Са карванчиди вичин карванда ихьтин къайда тунвай: ада кьуьзуь, азарлу хьана хкатай деведин чкадал кьабулзавай гьар ц1ийи жегьил деве, карвандин кьулухъай кутазвай. Гьавиляй пара тежриба авай, яш хьанвай девеяр карванда вилик жезвай, т1имил тежриба авай жегьилбур абурун гуьгъуьна, кьулухъай. Карванчиди вичи лагьайт1а, вилик квай, виридалайни еке тежриба авай деведал акьахна карван къумлухрай, дерейрай, дагъларай тухудай. Яшар жердавай карванчидиз деведал акьахиз четин жезвай. Ада лам къачуна, карвандин виликай кут1унна, вичин пеше давамарна. Вахтар фена, карванчи лап кьуьзуь хьана, са гафуналди, муькуь дуьньядиз физ мукьва хьана. Карванчи, вичиз авай эменни тир – карвандавай девейривай гьалалвал къачуз атана. Эвелдай ам карвандин гуьгъуьнал алай лап жегьил деведин патав атана, адаз лагьана: «Чан деве, зун вахъ галаз таниш яз пара вахт тушт1ани, вун закай инжиклу хьайи чка ават1а лагь, дуьз хъижер к1валах ят1а, чна дуьз хъийин, тахьайт1а белки вуна заз багъиш хъийин…» «Ваъ лагьана деведи, вун хъсан карванчи тир, зун валай пара рази я! Жуваз гуж гумир!» Гьа ик1, карванчи са – са деведивай гьалал къачуз, эхирдай виридалай тежриба авай, яш гзаф хьанвай деведин кьилив атана. Деве карванчидиз килигна, бейкеф ванцелди лагьана: «Вири крар хъсан тир, амма завай ваз са кар сак1ани багъиш ийиз жезвач!» «Вуч кар я?» - лагьана карванчиди, рик1ик къалабулух кваз. «Вуна зун ва чи карван вири ламран тумунал кут1унна.Ам гьич чаз кутугай к1алах хьанач…» - жаваб гана деведи…