Кюн барады кюнбатханнга нюрюн джая,
Джерайыкъны тюрлендире, сабыр тая,
Бир кюн энтда джарыкъ берди, турду, ётдю,
Кюн узуну болгъан затны алды, кетди.
Ёмюрюмден энтда бир кюн кетиб бара,
Сериуюн бла джуукълаша ашхам - къара,
Озгъан джылла акъылыма келедиле,
Бир тюрлю хал джюрегиме бередиле.
Адам тёнгек оналтыда чагъыучанды,
Акъылы уа эллиледе къатыучанды,
Бу айрылыкъ адамгъа кюч джетдиреди,
Алам шартха соруула да этдиреди.
Оналтыда тёнгек - кючлю, акъыл - ёзсюз,
Эллиде уа акъыл - бишген, тёнгек - кючсюз,
Бизге быллай къаты сынау нек салынды,
Акъыл, тёнгек бир болур онг нек алынды?
Муну былай нек болгъанын билелмейин,
Бу дунияны магъанасын чёзелмейин,
Тёлю-тёлю келиб, джашаб, кетиученбиз,
Ахыр кюнде, кете, ажым этиученбиз.
Бу кюн менден энди къайтмаз болуб кетди,
Арабызгъа ёталмазлыкъ чекни чертди,
Не этсем да энди анга къайталмазма,
Этилмейин къалгъан ишни эталмазма.
Адам ёмюр къысха джарыкъ, къысха къуанч...
Джашауубуз - джан алдауду, кёзбау джубанч...
Къарангыдан къарангыгъа - джолчулабыз,
Бу дунияны джарыгъындан хаухчулабыз.
Кюн барады къызылы бла кёкню къыя,
Келген ашхам аны нюрюн сансыз тыя...
Энтда бир кюн джашауумдан тайды, кетди,
Сагъыш салыб, джюрегими мугур этди.
2018.Краснодар.