Господи Исусе Христе, сыне Божий, помилуй нас.
Раб и посланник Исус Христов волею божиею и узник о господе о предании отеческом протопоп Аввакум двум девам радоватися и здравствовати о Христе.
Слышу я, чада Сионя, о вас, яко странствуете господа ради, вся, яко уметы, вменисте, богатство и славу века сего, – добро и благоприятно.
Евдокея, Евдокея, почто гордаго беса не отринеш от себя?
Высокие науки исчеш, от нея же падают богом неокормлены, яко листвие .
Что успе Платону и Пифагору и Димостену со Аристотелем? Коловратное течение тварное разумевше, от ада не избывше.
Дурька, дурька, дурищо!
На что тебе, вороне, высокие хоромы?
Граматику и риторику Васильев и Златоустов, и Афанасьев разум обдержал. К тому же и диалектик и философию и что потребно, – то в церковь взяли, а что непотребно, – то под гору лопатою збросили.
А ты кто, чадь немощная?
И себе имени не знаеш, нежели богословия оттоле составляти.
Ай, девка! Нет, полно, меня при тебе блиско, я бы тебе ощипал волосье-то за граматику-ту.
Есть, госпоже моя, Ефрем Сирин, пишет слово: может бо духовно слово добре живущих верою без граматикии и риторикии препрети. Вера есть мати всякому делу благу.
Не прелагаю пределы, яже положиша отцы, и держи преданное неизменно. Креститися подобает, якоже прияхом, веровати же, – яко крестихомся.
А то возвони во уши твои, сопостат, священство упражняеш, да и таинство, люторски и калвински.
Забрела ты, друг, во глубину зол.
Воспряни!
Понеже ни сам диявол упразднити может священнотаинства, нежели антихрист с чадию.
Рече учеником своим владыка: аз есмь с вами до скончания века. Аминь.
Глава наша Христос, царь и архиерей сый*), коли устав упразднит попустит?
Не блазнися, чадо!
Аще изгнано будет священство, но не до конца погибнет.
Ну, простите.
---
*) церковнославянское, по русски - "сущий"
Источник: