Аггей пайгъамбрин китаб
Дарийи паччагьвал ап1урайи кьюдпи йисан, йирхьудпи вазлин садпи йигъан (ихь аьсриз улихьна вуйи 29 август 520 й.) Ягьудияйин аьхюр вуйи, Шеалтиилин бай вуйи Зоровавелиз, ва, Заанурин сарпи гъуллугъчи вуйи,Яхуцадакдин бай вуйи Иешуайиз, Аггей пайгъамбрилантина вуйи – Раббийин гаф.
Гьамци к1ура Къушмарин Аьхюр вуйи Раббийи:
му халкьди,
сабан вахт дар к1ура,
Раббийин хал таза алап1уз.
Хъа Аггей пайгъамбрилантина Раббийин гаф гъабхьнйи:
хъа учвуз вахт вуйин,
му хал дарабгъну дипнади,
ужудар хулариъ яшамиш хьуз?
Гьаддиз магьа гьамци к1ура Къушмарин Аьхьюр вуйи Раббийи:
фикир ап1инай учву ап1урайи ичв ляхнариин.
Учву гизафуб гъубзунчва,
хъа ккадабц1уб адаричв.
Учву ип1урачва,
хъа тухъ шуладарчва.
Учву убхъурачва,
хъа убхъбакан ац1радарчва.
Учву алабхьурачва,
хъа мани шуз, шуладарчвуз.
Учву ляхин ап1урачва,
хъа гъазанмиш гъап1уб
урхъар кайи жибдиз гъябгъюраячв.
Гьамци к1ура Къушмарин Аьхюр вуйи Раббийи:
фикир ап1инай
учву ап1урайи ичв ляхнариин.
Гъарахай дагълариз,
акъинай хамхрар,
дивай хал Узуз ккунибсиб ва хьидизу адлу –
к1ура Раббийи –
Учву гизафубдихъ хъч1арккурчва,
хъа арайиз гъюруб адар.
Хъа учву ичв хулаз гъабхиб,
гьюбхюз гъитунза Узу.
Гьаз? – гьерхра Къушмарин Раббийи. –
Дарабгъну дипнайи Йиз хулан к1уллан.
Учву гьарсар ичв хулан гъайгъушнаът1ан адруган.
Гьаддиз заву деебтдайи учвуз чиг,
жили тувдайи учвуз бегьер.
Узу гьап1унза къур ичв хут1лариинна,
табар-тепйириинна,
ризкьниинна,
т1умут1ниинна,
ччимдиинна,
жилин бегьерниинна,
мал-къарайиинна ва
ичв хиларин жафайиинна.
Шеалтиилин бай Зоровавелиз, Заанурин сарпи гъуллугъчи вуйи, Яхуцадакдин бай Иешуайиз, ва имбу вари халкьдиз чпинур Заанур вуйи Раббийин дих, ва Аггей пайгъамбрин гафар гъеерхьнийи. Гьаз гъапиш Аггей дурарин Заанур вуйи Раббийи гьаънайир вуйи. Ва Раббийихьан дурарик гуч1 кабхънийи.
Раббийихьан гаф гъабхру Аггейи халкьдиз, Раббийихьан вуйи хабар дебккнийи:
Учвухъди хъаза Узу – к1ура Раббийи.
Ва Раббийи Ягьудияйин аьхюр вуйи, Шеалтиилин бай Зоровавелин рюгь, Заанурин сарпи гъуллугъчи вуйи, Яхуцадакдин бай Иешуайин рюгь, ва имбуну халкьдин рюгь хъебгуз гъитнийи. Дурар гъафнийи ва чпин Заанурин Къушмарин Аьхюр вуйи Раббийин дараматдиин лихуз хъюгънийи.
Думу вахт, Дарийи паччагьвал ап1урайи кьюбпи йисандин йирхьубпи вазлин къадна юкьудпи йигъ вуйи. (ихь аьсрин улихьнай вуйи 21 сентябр 520 й.)
Ургудпи вазлин къадна садпи йигъан (ихь аьсриз улихьна вуйи 17 октябр 520 й.) , Аггей пайгъамбриз Раббийин гаф гъабхьнийи.
Ягьудияйин аьхюр вуйи, Шеалтиилин бай Зоровавелиз, Заанурин сарпи гъуллугъчи вуйи, Яхуцадакдин бай Иешуайиз, ва имбу вари халкьдизa йип ва гьерх:
Учвуз шлиз гъябкъюндар му дараматдинт1ан тмунубдин (гъадабгъубнубдин) зурба гьяйбат вуди? Дидик гъилигган мунуб фук1а даруси ачвуз аьхир?
Хъа уву, Зоровавель, мукуцухан, (юк1в макадабт1ан) – к1ура Раббийи. –
Мукуцухан, (юк1в макадабт1ан) Иешуа, Заанурин сарпи гъуллугъчи вуйи, Яхуцадакдин бай.
Мукуцуханай, (юк1в макадабт1анай) уьлкейин вари халкь, – к1ура Раббийи, –
жафа зигай,
Узу хъаза учвухъди, – к1ура Къушмарин Аьхюр вуйи Раббийи. –
Гуч1 мап1анай!
Учву Египетдиан удуч1вруган
Узу учвухъди гъийит1у Йикьрар ва Йиз Рюгь учвухъди хъа.
Магьа фу к1ураш Къушмариин Аьхюр вуйи Раббийи:
Багарихьди Узу хъана завна жил, къураматна гьюлер ккут1урччвидиза.
Узу вари халкьар ккут1урччвидиза,
хъа гъибди мина дурари чпин юк1в хъипнайиб (девлет).
Ва Узу му хал абц1диза адлували – к1ура Къушмарин Аьхюр вуйи Раббийи.
Йиз вуйиз арсна гъизил, – к1ура Къушмарин Аьхюр вуйи Раббийи.
Му хулан адлувал тмунубдинт1ан хьибди зина, – к1ура Къушмарин Аьхюр вуйи Раббийи. – Ва му йишв'ин Узу учвуз дебккдиза ислягьвал (уж'вал) – к1ура Къушмарин Аьхюр вуйи Раббийи.
Урч1вудпи вазлин къадна юкьудпи йигъан, Дарийи паччагьвал ап1урайи кьюдпи йисан (ихь аьсриз улихьна вуйи 18 декабр 520 й.) , Аггей пайгъамбриз Раббийин гаф гъабхьнийи.
Гьамци к1ура Къушмарин Аьхюр вуйи Раббийи:
Заанурин гъуллугъчйирихьан гьерх фу к1ураш Къанундиъ:
Эгер шли униъ ипну йикк (Заануриз бахш дап1найи) гъабхуради гъабшиш
ва думу ун лавшик, хурагнак, чяхрик, ччимдик, ясана жара ип1рубдик кубк1иш,
думу ип1руб гирамиб (Заануриз бахш гъап1у гьисаб вуди) шулин?
– Ваъ, – жаваб туву гъуллугъчйири.
Хъа гьадмуган Аггейи дурариз гъапи:
– эгер сар фуж майтик курк1ну, чиркин гъашиган, гьадму мутмйирикан сабдик курк1иш,
думу курк1убнуб чиркин гъабхьи гьисаб ап1уз шулин?
– Ав, – жаваб туву гъуллугъчйири,– чиркин шулу.
Хъа Аггейи гъапи:
– Ари гьаци ву гьаму Йиз улихь хьайи халкьдихъдира, гьаму наслихъдира, –
к1ура Раббийи. –
Дурари ап1урайиб вари,
дурари хруб вари чиркинуб ву.
К1ваин ап1инай душнамийи йисар,
Раббийин дарамат тикмиш ап1ури ккергъу йисар.
Фици гъягъюри шуйичв ляхнар?
Гадар ап1руган кьаб шишал шидичуз к1урайишваъ,
йиц1убт1ан шуйдайчвуз.
Чяхир кч1ибкьруган хьц1урихьна хьибдичуз к1урушваъ,
къабт1ан шулдайчвуз.
Узу ичв хиларин жафайиин къуру мик1, мишв, мерк илипуйза, – К1ура Раббийи. –
К1ваин ап1инай,
гъийин йигълантина урч1вубпи вазлин къанна юкьудпи йигълантина (18 декабрь), мигъари ккудушу йисар,
Раббийин дараматдин бина ккебгъайихънакьан вуйидар.
Ризкь аминичв танхариъ?
Я т1умт1и, я инжири, я нари, я ччимдин гьари гьамусдиз мейва туври гъабхьунчвуз?
Хъа сарун гьаму йигъхъанмина хъюгъну, Узу учвуз уж'вал дебккдиза.
Вазлин къадна юкьудпи йигъан (18 декабрь) кьюбпи ражари Аггей пайгъамбриз Раббийин гаф гъабхьнийи:
– Ягьудияйин аьхюр вуйи Зоровавелиз йип, Узу завна жил ккут1убччвидиза.
Узу паччгьарин тахтар илдичидиза ва
жара уьлкйирин гьюкуматарин кьувватар ккидирчидиза.
Узу дурарин аьрабйирна фургънар (чархар кайиб вари) ва дурар хъаърудар илдигъидиза,
дахьди дявдин гьяйвнар,
чиб-чпин турарихьан йихиди думу гьяйвнариин шлудар.
Думу йигъан, – к1ура Къушмарин Аьхюр вуйи Раббийи, –
Узу уву ктагъидизаву Йиз лук1, Шеалтиилин бай Зоровавель, – к1ура Раббийи, –
ва увкан Йиз пчат али т1улбан ап1идизавукан.
Фицики Узу вуза уву ктагъур, – к1ура Къушмарин Аьхюр вуйи Раббийи.