Къаяда ёсген терек -
Ётгюр урлукъдан - ёзек,
Таш къадаманы къыра,
Кесине джол-ыз джыра,
Битерге джанын атыб,
Ёзегин ташдан тартыб,
Тардан чыкъгъанды кенге -
Аны ёсдюрюр кюннге,
Ёргеден кёбню кёре,
Турады мурат бере,
Джигитлик энни салыб,
Ташдан ашауун алыб,
Къарагъан сейир бола,
Андан джашар кюч ала.
Къая ауурлукъ салыб,
Тамырны дамын алыб,
Тамалын къынгыр этиб,
Сыдырыб, ызла чертиб,
Кёб инджитсе да аны,
Кёб таралса да джаны,
Чегет тартса да кёлюн,
Бузмайын туруу эбин,
Ёсюу тёресин бузмай,
Бутагъы, чагъы азмай,
Таш юзюлсе да, эзиб,
Терек турады тёзюб,
Къара къаягъа битиб,
Къадарын къадар этиб.
Халы бла юлгю болгъан,
Тирелиб тёрню алгъан,
Чыдамлы, батыр терек -
Кеси-кесине - билек,
Турады бутакъ кериб,
Къаягъа къуат бериб,
Чапракъдан юсю толуб,
Илячин къонар болуб,
Булутха булчукъ тарта,
Чыкъ тюше тангы ата,
Джел бла ушакъ эте,
Шыбырты кенге кете,
Бутакъ силкиую, гюрча,
Бу терек деудю, дерча.
Онгусунады къая,
Терек, бутагъын джая,
Аны сериуюн этсе,
Алай кёлюне джетсе,
Басыб тургъанын юзмей,
Тарлыкъ этгенин сезмей,
Мен ёсдюргенме-дерча,
Бюсюреу-спас излерча.
Терек да турад чагъыб,
Чакъгъаны тюбге агъыб,
Гюнах салмайын анга,
Бек кёб тийсе да джаннга.
Къаяды туугъан джери,
Къайры кеталсын кери?
Къаяда ёсген терек -
Ётгюр урлукъдан - ёзек,
Таш къадаманы къыра,
Кесине джол-ыз джыра,
Битерге джанын атыб,
Ёзегин ташдан тартыб,
Тардан чыкъгъанды кенге -
Аны ёсдюрюр кюннге,
Ёргеден кёбню кёре,
Турады мурат бере,
Джигитлик энни салыб,
Ташдан ашауун алыб,
Къарагъан сейир бола,
Андан джашар кюч ала.
Sofi Tram-Semen
2019.
Ростов-на-Дону