ИЦЦУРАЙИ ШЯРГЪЯР
Сад йигъан гъулаз гъафиган, бабу кьюб хумурзаг гъадабгънийи – саб хьадануб, тмунубсан - кьюрдун, ва вари хизан лисундин чІеваз уч хьайиз дурар «читин фунарихьан» тагъчигъ жин апІуру.
Мидкан хабар йибхь гъюлягъ гъяйи КІубан Габниз. Думу жаргъури дуфну, бабан улихь шяргъяр иццурайиз кІури дахъру.
– Гизаф вахт вунив, хтул, шяргъяр иццру духьну?
– Ваъ, баб. Накь жварар йивуз хъугънийиз.
– Хъа, йиз хтул, ичв адаш хулаъ имиди гьаз гъапундарва? Дугъу чахъди Хивна гъахурийву духтрихьна.
– Хумурзгар айи машин гъафиган, баб, иццру хьуз хъюгъну. А-я шяр-гъяр! А-я шяр-гъяр! – бабан гьисаб-суалар бегелмиш дарур ишуз хъюгъру.
– Кебехъ, йиз бай, ккебехъ. Адаш гъафибси адабгъуз гьаурхьаву, – бабаз ккарцуз ккун гъабши. Хъа - наънан!
– А-я шяр-гъяр! А-я-я! – хтулин гьарйир гъизгъин шулайи ва баб, гьамкьан гагьдиз фукІара дарурин шяргъяриан саб дупну гъадагъиган, гьапІрушра мюгьтал гъаши.
– Жан, йиз бицІи курцІил, жан баласи, жан гъизилин гюл кюкю! Гьамус йиз бализ хумурзгиканра тувдихьа… – Бабаз думу алдатмиш апІуз ккун гъаши.
Хумурзгикан тувдихьа гъапиган, КІубан Габни ишбар хътатІу ва чаз туву чІукІ аьхю иштагьниинди гъипІу.
– Йиз балин шяргъяр ужу шулайкІан? – бабу дугъан кІулан хил алдату.
– Ваъ, баб, иццрушин кми. Сабсана чІукІ вуйиш...
– Шяргъяр ужу ишри йиз балин, тувруб гьяйиф дайзуз, – бабу сабсана чІукІ туву.
КІубан Габни мунубра хътипІу.
«Бабу хьаданубдикан гьаз туврадайикІан?» – фикир апІурайириз, дидикра ниъ капІуз ккун гъабши.
– Баб, – гъапи КІубан Габни, – гьамус жара саб шяргъли жварар хъаъра, а-я-я!...
– Хъа муну шяргъяр сагъ гъахьнийин, йиз бай?
– Мурар ав, баб. Гьяракат апIин, гьамунубра сагъ апІурхьа. А-я-я шя-я-яргъ!...
– Узу духтур дарза, хтул, фици сагъ апІуза?
– Увхьан вари сагъ апІуз шулу, баб. А-я-я шяргъ! - Дугъан учІвру чІветIери вари хулар ацІу.
– Ккебехъ, йиз курцІил! кюкйирин йиз кунцІ! Гьамус йиз бализ хьадан хумурзаг гьадабтІурза... – бабу хьаданубра гьадабтІу ва кьюб аьхюсдар чІукІар хтулиз туву.
Дугъу хътитІбалан кьяляхъ, бабу хъана гьерху:
– Шяргъ ужу гъабхьнийин, йиз бай?
- Ав, баб, ав. УвутІан аьхю духтур адар, баб, чухсагъул! Узу, баб, йиз шяргъяриин мюгьтал духьназа, фици кІури гьерхиш, меймунар узуз ккуниган иццуру ва сагъра шулу. Жарадаринстар дариз!
- Гьамусдихъантина узу дурар узухъ хъпехърубси апIарза, жан йиз бицІи курцІил, баласи, жан гъизилин гюл кюкю! Дурарин чIал увузтIан узуз ужуйи аьгъязуз, жан йиз курцІил, зазарин йиз кунцІ, варжйирин кьилзи йиз кьикьишв!