МАРХЬЛИКК ККАЙИ БАГЪ
Крузура кьабарикансина
жилиинна
хабгнайи
чан пайра
мархьлин цІадлар
гьарарира
гьяйифсузди,
юкІв гъурзлу дарапІди,
я саб жара ният дибрисди,
аьгъдарди
жили
ччивариз
читин вахтари
харгнайи
гьадму цІадлар
ва хъана
бахиш апІруб.
ТІюрхъяр тІуркІруб гъабхура –
эверсюф –
жилихьан кьяш,
буржназ вуйиси,
кьабарианзина циркларин кІакІариз,
мурцІарихъна,
юкІв гъурзлу дарапІди,
я саб жара ният дибрисди,
гьарари
багъдиъ
мархьликк ккайи,
йимишар дигмиш
мянфяаьтлуди шлуси
мянфяаьт ктабгъуз инсанариз
ужур-харжир дарпиди,
пис,
футнакар жара дарапІди
дугъридарихьан,
гьюрматлударихьан
юкІв гъурзлу дарапІди,
я саб жара ният дибрисди.
АйкІан гьацдар?
Айидариз гьаз аьгъдаркІан
багъдин йимиш ипІуз
гьархну чпин зивзивар
гьякьлудариз ктирчрудар,
багъси мархьликк ккайи агьар-сузйирин,
дердер-гъамарин?
Мархьликк ккайи багъ,
адар увуз мутІан
аьхю гъагъ.
Аьгь апІурава
кьюрдар, мархьар
хажалатсузди,
хъа мицдар биркар
хай гъюрдарда
гъюрдарикк дарди
дерккуз аьжалсузди!