уни дарибх1ели. Х1у биалли наб маймайрик1улри. Х1евъус ну х1ечив. Дила нешра дудешра бак1ибх1ели, х1у илдази г1ярзрирури.
***
Залкипли дац1ти шишни дициб. Дикибти арцлис х1яжланк1ила хурегла пакет асиб. Галгала кьялиличи ац1или, пакет гьаргбариб.
Иштях1личил х1яжланк1ила сулдурумта укуси узичи Карина гъамриуб.
– Набра сулдурумти дихагу, узи, – тиладирухъун рурси.
– Арац1и галгаличи!
Рурси, галгаличи арац1ес дигули, сецад къайгънариркьалра, х1ускарик1ули, кариркулри. Ахирра ил рамсур.
– Залки-и-ип! Ну галгаличи арац1ес рирули ах1енра!
– Х1ебиалли, руэн удир. Иткъира сулдурумти адурхули сари.
– Жуг1ял нунира сулдурумти исис. Х1ед биалли селра х1елугас: я сулдурумти, я пакетлизибси х1язла ваях1!
***
Сурмелила някъбазибад сукура кабикиб ва зянкъла т1амаличил бячун.
Вишт1аси Салам нешличи, пишяхъили, х1еризур:
– Г1ях1лив гьанна? Х1унира сукури бячунрину, карии ц1ябси хъули! Графин бячунх1елик1ун, х1уни нура ила катурра.
***
Ришт1аси Сижаратли хабарагарли ниъ дях1каур ва сунела палтар шинк1адариб. Г1ясириубси Умужатли рурси маймайрариб.
Сижарат нешличи гьимрук1иб ва рисирииб:
– Дудеш! Ну нешли гьимлук1ахъила!
Амма рурсила т1ама дудешли х1ебакьиб: ил х1янчиличив сайри.
– Динала! Х1елъагу, неш наб лулгъули сали!
Амма ришт1ал рузила т1ама Динаралира х1ебакьиб: ил школализир сарри.
– Малатик! Х1елъа, гьали, неш наб маймалик1ули сали!
Амма Маратлира рурсила т1ама х1ебакьиб: ил, футболли виркьули, дурав сайри.
Умужатла рурсиличи урк1ец1идухъун. Нешли ил ляврариб, ил дигиличил к1ап1руциб. Сижарат нешла ляжиличи уммайрикун:
– Неш, челлелхи. Х1уни ну гьимлук1ахъниличила г1ул чизилла х1ебулис.
***
Циила гьаларван гъайрик1ес бурсириубси Дианали суратунала альбом х1ясиббирулри.
– Диана, иш чи сая? – хьарбаиб нешли, дирутазирад ца гьигьла манзиллис акьурухъи.
– Ис дила узи Самил сай.
– Чинара илала х1улби?
– Х1елъа, исди!
– Чинаба илала къянкъ?
– Х1елъа, ис!
– Чинара илала к1унт1уби?
– Х1елъа, ихди!
– Чинара илала гъезби?
– Гьали, кьап1а убаса, цедиахъисну…
***
Яслилизи вашуси Каипличи Хьанц1а бец1ла роль бузахъес хъарбариб. Репетиция бирух1ели, хъяша веткахъиб. Рахъх1и къяйц1карик1уси воспитательницани ил юртла г1елав варгиб:
– А-у! Хьанц1а бец1! Х1у сен ветахъибсири? Сен сценаличи дурах1елхъусири?
– Сенк1унайлан ну Хьанц1а бец1 ах1енх1ели. Наб хала нешра Х1унт1ена кьап1ала рег1ра бергес дигули ах1енра.
***
Гьеркличи икибси Жабраил хъярхъли жанях1лизи ух1навхъун.
– Гьуя, дила мургьи, се бетаурли х1ед? – хьарбаиб илизи нешли.
– Ихар къу- къу- къу- къу- къу- къузри херри. Кьац1дикес… дигули, илди… набчи… чедухъун…
– Къузри чех1едулхъи, набчи лех1илзули, ришт1ал рузичил х1язтаиркьули, хъулив каладри.
– Неш, Карина чинара?
– Нуни ил рицира. Агара г1ур х1ела рузи.
Ил манзиллизир Жабраилличи унра квартирализирад Каринала разити дукелц1ила т1ама чехиб. Уршили аргъиб, ришт1ал рузи унрубачир риъни.
– Неш, нура унрубас вицабагу. Г1ур наб кьакьализи укьес дигули ах1енрану.
***
Марьямли дура шайчирад улкьайти ицулри. Шуибил дерх1личирад карикалли, нешлис сецадла изиарарал гьанаурли, вишт1аси Кьади ч1ярик1есииб:
–– Неш, улкьайти майцидну, карац1и ч1ябарличи!
– Сен или вик1улри, дила урши?
– Илди ицух1ели, х1у урях1риркуд.
– Ва дила къугъаси къакъба, – дурх1яла дигиличил дурибти гъайли гъузгъалдирариб Зумруд, – х1у урухиубрив, дила урши?
– Х1ейубра. Ну ах1енрагу улкьайличи ац1ибси, х1у сарри.
***
Касимли бег1 гьалаб сабри аръа марка чебаибси:
– Х1еръагу, неш, чила-сарил духуриби кьарличи урях1дикили. Х1ябилра жагати мачни детарар илдала. Чедиулрив, сецад жагали ухулил илди берх1ила удир…
***
Газетализи муридешуни дуракайуси цехла х1янчизартала сурат кабяхъилри. Забида суратлизибти хьунул адамтачи х1еррик1улри.
– Забида, чихъали леба суратлизиб?
– Абзи, г1урра абзи, х1ябъибилра абзи, г1ур ишав адавзира лев.
– Иш авъибилра хьунул адам сари, дила рурси.
– Ах1ен. Хьунул адамтани ихкьяйда бек1 х1елуг1а.
***
– Дях1и башули саби! Дях1и башули саби! – разили т1ях1рик1есрииб Сният.
– Гьуя, мех1ур! Дях1и башес бирусив? Илк1ун кабиркуси саби!
***
– Неш, ну гьанна халасирав яра вишт1асирав?
– Сен хьарбиулри, дила г1язиз?
– Сенах1енну, рахли ну висивиасли, «Висмайсуд, х1у гьанна халакаибси урши сайри» рик1улри. Эгер арх1яличи варх укаба вик1асли, «Хьулмайк1уд, арх1яличи вашес х1у гьачамлис вишт1али левалри» рик1улри.
***
Савгъатуни дихули, бурсибиубти дурх1ни, арх1яличивад чарухъунси дудешла сумкализи кабац1иб.
***
К1иибил класслизи вашуси Рабдан дурсрачи кьанкайуб. Уруз-х1яц1ли, г1яш-г1яшли кьут1дяхъили, ил класслизи ух1навхъун. Селра эс х1ейрули, т1ашкайзурси уршилис учитель пишяхъиб.
– Рабдан, салам агарагу х1ела…
– Г1елавад лявкьули хев.
***
Мях1яммад зяг1ипикиб. Кьакьурти изули, селра беркес х1ейруси уршилизи неш тиладирик1есрииб:
– Деркенгу, дила урши, ишди к1ант1ити шоколадуни биалра.
– Х1ейги, – жаваб чарбатур уршили, илди деркес дигух1ели, х1уни диг1яндиради.
***
Сяг1ид суратик1улри. К1ап1и аберхурх1ели, уршили ил бархьбатур. Сагаси к1ап1и кабихьили, нешли къелкабарес агарси к1ап1и убасиб ва гъярбердиб.
Урши висесвииб:
– Се барри х1уни?
– Жагати суратуни дарахъес къелкабарибси к1ап1и гъярбердира.
– Х1уни дила джипани КАМАЗунира дячахъунри.
***
Х1ерагу, неш, ик1 дях1иличи! – дай гьуйчи т1ашкайзур 5 дус виубси Кьади.
– Дях1и бирару дуц1румла буц1ардешлизиб? Гьалакли ваши хъули! – гъузгъалдириуб неш.
– Бирар. Х1ера, ик1 дях1и заклизиб! – гъагулти чедаахъиб уршили.
– Ик1ди гъагулти сари, дила урши, дях1и ах1енну.
– Селис г1яг1нити гъагулти, калхъес дях1и агарли г1ергъи?
***
Ислам бег1 гьалав садиклизи вякьун. Барх1ехъ, ил чарухъунх1ели, бег1тани хьарбаиб:
– Гьу, Ислам, г1ях1бизуру х1ед садиклизиб яра анц1букьуну?
– Х1ебурис.
– Сен?
– Х1ушаб се дек1ардеша? Наб илаб сен-сен биалра, х1ушаник1ун ну г1урра ила аркура.
***
– Гьаригу, дила урши, чиналра дурамалхъадну, делч1ен дурсри.
– Набра, неш, дуравхъес дигули ах1енра, амма нушала хялис анц1букьи саби. Набзи ил «Ваши!» или тиладибик1ули саби.
***
Учительница:
– Х1ушани х1ергъути дугьби словарьтази лук1ули, илди урк1иличир дагьадалли, х1ушаб шадлихъличир диадалра, сях1батличир диадалра, гъайдухъес гьамадли бирар.
– Мекъ-сях1батличир нуша словарьтази х1ердик1утирав?