КУМРАН
(Гъабхьи гьядиса)
Кьилзи гьюлин ригъ-алабхъру гъирагъдихъ хъайи,
ригъдин нурарикк агъзрар йисариинди дургнайи,
мархьар-селери ягъал архар ахьну дерккнайи,
дагъларин канч1арихъ хъади гъабхьну гъул Кумран.
Кафарийизди – варит1ан кюгьне Иерихон,
кьиблайизди – Эн-Гедийин зюргълар ва гъярар,
ригъ-алабхъру терефнаъ – Ерушалайм ва Хеврон,
хъа мурарин арайиъ – римлянари ккидипу Кумран.
Гьаз ккидипну Кумран гъала? Гьаз ц1иан гъап1ну думу?
Ессей жямяаьдикан фу ккундийи дюнья дибиснайи къушмиз?
Чпин аллагьдиз сар ву к1ури икрам ап1уз даккниган...
чпин пайгъамбар гьякь ву к1ури думу ккун дарап1руган...
вуйи гьякьвал ачухъ дубхьну даккнидарин ниятар яман.
Ихь абйирин Заанур, чпин хиялари арайиз дубхнайи саб шикил дайи...
Ихь абйирин пайгъамбар Ягь'я, учв ккун ап1инай к1ури алжагърур дайи...
Завариан Рабби Учв гъафнийи Чав ктагъу жугьуд халкьдихьна...
дурарин арайиъ гъуншиси Гирами Заанур Учв гъахьнийи яшамиш...
Ихь абйир вари гьадму аьламат ляхнарин шагьидар вуйи,
ва гьаддиз Ерусалимдиъ Заануриз Дараматра дивнийи...
Хъа гьадму гьядисйирин шил жилилан терг ап1уз ккунди
кьувватлу къушмари Израилиъ Раббийин Хал ккидипнийи.
Ва Заанурикан шагьидвал ап1ру гьарсар терг ап1уз гьял гъап1нийи.
Якьубдин наслар Заанурикан дидик1найи илдижу Китабарра хьади
дургнайи фук1а чруб адру къур дагъларизди гьергнийи.
Ва Ярдан нирихъна рукьайиз Дубк1найи гьюлихъ ямажариъ,
Шагьидвалин Китабар бетйириъ ивну дюрхъяриъ жин гъап1нийи.
Китабар хьади Ерусалимдиан гьергну гъушдарихъ хъергну,
къушмариз Заанурикан вуйи Шагьидвалин шилкьан гъибтну ккундайи.
Жин гъап1у гъидкьин гьадму Китабар агури чпиз дидрихъган,
дурар вари жугьуд халкь гъирмиш ап1ури инсафсуз хъюгънийи.
Гьамци вари дюньяйиз жугьдар даккун гъахьнийи.
Ва гъира кмиди дурар терг ап1урча к1ури ижми кьастар ади
мусурмнари чпин хъялна нефс дурариин улубзури ими.
Гьаддиз терг ап1ури гъахьну дурари табасаранарра
гъулар ккидирчури, яшлуйиринна биц1идарин гадрар ап1ури.
Фунуб гъулахъ гъилигишра, думу инсафсуз лишнар хъими,
Раббийикан вуйи шагьидвал т1анкь ап1ури хъач1арккнайи!
Кумран ва масан Табасаран, Табасаран ва к1убан Кумран –
гъи дидин дюрхъяриъ дидихъна гьадму Китабар Шагьидвалин
Ихь ата-абйири чпин наслариз, ухьуз, гъибту зат ккудудубк1ру Ирс!
Гъи думу ирсну дюнья мюгьтал дап1ну дебккна:
неинки, Заанур хъана му жилариина гъюрайк1ан яраб,
инсандиз хас дару Иешуа Машиах к1уру ччвур алди –
Магьа ухьуз фу вуш ихь абйирин кумруан гъап1у Кумран!
Магьа ухьуз фу вуш дубгну ва т1араш дап1ну дебкку Табасаран!