АМКI
1
Кьунан к1арч т1убк1ру йигъари Къубуч аба гъак1нийи.
Юкьбиб чархfриъ худ айи илибку машин гъулаъ адайи, гьаддиз Давудрин "ГАЗ– 66"– диъди Сугъккан Журас мягьялиз салам дупну гъярайи гъуландари рякъ гъибису. Гъуландар пузкьан рубкьдайи – машиндин кьябаъ аш заан к1ул йирхьур кас: сар хпирна хьур жви.
Аьхълу къусмар духьнайи дишагьли, чан гъвалахъ деънайи Мисрийик карсуз ккунди сиденияйилансина хъирк1уз хъюгъю. Му дишагьли курк1рурихъ Мисри учвра хъирк1уз хъюгъру. Жили жвуваз хпи дишагьлийихьан нач кади айи. Дишагьли хъана хъирк1ру. Чан нубатнаъ Мисрира хъчвухуру. Дугъан маш уьру хьуз хъюбгънайи. Мурарин гъаншариъ деънайи юкьрид жилариз гьамунуб скамейкайиин гъягъюрайи гъизгъин гьядисйир рякъюрадайи.
Дишагьли Мисрийик карсну чаз мани ап1уз ният ади хъирк1райир вуйи, хъа Мисри, дидин гъавриъ даршид: "Му ***ин шураз фу кундайк1ан", к1ури учв биябур хьайиз, тина-тина улчвухурайи.
Саб арайилан, фу лигурва, Гюлюсюмди Мисри машиндин улихь бортнаъ уржна.
Касиб Мисрийилан мархьси амк1 гъябгъюра.
Мици гъябкъю жилар Мисрийиин аьлхъюз хъюгъю:
– Фу дубхьнавуз, Мисри, учу аьхълу йик1урачу, хъа увлан лит1ан лит1нихъди амк1 улдубзура?! Аяман, Гюлюсюмдин ялавну ерцурашалву гьа!!!
– Фук1ара гъап1уб адариз, узу ичв улихь хьтарин?
– Хьава, хьава! Шлиз аьгъя яв хилар жибдиъ айиз к1ури наан аш! – к1ури имбудар ижмишнаан Мисрийик кялхъюз ттуч1ву.
Сарун жара чара имдрур, гъудужвну аязнахьинди хъиврайи мик1раз маш илбицну, гьац1 кьялаъ улихь бортнахъан хъич1ихну дийигъу.
– Эй, Мисри, фйир ап1урава гьаму кьунан к1арч т1убк1ру аьхълушнахь?! Яв келле т1убк1уз мигъитан, ис деъ!
– Эй, Давуд, Давуд, машин дибкк, – к1ури, машиндин кабинайиз Мисрийи бач1ар йивуз ттуч1внайи, – Узу му эдебсузарихъди гъюрур дарза. Гъарахай ичв, нач гьяя дудубгнайидар, – дупну машиндиан урсрайи Мисри гъуландари саб гужа-гуж гъидису.
2
Къубуч абин майит никьаригъна гъябхури гъярарикк Мисрийира чан гъюн ккивнайи. Мушваккра, учвра кади, йирхьур кас ккайи. Дурар вари жигьил кьант1йир вуйи. Гьаз кьант1йир? Дурари, чпин улихьди гьярайи маллйириз фикир тутрувди, я гуч1 ктарди, жини-жиниди чиб-чпигъ зарафатар ап1урайи:
– Гъюн чист кчвубхдийиз, фукьан гъагъур дарин, гурбагур хьуз ужур, – гъапи сари.
– Айвучв жилариан сил духьну ут1урччвривучв...– гъапи сарсанурира.
– Хъа гьам сяаьт гъярариан гъудужвну хъергиш гьап1арчва му Къубуч, – гъапи улихьинди хьайири.
– Дирчну гъярар гьергдихьа сарун, – гъапибси тмунури, дурарик варидарик т1ит1йир ап1ури дебккуз даршлубсиб аьлхъюб кубч1ву.
Мисри мюгьтал гъахьи. Гьамус гьап1ру, биябур шулайи гьял ву. Мугъан унт1лан нирси амк1 рубзуз хъюбгънайи.
Гъвалахъди гъярайириз Мисрийин гьял дябкъну: "Му кас фициб гъагъдикк ккитнадарин. Кьант1йири вари гъагъ гьаму касибриин илипнада", – дупну, Мисри гъярариккан ккадаъну чав гъюн ккивру. Гъюн ккивур Мисрийиин мюгьтал гъаши: фу лигурва, гьич кайибсира дар.
Накьвдихьна гъафиган, му касдира ва гъуландарира, Мисри нашдик1ан к1ури, ул илбицурайи. Мисри накьварихъ хътар.
Думу гъярариккан азад гъашибси, ап1ури люкьнар, чпин гъулаз рякъюъ уч1внийи. Хъа дугъу фицдар люкьнар ап1уруш, учвуз аьгъячвуз, дустар.
3
Майит кивну гъулаз кьяляхъ гъюз машиндихьна уч гъахьи гъуландари Мисри агури гьарай гъит1ибкку ва шлиз-вуш, сар кас сугъаккинди гъягъюри гъяркъну гъапиган, хъап1ну машин гъягъюру.
Машинди гьац1 рякъ ккадап1ну, хъа Мисри гьич рякърушвариъкьана адар.
Аьхир, магьа гъулахъна хъуркьри, рякъюъ амк1 улдубзури гъярайи Мисри дурариз алахъуру.
– Эъ, гъула жви, – к1ури дурари машин дебккру. – Ари гьамунуб амк1 яв дугъри амк1 вуйиб аьгъю гъабхьунчуз. Гьап1хьа я Мисри, уьмур ву сарун, филадизкьан гунагькар дарза к1ури дицидивахъа?!
– Узу гунагькар дарза к1урадарза. Майтиккра ва аязнаккра мурари гьамцдар ап1ураш, имбуну вахтари гьап1ри шул! Агь байк1и дюн’я! Навшдик1ан яв абур?!
"Хъа абур гьаддиъ аш аьгъяйвуз, Мисри? Сац1иб фикир ап1ин!" – чаз к1урайиси Мисрийин келлейиъ ат1абгу.
...