Айтыугъа кёре, бизледен алгъа Джерде Ат Къауум
джашау этгенди,
Ол къауум озуб, таймайын терсден, аманлыкъ джары
кесин элтгенди,
Питна, зийна бла, уруш, ёлюм бла ол бир - бирине
заран салгъанды,
Бир - бирин кёрюб болмау дегенден уллу юлюшюн
эркин алгъанды.
Аламны тотур базман тенглемин бузаргъа тамам
джетгенлеринде,
Башха болмайын джаныуар халгъа бузмайын тамам
келгенлеринде
Джаратхан кёрюб къауумну халын, къурутур ючюн
буйрукъ бергенди,
Джер да аладан къутулуб, дейди, чагъын джангыртыб,
кёкрек кергенди.
Бу къая къушу, эскертме болуб, ол заманладан
къалгъан болурму?
Джаратылышны джорукъларына къаршчы баргъанла
джашаб турурму?
Биз да алача, къан тёгюу джолда, питна, итликде
алгъа кетгенбиз,
Онгсузну эзиу, ётюрюк айтыу, кюч кёргюзтюуню
адет этгенбиз.
Къыргъый къуш ташдан хыны кёз бла, бизни табагъа
суукъ къарайды,
Джангы умметле, сизмисиз? - дерча, таш кёзлери бла
Джерни тарайды,
Къалубалада болгъан затладан дерс алыр заман
келген болурму?
Сагъыш этмесек Адам улусу бу Джерде, дайым,
джашау къурурму?
sofi tram-semen
2019.