МАНАТ
(Ихтилат)
Гъибихъзуз манат гъюрайириз кьюд агъзурна къадпи йисариз.
Гъушунза хьади тукандиз, кудут1найир шадну, шид гъубхъурси галариъ ляхнариъ.
Ча, гъапунза, узуз шекер кила хьуб-йирхьуб.
– Уву наана дуфнава, хялижв?
– Наана шул? – ихь тукандиз.
– Саб к1уруб: гьап1ру ихь!? Му ич вуйич! Кьюб к1урубсана: мидиз к1урдар тукан.
– Хъа фу к1уру?
– Маркет! Супер–Мини!
– Мурар фу к1уру гафар ву?
– Мурар? – ич магазин вуйиган.
– Гьап1ру ичв магазин? Учву кент-худйир вунучва?
– Кент-худйир?..
– Кент-худйир: халкь алдатмиш ап1урайи душмнар! Дурарин гьюкум учу ухдихъанмина ккидипнача.
– Дурарин гьюкум фициб вуйи?
– Дурарин: «йиз», «ич», сарун саризра ктруб, вуйи.
– Хъа дидин ерина фициб гьюкум гъабхьну?
– Дидин ерина: «ихь» «халкьдинуб», варидарин сат1лануб, варидариз варибдикан кубк1руб!
– Дици фици? Гьациб гьюкум шулин: варидариз кайиб?! Варидариз кайиб ригъна вазт1ан дар!
– Агь кент-худйир, ригъдинна вазлин учвхьан эйвал ап1уз шуйиш, гьадрариканра адмийириз кубк1уз гъидритрийчва. Йиз шекеркьана ча гьамдиз. Ва – чайра.
– Манатдихъ фу гъюрвуз-хъа: килбтин саб т1ул!
– ...
Мици хай шулдар, к1ураза дустар, эгер му заманайиъ: "йизна" "ич" к1урайишваъ, дустар гъузну амиш!
Узу йиз кьяляхъ хътакидиза, ихь вахтариз, юлдшар, гъюрайидариз минди мягъян пуз. Гьай шлиз аьгъя-хъа гъафидарикан фужар чпин зегьметниинди лихури гъузруш, фужар, жарадарин жафйирикан ксиб ктабгъури хъюгъруш.
Т1арашчйирин гьюкмарна закнар гьацдар ву к1ури, жвуван намус масу туврударикан гьап1дива-хъа, гирами уву, ва, узу...