ХЬАЯРИХЪ ДИЦУБ
Риш хъаърайи Периханум, хьайирихъ гъюлягъ лицурайир, Агъамурадлин урнарихъна дуфну дихар ап1уру:
– Я Секинат! Секинат! Сакьюб башк1ул адагъ! (Башк1ул – ахниъ ахьру карк хьаяр)
Хъа Секинатди хянакк чухрайихъ хьайир хъитрайи.
Периханумдин дих кубк1у Секинатди дишла, сесер дерерхьуз, чухра дебккну, чан биц1и шураз явашдиси к1уру:
– Душну, ихь заан айвавдихъан, гьаккгъаз, дада адарич, йип...
Жаргъури душну, шуру, кьюбпи мертебайиз, айвандихъан, урнарихъ хьайир адагъайиз ккилигурайи Периханумдиз к1уру:
– Ич дада адарич!
Периханумдира:
– Дада адарш, уву вушра акъин, – к1уру.
– Узуз ич хьайир хьайишв аьгъдарзуз.
Айвандихъ дурарин адашра рягьятвал гъадабгъури дивандиин дахънайи. Дугъаз, чан хпиринра ва урнарихъ хъайиринра дихар ерхьурайи, ва, дугъу, аьлхъюб кади зарафат вуйиси, чан али йишвлан ч1игъар ап1уру:
– Куч1лар ву, Периханум! Секинат хянакк чухрайихъ хъа!
– Я Секинат! Айву гурбагур ишриву! Яв сес ебхьурайиз гьа!
Чара имдру Секинат Периханувдин гъаншариз удуч1вуру:
– Гьакъугъан хъюлу, йиз чуччуз саб сиф ццийин хьайир хураза!
– Периханум, уву алдатмиш ап1ури гъюрайириз лига! – Хъана дих шулу айвандихъан.
– Гьай–гьайди узу саб сиф хьайирихьан шулайзу гьа! Чухсагъул йиз чвучвуз! Саб датт дубккну валлагьи хялужв дарап1ди гъидритарзаву.
Периханум шадну кудут1ну гъягъюру. Хъа Секинат ап1ури бурбрар чан чухрайихьна гъюру ва жилириз тягьнийир йивуз хъюгъру:
– Периханумдихъ йиц1ихьур бай–риш хъа к1ури узу буржлу вуйин йисан сариз ахнар–леъфар ап1уз, саб иблисвал ктру ахмакьар гьамрарт1ан гъахьундар...