ПОЖАР
– Гьарай эллер, Урдихдин хулар улдугура! Хъуркьай! – к1ури лисхъан сяаьт шуббари Аьдуцайин гьарай ут1убччву.
Вари халкь – гъул-жямяаьт, сарихъ сар хътрукьди, гимин багахь хьайи Урдлихдин хуларихьна бедерйир, гварар-гажнар, кьюршар–лапаткйир хьади ккажаргъуз хъюгъю.
– Наанди ц1а кабхъна?! Набшди?! Фу гъабхьну!!! – к1ури халкьдихьди саб дупну вари рацдар вуйибси алабц1у. Мушвахъ хъайи гьарай–ч1игънахьан шли фу ап1ураш, фу дубхьнаш гьич саркьан гъавриъ ахънадайи.
Аьдуцай гьяркат дап1ну душну, Урдихдин хуларин улдаригъян айи кьадарниинди хъана чан дих ат1абгу:
– Гьюрматлу гъуландар! Учву узлан хил алдабгъай. Урдихдин хуларик ц1а кабхънадар, хъа вари ихь Табасарандик ц1а кабхъна! Саб инжигвализра дилигди, сац1иб, ихь ватанагьли, Махачкалайиан дуфнайи Мерденов Ашурали Минатулаевичдихъ хъпехъуб ккун ап1урача. Дугъу учвуз вари Дагъустан, Россияйик кабхънайи ц1а фици кт1убашвуруш пидичвуз.
Халкь, "ихь ватанагьли" гъапибси, мушваъ шулайи гьядисйирин гъавриъ ахъу ва аргъарди гъадагъу:
– Ери духьну гъарахай ич уларихьан, халкь алдатмиш ап1ури гъюрайи, гьярамзадйир, – к1ури халкьди бедерйир чиб– чпикан йивури мушвахъ аьхю гьарай гъит1ибкку.
Мерденов Ашурали Минатулаевичра, чаинна саб бягьсум хайиз, гъюняригъ к1ул гъипну, жини– жиниди халкьдин каркариккан ккут1урччвну чан джипдихьинди гъажаргъу.
Халкьди: "Наши думу. пожар кт1убшврур", к1урамиди джип гюллеси гъул’ан ут1убччвну гъубшу.
– Гъит1лаимина, Аьдуцай, т1афларин рижвникки, выборарин гьякьнаан мина сарун фужк1а хъади гъафиш яв язухъ ву! Гъухригъна духначу дурари, йигъан сар, йигъан сар "Гьюри–пери" гъюри…