Акъыл бла Сезим бу кече - дауда,
Эки къаджауча этелле къаугъа,
Акъылма - дединг, мени байладынг,
Кесинг а, таймай, терс джол сайладынг,
Джюрек джылыуну мен джоялмадым,
Хар абыннганнга джараялмадым,
Акъылма - дейсе, айт не зат этдинг,
Мени бастырыб нелеге джетдинг?-
Деб Сезим дауун къызыулашдыра,
Акъыл да турду сёз джарашдыра,
Сора Сезимге - сабыр бол - деди,
Сен бош терслейсе, таймайын, мени,
Бизни заманда сезим бла джашау
Болмазлыкъ болду! Дуния - къаджау
Джюрек айтханны этейим десенг,
Кърал тёрелени къыяулу кёрсенг.
Бизни заманда суукълукъ - шартды,
Тёреге кёре, хар къара - акъды,
Иблис джолунда барабыз, алан,
Инсан джюреги болгъанды къаран,
Сен да сезим - деб хахай этесе,
Мени терс этиб бетге битесе,
Сезимли адам сыйсыз болгъанды,
Джаныуар кёллю ёрге тургъанды,
Назикджюрекге "телиди" дейле,
Халалдан алыб, артдан кюлелле,
Тойгъан къутуруб, ачны билмейди,
Тайгъанны тартыб тик тиремейди,
Санга салмасам заманны шартын,
"Тели халалгъа" чыгъар эд атынг.
Адам сезим бла Адам болгъан эд,
Джаныуар халдан алай чыкъгъан эд,
Алай бу ёмюр артха тартханды -
Ырнык джашаугъа кесин атханды,
Джаныуар хали адет этилди,
Инсанлыкъ деген тюбден кесилди,
Ким билир, къачан джанланыр энди,
Бусагъатда уа ол бизден кенгди.
Сен кёл къалдырма ёмюр джолдашым,
Ичими билген ёмюр сырдашым,
Заман - бёрюдю, биз уу мал болдукъ,
Мен -сагъыш, сен да сезиуден толдукъ,
Тауну таяныб аудуралмазса -
Заманны джолун бурдуралмазса...
Биз экибизге бу ёмюр джетди,
Сезим бла джашау къайтмаздан кетди,
Кесинги манга джау этме, къарнаш,
Къыйын заманда болгъанбыз джолдаш,
Заманнга кёре аякъ алайыкъ,
Хазыр сокъмакъгъа аякъ салайыкъ,
Быллай заманда сезим чакъмайды,
Джюрек джылыуун кенге чачмайды.
Мен да сюе эм сени бла болсам,
Сен джайгъан нюрден юлюш алалсам,
Бюсюреу сёзден къулагъым къанса,
Ашхы тилекден джюрегим джанса,
Алай бу ёмюр - сезимсизликди,
Бу гурушханг да - керексизликди -
Деб Акъыл, мыдах, мыйыгъа тайды,
Сезим чулгъаныб джюрекни къайды,
Ахсыныу келди, кёкрекни джыра,
Арыкъ муратны тиреуюн къыра,
Бетге мыдахлыкъ суратын салды,
Суукъ кече да тынгнгыны алды.
2019.