Дзеля прыгатавання гэткай стравы я б вам параіла, мае гаспадынькі, сабраць госцікаў на які-небудзь тэматычны шабас, напрыклад дзень святой Вальпургіі альбо на худы лад Хэллоўін. Папрасіце сяброў апрануцца суадносна вечарыне, падпаіце іх хораша шампанскімі і кан’ячнымі вырабамі, потым гарлапаньце і зладзьце танцы на сталах і столі; дачакайцеся, калі вялізны гадзіннік у вашай гасцёўні праб’е поўнач і тады, скупіўшыся і збялеўшы, трэба прамовіць важна і велічна:
– А цяпер усім поўны ганабобель!
І шпацыруйце паволі ў варыўню, бярыце трапяткі торцік і нясіце гасцям. Калі вы будзеце яго рэзаць (дзеля гэтага асабіста я займела аграменны жахлівы ножык), адтуль пацячэ чырвонае жэле і пачнуць выпадаць барвова-сінюшныя кавалачкі. Тады абавязкова нехта-падшафэхта гідліва запытаецца:
– Фууу! Што гэта?
– Свежае сочыва! З дурніц і п’яніц-буякоў! Дзісь паспела налавіць. – у гэту хвіліну дапушчальна шырока і брыдка зарагатаць, дэманструючы міндаліны і раскладныя іклы. Калі вы, мае гаспадынькі, несапраўдныя вядзьмаркі і ўпіркі, трэба зляпіць сабе іклы з пластыліну.
Рэцэпцік:
Вазьмі па паўлітры вяршкоў і маслёнкі, маслёнку адразу награвай на вогнішчы ў чопе, а вяршкі кінь на лёд. Загадзя распусці хуткую жэлатыну (пачак) у кроплі халоднай вады.
Цяпер бяры яечныя жаўткі, штукі чатыры, і бей іх з цукрам у пенку, а потым далівай у маслёнку і моцна бей на агні, пакуль не стане густавата. Далей знімай з вогнішча і хутка кідай жэлатыну, яна павінна распусціцца ўся, але не кіпець і не варыцца, таму мяшай старанна. Не спяшайся! Пачакай, пакуль падстыне да тэмпературы свежага пакойніка.
Потым бяры дурніц і п’яніц-буякоў, загадзя перабраных і памытых. Тых дробных і дрэнных міксуй адразу блэндэрам ушчэнт, а прыгаршчу прыгажуноў можна пазаставіць цэленькімі. Памяшай.
Тады ў гэту крывава-сінюшную мязгу дадаеш палову маслёнкава-жэлатынавага крэму. І заліваеш яе ў форму з борцікам. Пачакай, пакуль прыстыне, потым бяры ножык і непераборліва рэж. У разрэзы дадай простага парэчкавага варэння-жэле, дзеля спецэфекту.
Далей бярэш лядаваты посуд і б’еш у ім вяршкі, калі наб’еш дастаткова, дадавай туды паступова і пяшчотна рэшту крэму з маслёнкі. Гэй, працягвай біць! Яно ж адразу застыгне.
Цяпер хутчэй выкладвай белае на чырвона-сіняе і хавай у лядоўню.
Увага! Перад падаваннем страве трэба дзве гадзіны пастаяць у цёплай варыўні, каб трэслася, а не колам стаяла. Перакуліць і зняць борцік. Зверху пасыпаць белай шакаладнай крошкай.
Смачна есці!
Зацемка: ганабобель, дурніцы і п’яніцы-буякі гэта шматлікія назвы галубікі!