Хуьруьн шикилар-6

     Са шумуд йикъан вилик къвайи жив гуьгъуьналлаз атай рагъ авай  хъуьт1уьн куьруь йикъаривай ц1урур ийиз агакьзавачир. Живеди рагъ акьурла гузвай гьар рангунин рап1рап1ри югъ мадни гуьлушан ийизвай.  Йикъан нисинлай, гуьнедив гвай хуьруьн кимел, к1валера нисинин фу т1уьна хтанвай са жерге яшлу итимар каваларни галаз ацукьнавай. Итимрикай сада дем атканвай кавалда гьахьна ахварзавай, муькуьбуру – беден суст хьана, кавалар са т1имил къуьнерихъай кувудна, агаж жезвай вилер са гужуналди ахъаз туна, кагьул жуьре ихтилатарзавай. Сад лагьана, кимин патав гвай радиоузелдай лезги концерт кутуна. Дикторди милаим ванцелди астадаказ Ризабала Агъабалаеван «Темпелдин фикирар» мани малумарна. Манидин музыка башламиш хьунни, кьуьзуьбурукай сад, Магьмут буба, кавал ацукьнавай къванцел туна, тядиз к1вачел акъалтна. Ада, муькуьбурухъ элкъвена рик1ик къалабулух акатай жуьреда « Я стхаяр, яраб чаз хабар авачиз, чун кьена женнетдин юкьва ават1а!?» - лагьана хабар кьуна…