Сафуний пайгъамбрин китаб
Ягьудия уьлкейин пачагь, Амундин бай Юсийин вахтари, Хизкийин бай вуйи Амарийин – Гадалийин – Кушийин бай Сафунийиз – Раббийин гаф.
Жилиин алиб вари жварт1 ап1идиза, – к1ура Раббийи, –
инсанар ва гьяйванатар жварт1,
заварин ничхрар ва гьюлерин балугъар жварт1,
улдугуваларна ч1уруб ап1рудар жварт1,
адмийир ап1идиза жилилан жвурат1 – к1ура Раббийи.
Йиз хил алап1идиза Ягьудияйиинна,
Ерусалимдин вари агьлариинна.
Баал аллагьдикан гъубзуб, думу йишвлан ап1идиза жварт1
ччвурра кмиди фалчйирин, гъуллугъчйирра – дурарихъди.
Заварин къушмариз гъуйириин икрам ап1урайидар,
Раббийииндина чпин паччагьдиинди ху ап1рудар,
Раббийихьан гьудуч1вдар, Думу дарагдар ва
Дугъахьна дяргърудар – вари ап1идиза жварт1.
Заанур Раббийин улихь ккебяхъ!
Раббийин Йигъ ву багахь:
Гъурбан ап1ру гъурбанра Дугъу дап1на гьязур
Дих дап1найидарра дап1на марцц.
Раббийин гъурбан ап1ру Йигъан Узу гьудуч1вну гъягъидарза гъитну амрар,
гъитну паччгьарин баяр,
гъитну варидар, алабхьрудар жараринуб палат,
гъитну гурзларилан ергру аьдат ап1рудар,
Раббийин хал абц1ри чпин зулмарина куч1лари.
Думу Йигъан, - к1ура Раббийи, –
«Балугъар» урнарихъ ишбан гьарай абхъди,
ц1ийи шагьриъ ахьди ишбан агьузар,
табар-тепйириин – зурба даргъивалар!
Ибшай шагьрин исикк мягьял,
дарди хьуз жварт1 хьибди ариш-веришчи халкь
ап1ури гьисаб арс деънайидар!
Думу вахтна акв ап1рубра хьади гъюч1вдиза Ерусалимдигъ.
Ктубцуз ккайи чяхир деп1найиси чан к1анаъ дабхънайибдиин,
гьудуч1видарза чпин «хазнайиин» деънайидарин гъалхьантина,
чпин юк1вариъ: «Раббийин ап1руб адар я ужуб, я харжиб» к1урайи.
Хъа дурарин девлетар хьиди хюрчди
хулар, к1уруш, ап1иди асккан-заан.
Дивди чпиз хулар, хъа дурариъ хьидар яшамиш,
кивди т1умт1ин багълар, хъа убхъидар чяхир.
Багахь хьа Раббийин зурба Йигъ! Багахь!
Гъи-закур улубкьура!
Раббийин Йигъандин, магьа, дихра!
Хъа гьадмуган ут1убччвиди ишбан гьарай варит1ан к1убниринра.
Хъял алдабгъру Йигъ хьибди гьадму йигъ
дерднанна бед-бахтвалин йигъ,
йигъ алархьбаринна даргъуваларин,
муч1ушнанна барбат1валин йигъ,
йигъ к1ару кьюкьнан дифарин,
дих ап1бан зурна рабхру йигъ,
женгназ гъудужвру ижми гъалйириз.
дивнайи ягъли ч1вурдариз!
Алархьидиза гьадмуган адмийириин
хъа уьргъну хьиди чпи кур духьнайиси,
Раббийиз удуч1вган чпи къаршу!
Ифи удубзиди кьуришси гьубкьушвариъ
Рудрар-фунар – пейинси.
Уьрхидар дурар Раббийин хъюлан Йигъан, я гъизили я арсну.
Дугъан хъюлан ц1и дибиснади хьибди вари дюнья,
яшамиш шулайидар жилиин Дугъу саб дупну ап1иди терг.
Гьязурди гъузай, хъергай, к1улиъ гъугъ айи халкь,
улупнайи вахт хътубкьайиз,
т1ирхурамиди йигъар нахъвси мик1рахь,
учв’ин улубкьайиз яман хъял Раббийин,
учв’ин улубкьайиз хъял алдабгъру Йигъ Раббийин!
Рабби агай му жиларин гъюдал адмийир,
гъярайидар Дугъан дугъривалиъди!
Абгай дюзвал, абгай хъпехъувал –
белки учвхьан гьудубч1вур Раббийин хъюлан Йигъ!
Газа уьлке хьибди дап1ну тина,
Ашкелондикан гъубзруб хьибдар,
Ашдод йигъан аквнаккди хьибди дибисну,
Экрон хьибди ччиварианмина илдипну!
Язухъу ичв, гьюлихъ хъайи уьлкейин агьлар, керитей халкь!
Раббийин Гаф увуз къаршуди ву Ханаан – филистимлар али уьлке.
Дугъу уву дармадагъин ап1иди, фужк1ара гъидитар!
Хъа гьюлихъ хъайи уьлкейикан хьибди ч1ур,
марччлихънариз сюрйир уьрхру.
Думу йишв хусусиятди хьибди Ягьудайин халкьдикан гъубзу дундин.
Уьрхюри хьиди дурари душваъ чпин мал-къара.
Хъа хябяхъдихъан Ашкелондин хулар илт1ик1иди ахъвариз,
дурариин улуркьиди чпин Заанур, Рабби,
ва бахтлувал дебккди тазат1ан.
Моав элдин Узуз гъеебхьунзуз илипнайи агь
аммонитарин – мелзниин али люкьян
Йиз халкьдиз ушвниан удубзурайи,
чпин йишвар ап1ури яркьу.
Гьаддиз Йиз Уз’инди ап1ураза ху – к1ура къушмарин Раббийи, Израилин Заанури, –
Моавдикан, Содомдикан гъабхьиб, хьибди,
Аммонарикан – Гоморрайиз,
варжина-ругъ ва кьилан ич1ариз ич1и дубхьну илт1ик1иди аьсрариз!
Йиз халкьдикан гъубзу дунди дурар хюрчди дисиди,
Йиз адмийирикан гъузну имбудариз думу хьибди гъурубкьу пай.
Му мици хьибди чпин къурзлувализ дилигну,
къушмарин Раббийин халкьдикан кч1икьузди зивзивар,
дурарин зиин чпи заанди улупбаз.
Гуч1 гьапур хьиди дурариз Рабби,
аллагьар Дугъу жиларилан терг ап1иди,
ва Дугъаз икрам ап1ури хьиди гьарсаб п1ип1наъ вари халкьар, гьарсар чан йишваъ.
Учвура, эфиопар (Кушийиндар), гьахьдичва Дугъан ханжлихь!
Хил гьач1абккиди Дугъу кафарийизди Ассирия ккидипуз,
Ниневия илт1ибк1иди гъюрдариз, дубхьну чакан ич1и чюл.
Душваъ дабхъди мал-къара, гьяйванатар – гьар жюре,
гьудгьудйирина т1ипари йишв адап1ури хьиди дидин гъузу мурхьлариин.
Дурарин дихар ккидирчу улдариъ архьди,
Урар-урч1ар ап1иди гъяц1ал, кедрйин ижми кьуларихьди дабалгнайи.
Магьа фициб шулуш машкврарин шагьур,
саб гъайгъу ктарди кефнаъ айиб,
к1уради гъабхьиб чан к1ваъ: «Магьаза! Сар узут1ан – сарну фужк1ара!»
Хъа гьамус думу дарабгъна, гьяйванатарин дубхьну мугъара.
Гьарсар душвхьан гъярури хъипди ушвт,
гьудуч1види хъап1ну хил.
Пис гьял хьибди чиркин ва пуч дубхьнайи, ч1урувалихъ хъебгнайи шагьрин!
Гъапибдихъ хъпебехъру,
кирчу тахсрар ибак дарап1ру,
Раббийиин уьлбюбюкьру,
чан Заанурихьна багахь даршлу!
Душван амрар – ккерягъюрайи асланар,
Диванчйир – лавландин жанаврарин лиж,
гвач1индиз гъибисубдин тикикьан гъидритру!
Пайгъамбрар дидин – ягь дудубгнайидар, алархьрудар,
Заанурин гъуллугъчйири чиркин ап1уру гирамиб, Къанун ктибтуру жараси.
Аммаки Рабби душваъ ву Дугърир, ап1дар Дугъу нягьякьди.
Гьар гвач1инган Дугъу аквнахьна адабгъура Чан суд, ктруб камк,
хъа гьякьсузариз нач к1уруб айиб дар.
Узу терг ап1ури гъахьунза халкьар,
Гъахьунза даргъури дурарин ч1вурдар,
фужк1ара дяргъруси кючйир дурарин ижикунза,
шагьрар ккидирчунза, сар каскьан имдар.
Узу к1уйза: «узхьант1ан мап1ан гуч1,
ап1ин анжагъ Узу к1уруб»
ичв ужагъар дархьуз ккидирчну,
хъа гьудубч1видийи учвхьан Йиз жаза,
хьибдайи фук1ара кадабт1найиб Узу.
Аммаки дурари чпин ап1руб вари ап1уйи хавхавди.
Гьаддиз Узу гъюрубдиз ккилигай, – к1ура Раббийи, –
хюрч хъипру, бягьсум алап1ру йигъаз.
Йиз суд гьадму хьибдики: халкьар уч дап1ну, паччагьлугъар ктидикьну
дурарилан Йиз хъял алдабгъуб,
Йиз гъизгъинвал улубзуб.
Даршуз жвуван хпир жарарихъди гъахьиган удубч1врубсиб хъюлан Йиз яман ц1а
алабхъиди дюньяйиин вари.
Гьадмуган Узу халкьарин ушвар ап1идиза марцци
Раббийин ччвур дибисну дих ап1бан бадали,
саб хилди Дугъан гъуллугънаъ шлуси.
Куш уьлкейин ярхла нирарин терефарихъан,
Узу ут1уккну гъахьидарира кмиди хиди Узуз багъишар.
Думу йигъан Узу уву беябур хьуз гъитдарзаву,
яв хъпебехъували Узуз къаршуди ап1ури шлу яв ляхнарилантина.
Узу уву марцц ап1идизаву.
Яв арайиан, яв машгьурвалилантина къурзлу гъахьидар идирчидиза.
Ва сарун Йиз гирами дагъдин зиин хъюхъ дазабгну хьидарва.
Хъа Узу увуъ гъибтдиза касиб ва гъюдал халкь,
ччвурнухъан хъич1ихну гъузрудар Раббийин.
Израиликан гъубзу дунди чпи асккан ап1руб ап1идар
куч1ал идипдар,
дурарин ушвниин ч1уруб хьибдар
архаинди ахиди, архаинди ип1иди
сарира дурар инжиг ап1идар.
Шадлу мяълийир ап1ин, Сиондин Риш,
Шадвалин гьарай ип, Израиль!
Вари к1ваан шад йихь ва шадвал хъап1, Ерусалимдин Риш!
Увуз гьадабт1ру жаза Раббийи дебккну.
Гьут1урккну увхьан яв душмнар.
Израилин Паччагь вуйи Рабби сарун увухъди хъа
Бед-бахтваларикан сарун увуз гуч1 ап1уб рубкьдар!
Думу йигъан Ерусалимдиз пиди:
«гуч1 мап1ан, Сион, хилар митирхан!»
Рабби, яв Заанур, сарун увухъди хъа.
Кьудратлу ву Думу, гъалибвал Дугъан хлиъ а.
Шад йихь, Думу увкан шадвали гъадагъна
Дугъан масанвали багъиш ап1ура архаинвал.
Шад ву, увкан мяълийир ап1ура Дугъу.
Ув’ин алабхънайи жазайин гъагъ, дердна-гъам
илдипидизавулан машквран йигъан.
Ва думу вахтна Узу хилар хъиржвдиза
увухъ хъач1арккну гъахьидариз къаршу.
Яв ликудар ап1идиза сагъ,
ап1идиза сат1и ул’ан идитну тина гъап1дар,
хъа ап1ури хьиди дурарин ад,
дурар асккан ап1ури гъахьи жилин вари йишвариъ
дурариз ап1иди гьюрмат.
Думу вахтна Узу хьидиза учву хъади Гъягърур
Думу вахтна Узу хьидиза учву уч Алаърур,
Ва дюньяйин вари халкьари ап1иди ичв адар ва – гьюрмат,
Фицики учв уларихь ичв бахт алап1идиза таза,
к1ура Раббийи!