Дешхьалхе
Абубакаран Хасмохьмадан к1анта Зайндис (вина1947 шарахь, 22 мартехь-кхелхина 30 августехь,оршот-буса,2018 ) х1ара назманаш гулъеш, д1аязйина 1961-1981 шерашкахь.
Х1ета,луьрачу, дин дихкинчу заманахь ,тхо кегий бераш долуш,дас г1ийлачу узамца йоьшура х1окху ширачу тептар т1ехь ша берахь дуьйна гулйина назманаш.
Х1ара назманаш цуо араяха сатуьйсу,амма аьтто боцуш, дуккха а шераш д1адевлира. 2003 шарахь тхан дена кхаъ а хуьлуш,араделира Джанаралиевн 1имранан (Дала декъала войла иза) «Назманаш» ц1е йолу жайна.1имрана куьг а язйина дахьийтира соьга иза дена.Ша г1одийр ду а элира суна ден назманаш т1ехь редакци еш…И назмаш со гайта ца ларош,1имран а д1акхелхира…
Ма-хуьллу кхечу жайнашкахь зорбане ялаза йолу назма харжа хьаьжна со ден тишачу тептар т1ера, кхарах дена Зайндина мел-йал хиларе са туьйсу,иштта нохчийн къоманна пайдехь хиларе дог а дог1у… Хетарехь, сан поэзин новкъа ялар оцу назманийн т1е1аткъамца хилла.
Халкъан мукъамаша,назманаша динца йолу уьйр латто а,халонашна сатоха ницкъ белла вайн къоманна дахаран халчу киртигашкахь.
Дала т1аьхье беркате йойла х1окху назманийн а…
Назманаш тхан дас Котар-юьртарчу шен Ненан Вешера Исмаилов 1елера а,иштта Деден Хасмохьмадан вежаршкара 1аброхьманера а,Увайсера (Дала декъала бойла уьш)схьаязйина яра.
Х1ета, 1961 шарахь, г1ийла богучу мехкан даьтта чудуттучу чиркхан серлонехь схьаязйина х1ара назманаш шайна т1ехь цхьацца г1алаташ доцуш яцара.Жимма куьг а тоьхна,зорбане йог1у аса х1орш цкъа хьалха х1окху интернет-г1ирсашкахула.
Рабби1уль-Авваль,1439 (Зуль-Каада,1439)
Пет1мат Абубакарова
Валар диц ма де , валаро хьо виц вийр вац.
Я Динал-Ислам
Х1ай Дела,ц1ена дин ма г1оьнча вац хьан ,
Хьо тодеш,хьо кхиош да-нана дац хьан,
Хьоьца сакъералуш доттаг1ий бац хьан,
Ма байлахь диси хьо, йа динал Ислам.
Дег1 доцуш ц1е ю хьан, дуьненахь йоккхуш,
Хьан нуьран дег1 лоьхуш, орца дац доккхуш,
Хьо сийсаз диначех бехк ма бац боккхуш,
Ма байлахь диси хьо, йа динал Ислам.
Делан шен Къуръан ду, Шен дагахь доьшуш,
Къуръанца х1оттийна шар1 лаьттахь оьшуш,
Шо шаре мел дели дин лаьтта г1еллуш,
Фасикъ нах дебна-кха , йа динал Ислам.
Мох лакха ша болу, динан сий дайна,
Мох лаха ша болу дуьненца тайна,
Дег1ана там лоьхуш, масане зен вайна ,
Ма байлахь диси хьо, йа динал Ислам.
Масане да-нана дуьнено дийна,
Масане ши доттаг1,1ехавеш, вийна.
Йиш-ваша хададеш, марзо хадийна,
Халкъ 1ехадели-кха , йа динал Ислам.
Дуьненан марзо ю, д1овш шеха тоьхна,
Шех воккхавийнариг цуо аркъал тоьхна,
Масане тоба ю дуьненахь йоьхна,
Халкъ 1еха дели-кха , йа динал Ислам.
Дуьне а , Эхарт а кхоьллина Дала,
Дуьне т1ех дезнариш Эхартах бевлла.
Динна букъ тоьхнариш дакъаза бевлла,
Халкъ 1еха дели-кха , йа динал Ислам.
Делаца дог доцуш, багахь ц1е йохуш,
Элчане некъ тесна, ва Элча бохуш,
Делан ше дикане багахь дог дохуш,
1еса нах дебна-кха ,йа динал Ислам.
Дешна нах бара-кха динан дай х1уьттуш,
Хьехаман 1асанаш лергаш чу 1уьттуш,
Набараш кхетта нах шаьш хьала г1иттош.
Х1инца-м шаьш бисина, йа динал Ислам.
Дин хир ду цхьаьна дийнахь, шен тоба ларъеш,
Ша лар мел динчунна сов сирла нур деш.
Ша лар ца динчунна, т1ех 1аьржа нур деш,
Ма нийса де ду иза , йа динал Ислам.
Ма сийлахь ву динан ох1ла
Делан динна накъост хилла,
Элчан дашца нийса хилла,
Зах1иран нур шена делла,
Ма сийлахь ву 1илман ох1ла.
Иманан малх шеца болуш,
1илманан х1орд мелла волуш,
Бакъонан тур буйнахь долуш,
Ма сийлахь ву-кх 1илман ох1ла.
Ислам дендар Деле доьхуш,
Сийлахь Элча дукха везаш,
Шен Устазе кхойкхуш, воьлхуш,
Ма сийлахь ву 1илман ох1ла.
Майра байракх хьалха лаьцна,
Шен хьекъалах беркат эцна,
Шен маттаца вай 1амийна,
Ма сийлахь ву 1илман ох1ла.
Хьехаман таж шегахь йолуш,
Бакъхьехаман таж и йолуш,
Шаьш ийг1инарш берта балош,
Ма сийлахь ву 1илман ох1ла.
Дала бохург вайна далхош,
Талмаж хилла вай кхетадеш,
Ша тиллариг метта валош,
Ма сийлахь ву 1илман ох1ла.
Б1арз веллариг шар1е ийзош,
Къарвеллариг сама вог1уш,
Толкха вериг дашца нисвеш,
Ма сийлахь ву 1илман ох1ла.
Валар къахьо хир ю бохуш,
Эхарта некъ карла бохуш,
Деле верза кечло бохуш,
Ма сийлахь ву 1илман ох1ла.
1елам вериг хасто веза.
Цуьнан куьцаш дийца деза,
Везаш пайда эца беза,
Ма сийлахь ву 1илман ох1ла.
Вовшийн хьахош дийца г1ерташ,
Дакъаза бойла г1ийбат дийриш,
1еха белла дуьне дезарш,
Ца везнариш 1илман ох1ла.
Масаний паччахь ву…
Масаний паччахь ву
хиларо 1ехийна,
ва шолг1а цул т1аьхьа
валаро хадийна.
Валар ду массарна,
къен-миска вуьтур вац.
Дохнан да ву аьлла
1ожалло вуьтур вац.
Долу г1а ва санна,
Вежарий кхуьур бу,
Дужу г1а ва санна,
Уьш нилха ма бийр бу.
Элаца некх санна,
Доьзалаш кхуьур бу,
Эла вела некх санна,
Шолг1а уьш бухур бу.
Валар ду массарна,
Цхьа Аллах1 воцчунна,
Валар ма дицделаш,
Цуо шу а дицдийр дац.
Дег1астанан Эвлаяаш
Ойлаяий эла хилла,
Асхьабийн паччахь хилла.
Асхьабийн корта хилла,
Абу -молла д1авели.
Зах1ир -1илман татол хилла,
Ислам -1илман пардо хилла.
Далла гергахь пардо хилла.
Элаха- молла д1авели.
Далла везаш, Дела везаш,
Дела дуьхьа хало эцна,
Уммат нисдеш, чехка хьийзаш,
Хьаьжа Ахьмад д1авели.
Деле кхойкхуш, воьлхуш волуш,
Баланашца шен дег1 1уьйдуш,
Шен муридаш Деле боьхуш,
Г1ийла Апти д1авели.
Делан динна г1оьнча хилла,
Ц1енчу новкъа г1азот хилла,
Керстанах ша леташ хилла
Майра Деда д1а ма вели
Бакъонан тур дихкина хилла,
Элаллин таж тиллина хила,
Далла гергахь веза хилла,
Шайх Борг1ани д1а вели.
Шари1атан малх ша хилла,
Т1арикъатан нур ша хилла,
Х1ара Дег1аста байлахь юьтуш,
Ахьмад-дукъа д1а вели.
Ша бе хьехам хаза хилла,
Муридий дагчу хьоьжуш хилла,
Муридий г1иллакх девзаш хилла,
Ахьмад-хьаьжа д1а вели.
Шари1атан б1ог1ам хилла,
Т1арикъатан дог1а хилла,
Хьакъихьатан нийсо хилла
1усман- хьаьжа д1а вели.
Бакъонан некъ бойзуш хилла ,
Нийсачу новкъа к1орге ваьлла,
Махках ваьлла, г1ийла лелла,
Юсуп -хьаьжа д1а вели.
Массо метте шен ц1е хезна,
Шена бусулба нах дукхабезна,
Х1ара Дег1аста шена йоьлхуш,
Хьаьжа Кунта махках вели.
Шен 1илманехь нийса хилла,
Делан некъана ша чу ваьлла,
Шен муридаш байлахь буьтуш,
Г1ийла Докка д1а ма вели.
Вайн Дала вазвира хьо, йа Расулаллох1
Шен букът1ехь хьо вича , Латтанаш курдевлла,
Стигланаш эшийна шаьш лекха дойла,
Сийдолу Муххьаммад шен букъ т1ехь ву аьлла,
Вайн Дала вазвира хьо, йа Расулаллох1.
Вайн Дала бакъмух1ар хьайн букъ т1е диллина,
Дала шен 1аламаш хьо вазван кхоьллина,
Шен халкъал ши эзар хьалха кхоьллина,
Вайн Дала вазвира хьо, йа Расулалох1.
Шена чу хьо веъча х1ара дуьне хазделла,
Дакъделла латтанаш ,буцяьлла ,сенделла,
Хурманий хьаннаш т1ехь г1ан патар дукъделла,
Вайн Дала вазвира хьо, йа Расулоллах1.
Хьо Элча ша вина Аминат язъелла,
Хьо вакхийна Хьулимат декъала хилла,
Хьо Элча хиларна 1аламат совдаьлла,
Вайн Дала вазвира хьо, я Расулаллох1.
Хьо кхиъча, маликаш хьуна т1едаьхкина,
Вай Делан омрица хьан накха бат1ийна,
Кийрара са эцна, дилха дог датийна.
Вайн Дала вазвира хьо, йа Расулаллох1.
Ялсманин шовданца ц1ена дог дилина,
Шайт1ан хьаг1 д1айоккхуш, 1илма чу диллина,
Некхан чов ерзийна, дог духа диллина
Вайн Дала вазвира хьо, йа Расулаллох1.
Нур долу Мединат машарца яьккхина,
Сийдолу и Макка хьайн туьрца яьккхина,
И сирла Хьаьжи-ц1а хьайн дола даьккхина,
Вайн Дала вазвира хьо, йа Расулаллох1.
Хьо везаш лойла тхо, йа Расулаллох1
Хаьттинчух бакъонца г1уллакхах хьо кхетча,
Г1азотан ч1аг1амаш хьо бина ваьлча,
Дуьненчохь дин кхайкхо хьо араваьлча,
Дуьненахь висира хьо, йа Расулаллох1.
Иманан ва мух1ар хьайн дагна та1ийча,
Иманан г1иллакхаш хьайн синна 1амийча,
Малхбале,малхбузе шари1ат даржина,
Х1ара дуьне хазди ахь, йа Расуллаллох1.
Мостаг1ийн дукхаллин ахь ойла йича,
Хьайн майра накъостий ойланах боьхча,
Делера кхаъ бахьаш Джабраил деъча,
Дог парг1ат хилира хьан , йа Расулаллох1.
Дуьненан кхачанех шайн дог1маш хадийна,
Вайн Дела везаро кийранаш бузийна,
Вайн Делан омранна шаьш муьт1ахь ва хилла ,
Мел хаза лийлира шу, йа Расулаллох1.
Вайн Дала хаьржи хьо, халкъалахь сийдина,
Вайн Делан г1уллакхаш хьайна т1елаьцна,
Джабраил-маликан некъ хьайца х1оьттина,
Мел хаза лийлира хьо, йа Расулаллох1.
Г1азотан бакъонаш хьайгара елла,
Хьайн майра накъостий хьайца болуш,
И Делан мостаг1ий шаьш бухабетташ,
Мел хаза лийлира хьо, йа Расулаллох1,
Вай Дала кхоьллира хьо Аввалел а хьалхе,
Дуьненчу велира хьо Ахирел т1аьхьа,
Т1аьхьарчу умматтах къинхетам барна,
Къинхетам бойла хьох , йа Расулаллох1.
Т1аьхьарчу умматан ахь ойла йича,
Хьайн уммат далхийна асхьабаш билхича,
Вайн Дала жоп делира хьуна,
Къинхетам бойла хьох, йа Расулаллох1,
Хьо везар сов даьлча, хьехавар совдуьйлу,
Хьехавар сов даьлча, тхан б1аьргех хи дуьйлу,
Б1аьргех хи даьлча, тхан дегнаш доьлху,
Хьо везаш лойла тхо, я Расулаллох1.
7.04.1981
Къинхетам бехьа,тхан Дела
Дезаш валар ца дог1у,
Ведча цунах ца волу,
И атта дар дехий вай,
Вайн Деле -АР-Рохьману.
Зунубух1у дукха ю ,
Лахьтий къобру готта ю
И шортта дар дехий вай,
Вайн Деле- Ар-Рохьману,
Мункур, Некар дохур ду,
Шайн хаттамаш кечбина,
Вай кечдина жоп ма дац,
1ехийна вай Дуньяно.
Вайн 1амалаш к1еззиг ю,
Эхарт зама еха ю,
Цигахь оьшург бахам бац.
Тилийна вай дуньяно.
Дуьненан мор баржийна,
Цунах кхиа г1иртина,
Цунна т1аьхьа ца кхиъна,
Вай дай-наной д1аихна.
Ма хьийса вай вежарий,
Кху дуьненан толаме,
Кхуьнан толам хаьржинарг
Веса коша вирзина.
Ваьшна лууш вай делахь
Лерам ваьшна Делера,
Лера деза вай вовшийн,
Хьаьг1нех дегнаш ц1андина.
Ваьшна дезаш вай делахь ,
Дехар ваьшна Делера,
Делха деза вай цуьнга,
Динца 1амал тойина.
Веза Дела Аллах1 ву ,
Вай дехнариг луш ма ву,
Гечдар деха вай цуьнга,
Асхьабу вал их1вану.
Везан Дела аьлла ву ,
Дог ма дилла 1ибадех,
Деха деза вай Цуьнга ,
Динна т1ехь вай нисдалар.
Везан Дела гечдеш ву,
Гечдар деха вай Цуьнга,
Йа Аллах1 , Йа Г1уфрану,
Нисде Элчан некъа т1ехь.
Тхо кхойкху Хьоь, тхан Дела,
Тхо доьлху Хьоь,тхан Дела,
Хазахь ,Дела, тхан делхар,
Аллах1-Аллах1, йа Рохьийм.
Тхо кхойкху Хьоь, тхан Дела,
Тхо доьлху Хьоь ,тхан Дела,
Хьажахь ,Аллах1, тхан балхе
Аллах1, Аллах1,тхан Дела!
Тхо кхойкху Хьоь, тхан Дела,
Тхо доьлху Хьоь, тхан Дела,
Бехьа Дела къинхетам,
Аллах1, Аллах1, тхан Дела!
Тхо кхойкху Хьоь, тхан Дела,
Тхо кхойкху Хьоь, тхан Элча,
Ехьа Элча, тхан терго,
Делан Элча Мухьаммад.
Тхо кхойкху , хьоь тхан Элча,
Тхо доьлху, хьоь тхан Элча,
Велхахь,Элча, хьо Деле,
Делан Элча Мухьаммад!
Тхо кхойкху хьоь, тхан Элча,
Тхо доьлху хьоь, тхан Элча,
Дехахьа Деле хьайн Уммат,
Делан Элча Мухьаммад!
Ваьшна дезаш вай делахь,
Делан Элчан шафа1ат,
Дилла деза вай цунна
Денна деза салават.
Аллах1, астаг1фирулЛох1
Робби астаг1фирулЛох1,
Я Ахьаду, Я Сомад,
Солли1ала Мухьаммад.
Аллах1, астаг1фирулЛох1
Робби астаг1фирулЛох1,
Лакал хьамду я Къуддус,
Лаилах1аиллаллах1.
Шайн халкъан т1ехь хьанал ву,
Шайн 1илман т1ехь ох1ла ву,
Делера салам хьуна хуьлда,
Делан Элча Мухьаммад.
Ибрах1им-пайхамар…
Ибрах1им-пайхамар дуьненчу волуш,
Иза ма хилира керстана ва юкъахь,
Ден-ненан дола ва доцуш,вай Дала 1алашвеш,
Цуьнан ворх1 шо кхечира ламанан цу хьоьхахь.
Шена хьехар ва дала да-нана ва доцуш,
Шена т1аьхьах1отта во1-ваша доцуш,
Динан даарх чам эцна ва воцуш,
Ойлаян ма велира 1аламаш Кхоьллинчух,
Ша хьежа ма велира стиглане-латтане,
Х1ара дуьне кхоьллинарг мила ву те бохуш,
Да воцуш хир дуй те х1ара дуьне ва бохуш,
Г1ийлачу ойланца вайн Дела ша лоьхуш.
Сирлачу седане г1ийла б1аьрг ва хьежош,
Бузучу батте шен ойланаш ва ялхош,
Кхетачу малхаца вайн Деле хьоьжуш,
Суждане ма велира кхоьллинчу вайн Далла.
Вайн Дала къамелдеш аьлла ма-хиллера:
Билгало ю хьуна ша Дела хиларца.
Дуьне-халкъ кхоьллинарг ша Дела ву хьуна,
Хьо шен лай ву хьуна, я Ибрах1им аьлла.
И Аллах1- Дела шена везаш хиларна,
Цуо йохо ма йолийра т1аг1утан бакъонаш,
Керстано гуобира ,вуьтур ма вац аьлла,
Кечамаш ма бира вагор ву шаьш аьлла,
Латтано ма элира х1орд т1ебаккха долу ша,
Пурба ло ахь шена, я Ибрах1им аьлла,
Дуьнено ма элира , доха долу ша аьлла,
Хьо вагош ловр дац ша, ва Ибрах1им аьлла.
Ибрах1има элира, ладог1ал ва шега.
Ша реза ву шуна ша Дала кхолларна,
Валарах-висарах шек воцуш вай ша-ма,
Вай Дела везаро шен кийра буьзина.
Жабраил деара Ибрах1им ва волчу,
Кхоьллинчу Делера хаза кхаъ а бахьаш,
Хьох летар ва йоцуш ц1е тосуш ю хьуна,
Собаре хилалахь кхоьллинчу вай Далла.
10.04.1981.
Ассаламу 1алайкум…
Ассаламу 1алайкум, х1ай юьрта ох1ла,
Маршалла ду шуьга т1аьххьарчу дийнахь,
Вай вовшийн дезарах кхел хилла ма ели,
Шу марша 1ойла-кха, Жама1атан ох1ла.
Ша шуна юккъера д1аверза ма воллу,
Ца бинчу цу новкъа ша вала ма воллу,
Вайн хьаьже Кунтига г1одар доьхуш,
Шу марша 1ойла-кха ,Жам1ата ох1ла.
Ша шуьга хьежийна б1аьрг г1елбелла ма боху,
Де-буьйсий мел дели дег1 эшна ма дог1у,
Жам1ата маьждигех ша хервелла ма вели,
Вай къеста ма дохку ,Жама1атан ох1ла,
Ша юха вог1ур вац, кхел хилла яьлча,
Шу т1аьхьа дог1ур ду, Делан кхел кхаьчча.
Вайна г1о деш хуьлийла и Делан Элча,
Шу марша 1ойла-кха ,Жам1атан ох1ла.
Валаран ойла еш, сов халахеташ,
Ша хьоьжуш дитира тиша гуо- дуьне.
Хийла дай къаьсти хьох,Эхарте боьрзуш.
Ва марша 1ойла-кха, Жама1атан ох1ла,
И лахьтийн буьйранаш аш тодеш дайча,
Шух эхьбехк хийтира-кх,Эхартан ох1ла,
Къинт1ера довлалаш лийчочу кху дийнахь,
Хьошалла аш делаш, Эхартан ох1ла.
10.04.1981.
11.04.1981.
Ладог1алаш,динан ох1ла…
Ладог1алаш, динан ох1ла,
Элчан хьадис дийца воллу,
Элча воьлхуш хилла йолу
Зама х1инца кхечи вайна.
14-та б1е шо зама хьалха
Х1ара далхина Элча ваьлла,
Шен асхьабаш цуо белхийра,
Цуо далхийнарг вайга кхаьчна.
Уммат шена гена даьлла,
Динал Ислам байлахь хир ду
Шел т1аьхьа цхьа зама йог1ур,
Бохуш воьлхуш Элча хилла.
Махьар доцуш зуръят хир ду,
Динан мостаг1 кхуьуш хир ву,
Дин сийсаз деш кхайкхош хир ду,
Бохуш воьлхуш Элча хила.
Иман дериг к1езиг хир ву,
Иман лардан хала хир ду,
Иман дериг эшна хир ву,
Бохуш воьлхуш элча хилла.
1уьйранна иман долуш верг
Сарахь иман доцуш хир ву,
Дай, доьзалшца къестош хир бу,
Бохуш воьлхуш Элча хилла.
Эццахь иман долуш вериг,
Динан дакъа лоцуш вериг,
И шул дукха веза шена,
Бохуш воьлхуш Элча хилла.
Иман дерриг ч1ог1а хир ву,
Дагца иман лардеш хир ву,
Харц хьехамах водуш хир ву,
Бохуш воьлхуш элча хилла.
Даим хинверг вайн Аллах1 ву,
Шапа1ат ден дерг Элча ву,
Дог1ур долуш къематде ду,
Бохуш воьлхуш Элча хилла.
12.02.1982
Х1ун дер те?
Х1ун дер те? Х1ун дер те,
ва валар хьуна?
Хазачу къамеле ладуг1уш
ма дац хьо,
Воккхачун, жимачун
башхалла еш ма дац хьо,
Х1ун дер те,х1ун дер те,
ва валар хьуна?
Дохнан да ву олий,
ахь хьалха ца вуьту,
Къен -миска ву олий,
цунах дог ца лозу,
Тароне а хьожий,
т1аьхьа ахь ца тотту,
Х1ун дер те,х1ун дер те,
ва валар хьуна?
Масане ден буьйсанна
ахь наб йохайо.
Масане ден 1уьйранна
Ахь болх бохабо,
Масане да вог1у-воьдуш
Ахь новкъахь лоцу,
Х1ун дер те? Х1ун дер те,
Ва валар хьуна?
Хьоланна товелла,
Декъан ков къевлича,
Хьо керта ца дита,
Кет1а г1ап йоьг1ча,
Къевлинчохь г1ап йуьтуш,
Хьо керта ма дог1у.
Х1ун дер те,х1ун дер те,
Ва валар хьуна?
Дай бигна дити ахь,
Нанойх а дехи ахь,
Йиш-ваша д1адигна,
Раг1 тхоьга ели ахь,
Оха «х1ан-х1а» бахарх,
Раг1, хьо 1ад1е ца йоллу.
Х1ун дер те,х1ун дер те ,
Ва валар хьуна?
Тхан дала ойла яц,
Кхана-лама ва бохуш,
Тхан даго и бахарх,
1ожалло кхин боху,
Хьо х1инца а деана
Схьакхача герга ду.
Х1ун дер те,х1ун дер те,
Ва валар хьуна?
Г1айг1ане дуьненчохь…
Г1айг1ане дуьненчохь ма ловза вели хьо,
Кхана хьайх хиндерг хьайна ца хуушшехь,
Вай Делан 1ожалла къайллаха ю хьуна,
Тоба дай , кечлохьа вайн Деле верза.
Дег1ана хаамаш хуьлуш ма лаьтта ,
Коьртара 1аьржа чо к1айлуш ма лаьтта .
1ожаллийн цу метта вилале ва хьалха,
Тоба дай, кечлохьа хьайн Деле верза.
Кху новкъа вели хьо, дуьнено ловзавеш,
Вузийна,1абийна, хьо парг1ат ца волуш,
Масане хьол хьалха жиманиг д1авели,
Тоба дай, кечлохьа хьайн Деле верза.
Кховдийна куьг кхоччехь 1ожалла ю хьуна,
Баьккхинчу кога кел каш-лахьтий ду хьуна,
Дуьненчу яьржина хьайн ойла гул а яй,
Тоба дай, кечлохьа хьайн Деле верза.
Везачу Дела кхел т1екхаьчна яьлча,
Хьан сирла б1аьргийн нур г1елдала доьлча,
Т1аккха а ца кхетта хьо х1ун да воллу,
Тоба дай, кечлохьа хьайн Деле верза.
Вежарех ваьккхина, дог эшна вити хьо,
Жималла д1аэцна, дег1 эшна вити хьо,
Х1ун толам лоьху ахь т1аьхьло йоцчу дуьненахь,
Тоба дай, кечлохьа хьайн Деле верза.
Ца йинчу 1амална кийрара дог делхадай,
Хьарам долче кхийда хьайн куьйгаш сацадай,
Хьайн б1аьргаш белхабай, вайн Далла хьасталой.
Тоба дай, кечлохьа вайн Деле верза.
1амалъеш, кхайкхахьа кхоьллинчу вайн Деле,
Шафа1ат дехахьа сийдолчу Элчане,
Айхьа къобал виначу устазе кхойкхуш ,
Тоба дай кечлохьа хьайн Деле верза.
Элча д1акхалхар…
Билала-молла ма вахара
1уьйран ламазе маьждиге,
Элча х1уттучу меттехь
Шена Элча ца вайча,элира:
-Илах1и я Робби, ва Веза Дела,
Элча х1унда виси те ламазе ца вог1уш.
И Абубакар-Сиддикъ ма вахара
1уьйран ламазе маьждиге,
Элча х1уттучу меттехь
Шена Элча ца вайча,элира:
-Илах1и йа Робби, ва Везан Дела
Элча х1унда виси техьа ламазе ца вог1уш.
1умар,1усман ма вахара
1уьйран ламазе маьждиге.
Элча х1уттучу меттехь ,
Шайна Элча ца вайча,элира:
Илах1и йа Робби,ва Везан дела,
Элча х1унда виси те ламазе ца вог1уш.
И Дела Лом-1ела ма вахара
1уьйран ламазе маьждиге,
Элча х1уттучу меттехь
Шена Элча ца вайча,элира:
Илах1и йа Робби, ва Везан Дела
Дела Элча х1унда виси техьа ламазе ца вог1уш.
Т1аккха цара ма вахийтира
Билала-молла Элча вехачу х1усаме.
Элча х1унда виси техьа ламазе ца вог1уш,
Хьажий волахьа ва аьлла.
Билала Моллига вайн Элчано ма элира:
- Я Билала-молла,х1ай Билала-молла,
Шен дег1аца лазар ду ала,
Цу Абубакаре ламазна хьалха вала алий,
Хьо молла кхайкхий,
Дела декхар д1адакхий,
Сихонца шена т1едуьйлийша,Билала-Молла.
Т1аккха Билала-молла ма вахара ,
Элчан асхьабаш болчу маьждиге,
Йа Абубакар,х1ай Абубакар,
Сийдолчу Элчано шен дег1аца
цамгар ю ма боху,шега молла кхайкхий ,
Хьо ламазна хьалха ваккхий,
И Дела декхар сихонца д1адаккхий,
Шена т1едуьйла ма боху сийдолчу Элчано.
Билала-моллала ца кхайкхавелла,
Абубакаре ламаз ца дехкаделла,
Шаьш бевлла ма бахара и Элчан асхьабаш
Элча волчу х1усаме,шаьш куьйга г1аттийна ,
Элча шайца ва волуш , уьш юха ма бахара,
Рузбана маьждиге,Элча хьалха ваьккхина
И Делан декхар сихонца д1адаьккхина,
Уьш юха ма бахара Элчан х1усаме.
Элчанна 1ожаллин мотт биллина,
Элча 1ожаллин метта охьавижийна,
Элчан шелбелла когаш шен мара къуьйлуш,
Охьахиира Билала-молла.
Илах1и йа Робби, ва Везан Дела,
И нуьре малх д1абуза боллу техьа,,
Элчан синан баланаш совбийла баьлча,
Баттара тур даьккхина
ша ара ма иккхира и Дела Лом-1ела.
Илах1и , Йа Робби,ва Везан Дела,
Х1ара болх хьо воцчо беш белахьара,
Ша дендерг гуш варий хьо,ва Везан Дела.
14.02. 1982 шо.
Чулацам
Дешхьалхе……………………………………………………………
Я Динал-Ислам………………………………………………………
Ма сийлахь ву динан ох1ла………………………………………………..
Масаний паччахь ву…………………………………………………..
Дег1астанан Эвлаяаш …………………………………………………..
Вайн Дала вазвира хьо, йа Расулаллох1………………………………..
Хьо везаш лойла тхо, йа Расулаллох1…………………………………….
Къинхетам бехьа,тхан Дела …………………………………………………..
Ибрах1им-пайхамар…………………………………………………………….
Ассаламу 1алайкум……………………………………………………..
Ладог1алаш,динан ох1ла……………………………………………….
Х1ун дер
Г1айг1ане дуьненчохь……………………………………………………
Элча д1акхалхар………………………………………………………………..
Дешт1аьхье
Х1ара назманаш халкъан лору,х1унда аьлча х1ара назманчаш Дела дин даржо ,и довзийта 1алашо йолуш хилла,цундела шайн ц1ераш билгала йог1уш а ца хилла цара.
Аллах1 реза хиллачех бойла и Делан ц1ена муридаш,церан сирла лар ю х1ара назманаш вайн къоман иесехь йисна.