Къарт кестане бутакъларын терезеге таяндырыб,
Манга сагъыш этдиреди оюмуму айландырыб,
Эскериуле келедиле, акъылымда чауул къура,
Кёз аллымда, унутулмай, эски джаула, зарла тура.
Къар джауады къаралгъанны барын бирча агъартханлай,
Къыш келтирген ариулукъгъа джанлыланы сагъайтханлай,
Эски юйле, къар тюбюнде, джангылача кёрюнелле,
Джалан тургъан терекле да акъ джабыугъа бёленелле.
Къабба–къара джюреклеге бу чыммакълыкъ джетелирми?
Зарлыкъ, итлик, уру, алдау ичленинден кетелирми?
Боларырмы «тоба» дерик къолларында къан ыз болгъан?
Уялырмы кирлигинден хакъ ашагъан, тузакъ салгъан?
Джауум – джегим бир агъарса бу акъ къаргъа кёзюн ачыб,
Джюрегине бир нюр урса, ичиндеги мортун чачыб!..
Эски терек, кюлген кибик, къакъгъан джелден къалтырайды,
Акъылым да, болмаз затны, мыдахланыб ангылайды.
Къарт кестане бутакъларын терезеге таяндырыб,
Манга сагъыш этдиреди оюмуму айландырыб,
Эскериуле келедиле, акъылымда чауул къура,
Кёз аллымда, унутулмай, эски джаула, зарла тура.
2018.
Кестане терек-каштан терек.