НАР ВА НУР
(Ихтилат)
Зав. Ваз.
Рубас. Багъ. Нар.
Чвул. Ул.
Рушвул.
***
…
– Яв ул фтиз либгура, Нур?
– Завуз!
– Завуъ фу рябкъюравуз?
– Ваз!
– Вазлин нурар…
– ...арсрансдар!
– Узу увхьан фицдар шулу к1ури гьерхрадарза. Вазлин нурар…
– ...диф гъяйи йигъсдар!
– Узу увхьан, фтихъна гъушдар ву к1урира… Вазлин нурар шулу…
– Дярякърудар!
– Дярякъруган гьаму яв улхьансина т1агърудиси гъябгъюрайи Рубасдиин алидар фйиру?
– Дурар нурар дар!
– Хъа фйиру?
– Вазлин отрожение!
– Гьа, ибшри! Уву наан ава?
– Багъдиъ!
– Багъдиъ фтин гъвалахъ хъава?
– Нарин!
– Фици нарин? Нирин!
– Эээгь, дийигъ, дийигъ, Бег! Узу увуз – нирин, хъа узу узуз нарин гъвалахъ хъаза.
– Дици фици, Нур?
– Гьаци, Бег! Яв фикир жара терефназди дубшна, йиз фикир – жара. Гьаци вуйиган увура дюз вува – узура. Хъа ихь кьюрикан фунурин дюзвал зина ву?
– Йизуб!
– Даршул – йизуб! Гьюжатар ап1ури дийигъидархьа, дустижви. Узу нирихъ гьаз хъа к1урава?
– Ниркан шид архназди деебтну ккунду, нарихъ хъубзбан бадали. Хъа уву нарихъ гьаз хъаза к1урава?
– Нар ккунди азуз ип1уз! Гъюдубт1уз! Уьрубнубсиб! Гьялнаан гъябгъюрайибнуб дут1убк1ну!
– Агьа, дуст кас Нур, лавлан вуди думу нар уьруб вуди фици рябкъюравуз?
– Вазлин нурарихь, Бег!
– Дярякъру нурари нар рябкъюри ап1урин, Нур? Белки завук кайиб нар вушул!
– Дици фици?
– Нир’ин алиб вазлин отрожение вуйиган, му кюликк ккебхнайибра завуъ айи нарин отрожение ву, яв теорияйиинди.
– Узу муурган, Бег! Гьурк1ну ухьуз материаларин свойствйир аьгъдрувалиан ухьу чиб чпин гъавриъ адрахъруси ахьа. Эгер уву мидиз нарин отрожение ву к1ураш, Рубасдиин али ваз увуз ибшри, завуъ айи нар Нуриз ибшри!
– Вуяян?!
– Тямягькар!
– Ибшри, я НУР! Ихьдари к1уруганси, дуфнайи хялижвиву ккун гъап1уб вари тув дупна. Ляхлаанмина Рушвулна дуфнайи йиз дустраз узу, чан ул хъайи нар гьяйиф ап1урайин? Ваъ, ваваллагьи вазра гьяйиф дариз ул хъади хьурухъанмина! Хъа ляхлаариз мак1ан Рушвларин Бег адми дайи дупну…
– Ваз ккундариз. Дидихъ варидарин ул хъа!
– Ул хъайиган дидкан варидариз кубк1рира ву. Ма нар, Нур! Мидканра ичв гъулаъ айи вари йирхьудваржна йиц1ишубуриз кубк1дияв!
– Фици дици?
– Хъа гьамци: ихь абйири, нариъ айи удраркьан бахтар ишричвуз, к1ури шулу. Гьадму кьадар ужувлар а Гирами Бик1бариъра. Гьациган, гъулаз гъушган, ичв гъулаъ гьарсариз саб уж’вал тувдива!
– Яни гьардиз саб удар тув к1урава сарун?
– Аьйиб ап1ру гафар мап1ан, Нур. Нар хьади кючейиъ уч1видарва гьариз саб туври, гъавриъ ахъ узу к1урайибдин…
– Гьаму Рушвул жвиваз нариъ 613 гил айиб наънан аьгъя, ячви? Узу 613 уж’вал ич гъуландариз фици ап1уза?
– Заву, вазли, Рубасди, чвлу, багъди, нарари, уччву улари ва Рушвлари фици ап1уру, дарши Нур? Отрожение аьгъяди умножение гьаз аьгъдарвуз!
– Агь, Бег, чист биябур гъап1ваки узу, сабан яв багъдиз гъафну к1ури!
– Багъ йизуб дар. Багъ ихь абйирнуб ву. Гьациган, багъдиз гъюруриз абйирин тарихра аьгъяди ккунду, нур ктрубк1у Нур!
– Бег дарши Бег, саб биц1иди, уву к1урайиб к1улиъ убч1врайиси вузуз… Баркаллагь бализ, абйириз ва рубасдихъ хъайи швуршвлар айи рушвлариз!
– Ич швуршвлариин бахил духьнана, ляхла жви…
– Бахил даршулин швуршвларкьан нарар айидариин! Ва саб нар, ма Нур, дупну тувайиз изи-мизи адабгъурайидариин!
– "Изи-мизи" дар думу! Дурар дарсар ву ккудушу ва гъюз ккимбу...
...
***
Зав. Ваз. Рубас.
Багъ. Нар. Чвул.
Нур. Ул. Рушвул.
Сагъул!