Г1ях1си девли

 
              (Ильяс Х1ясановла «Дурх1нани бурули саби» бик1уси Г1яйша Кьурбановала жузличила пикруми)



               Г1яйша Кьурбановала творчестволичила нуни гьачамалра макьала белк1унси ах1енри, иличила даргала ва царх1ил маллатунала лук1ути-ургаб чуйнара-сера гьанбушира виасра.
               Лебти саби Дагъиста лебилра-сера миллатунала ахъси х1урхъла дубуртазиб х1ербирути, урк1би гьаргти, адамтас дях1 шалати, х1ялалси бузерили ара-сагъли бих1ути, азадли  ва разили г1ямру дурк1ути багьадурти.
               Илдала дев ц1ябдеш гьарахъдируси нургъуна бирар. Илдала дев шараб-шинна к1ант1гъуна бирар. Илдала дев альпинистлис бахъ х1яжатси миъбялчангъуна бирар. Х1ера, идигъунти дубурлантазирад ца сари Г1яйша Кьурбановара, х1яна х1урхъала удиб мерлабиубси Къярбачимахьила  шилизир ак1убси рахъх1ила учительница.
               1980 ибил дуслизиб Дагъиста писательтала союзла председатель Р. Х1ямзатовла сипта х1ясибли, Москвала  кумекличил  дубуртар улкала бахъал дурх1начи чула миллатла мезаначил «Лачин»  журнал башесбииб. Дарган мезличил дурабулхъуси «Лачин» журналлис редактордеш дарес дилара талих1 биуб.
Ит дусличирад дех1дихьили, саркъибти, пасих1дешли парчдк1ути, макьамтиван каргьурти назмуртачил к1ел азир журнал ник1а лачинти- буч1антала хъули абиц1есбииб.  Илизир Г. Андерсенна дипломла лауреат Р. Рашидовла, М. Х1ямидовла ва ц1арх1илти машгьурти поэтунала назмуртани чумра ник1а буч1антала урк1би разидариб. Амма поэзияличил къяйли бишт1атас хасбарибси прозара г1яг1нилири. Илбагьандан 1984 ибил дуслизиб «Лачин» журналла редколлегияли «Бег1лара г1ях1си хабар» ибси конкурс багьахъурсири.
               Тамашах1ейэс аги хабардерхурти писательти, поэтуни, журналистуни, художникуназибад чеббек1ибси жюрили итогуни каибх1ели. цаибил мерличи ва арцла шабагъатличи лайикьрикиб гьачамлис бахъал буч1антас тянишли ах1енси ДГУ-ла филфакла студентка Г1яйша Курбанова.
               Халкьли бурули бирар: «Чердик1ибти дугьби агарли, деза бетх1ерар, жагаси макьам агарли, далай бетх1ерар» или. Девлара макьамлара мяг1на балуси Г1яйша дурх1начи дахъал диги лерси автор сарли урдухъун.
               Дахадаевла районна Худуц1ла шилизир учительницали рузес рех1рихъибси ил авторли дурх1налара, илдала бег1талара халаси х1урмат  сархиб. Сари рег1ти дурх1ниван урх1лара бишт1ати бигахъух1ели биэс илала белк1назир ник1абала вяшат1алара, илдала гъайалара аръа маркала к1унт1риван умути ва тяп илдиван лямц1дулхъути. Тамашах1ейэс х1ейрар ил авторла «Дурх1нани бурули саби» бик1уси жузлизирти масхуртачи.
               Масала:
               – Гъуя, дила г1язиз, х1елак1ун температура ахъбиубли саби, – гъузгъулдириуб  неш. Г1ябдурашидла андаличи някь чебурцули.
               – Ил чина ахъбиубли? – аъкяхъиб хъяша.
               Яра царх1ил мисал:
               Х1ясан хала дудешличи, шилизи вякьун. Шила мякьлабси майдайчир  урчира эмх1ера кьарли дугулри. Хъяша илдачи вякькайзур:
               – Халаси урчила дишт1ати лих1би … бишт1аси эмх1ела биалли – халати… Илдани лих1би дарсдарили х1едиалли?
               Х1ера, Г1яйша Кьурбановала жузлизибти ник1а геройтани секьяйда саби-алавси дунья, г1яжаибти г1ямру руркъулил:
               Дахъал нагьес дигуси Кавсарат хала нешличил рарх г1ярг1нала дярхълизи арац1иб ва жибх1ячи тамашариуб:
               – Вай, пякьир, х1у гидгарили бух1на сен абац1ибсири? Ягь? Х1ябилра бемх1урлира няслира лебри кьалли…
               Ну дебали харивиахъубра «Дурх1нани бурули саби» бик1уси жузла автор, Г1яйша Кьурбановала творчестволив хатах1ийкнили. Уктемдеш агарси, халарерхни х1****уси ил авторла пагьмули буч1анти г1урра разибирниличи бирхаудира леб.
               Дубурлатани бурули бирар: «Х1урхъла миъ биц1ули г1ергъи, дуц1рум ванати ляркьян. Миъ халаси бац1ибцад ванза рях1матли лукъан. Х1ебла нурливан г1ях1си девлира бишт1аталара халаталара урк1би ванадиру.
               Бурули бирар г1ях1си девли къаркъубира к1ант1идиру или. Дила пикрили, Г1яйша Кьурбановала г1ях1си девли иш бархибси манзиллизиб буч1антала урк1би чуйнара разидиру или.

               Ильяс Х1ясанов, «Лачин» журналла редактор. 2002 дус