ХУМУРЗАГ
Вагьабрин хулаз риш ча к1ури гъафи хяларихьна гъуншйир–мирасариканра уч духьнайи.
Уьл ип1балан кьяляхъ хумурзаг гьадабт1уз гьял ап1уру.
Мяжмягъизди хумурзаг гьадабт1уз хъюгъю Вагьабри гъапи:
– Йиз му хумурзаг, риш ча к1ури дуфнайириз вуйиз. Гьадрар амиди имбунудар вари удуч1вну гъарахай.
– Гьязурди гъуз увуз учу удуч1вну гъягъяйиз, – гъапи сакьюдари. Хъа сакьюдарсана удуч1вну гъушу.
Бализ швушв ча к1ури дуфнайи Гьякибат мюгьтал гъахьи ва чазра, чахъ хъайидаризра, туврайи риш кьяляхъ дап1ну, гъудужвну гъягъюз ккун гъабши.
– Я Вагьаб, уву фйир ап1урава?! Яв гъавриъ дархьидар, гьарди саб багьна ктабгъури, удуч1вну гъушну, гьаму ихь хяларра гьергну гъягъюз мигъитан гьа. Мурари яв гафар к1ваант1ан к1урайидар вушул к1ури гьисаб ап1урив, байк1а. – гъапи гъуншди.
– Эгер йиз гафар дурари гьаци гьисаб ап1ураш, узу гъапундайин, дуфнайи хяларизт1ан дариз, к1ури.
Гьамус гьап1ру? Гьякибатдин кьац1 йивнайи чук1 т1убаригъянсина гъючвюбхю.
Гьякибатди к1арк1т1ихъан чан жан кьяляхъ гъизигу ва машнаъ айи ранг дигиш гъап1у.
– Гьякибат! фу гъабхьи? Кьилзиб вуйин?
– Вагьаб халу, уву жара хиялра мап1ан, амма йиз гъухригъянсина му гъябгъюрадариз.
– Гьа–а, гъавриъ гъахьизу. Эй, хпир, тяди гъудужв, йикк убкру машин абкъин!
– Машин гьаз вуяв?
– Гьякибатдин гъухаригъ хумурзаг гъюбшрадар, белки машинккайихъан хътап1иш, ашси, ип1уз рягьят шул.
– Гьа гъит яв ахмакъ гафар, – гъапи хпири жилириз.
– Гьаз ахмакъ гафар? Нагарихьди ктубт1уз шлу хумурзаг гъухригъянсина гъябгъюрадариз гъапиган, узура гъавриъ ахърадарза.
– Ари узура, гьаз му хумурзаг риш ча к1урайидаризт1ан дарш, гъавриъ ахърадарза! – гъапи нач’вал гъибтну Гьякибатди. Вагьаб гъяаьлхъ ва сац1иб икъну гъапи:
– Гьаци вуйиган, Гьякибат, йиз хумурзаг кьяляхъ ап1урава сарун?!
– Му фу к1уру гаф вуяв?
– Пагь баяр, узу мурарикан гьап1дик1ан? Учвуз ихь абйирин аьдтар гьаз к1ваълан душначвуз? Швушв ча к1ури гъафидарин улихьна хумурзаг хувал фу лишан ву?
Вари мюгьтал гъаши. Дурари чпин мюгьталвал улариинди улупурайи.
Чав диву суалназ Вагьабди чав жавабра туву:
– Риш тувунза к1уру. Гьамус уву лиг, жан Гьякибат, хумурзаг йиз риш вуйиз. Хъа гьамус лиг уву гьап1раш ва фйир к1ураш! К1уруб яв ачухъди йип: яв риш кьабул гъахьундариз к1ури. Хъа фйир ап1урава, йиз риш гьял ап1уз хьибдарзухьан, гъухригъ гъюршдариз к1ури?! Уву гъап1у гафарна яв т1улар к1ваин акъин ва дурарин гъавриъ ахъуб читин дар. Гьамус швубпи раж вуяв йиз хулаз гъюри...
– Вайгьарай, Вагьаб халу, хил алдабгъ узлан, дюзенейилан! Беле ужуйи гъябгъюриз гъухригъянсина, – дупну Гьякибатди хумурзаг хъабшври ва абшври ип1уз хъюгъю.
– ... му халкь фукьан рягьтиб дарин алдатмиш ап1уз...