РОССИЯЙИН ХАТI
Алиахмеддин Урусатдиъ яшамиш шули ягъчIвур йистIан артухъ вуйи. Думу гъулаз чан хтул швуваз гъахури дуфнайир вуйи.
Сумчриз вари варис–мирас, багахьлуйир уч духьнайи.
ИпIруб–убхъруб алди устлар икриъ дабалгнайи ва дурарин гъвалахъ, жвувандаригъна вуди, бицIи мярака ачмиш дапIнайи.
Устлихъ баяр–жиларин арайиъ зарафат–аьлхъюб айи. Дурарин арайиъ Алиахмедра айи. Думу, чан аьдати жюрейиинди аькьюллуди, гьарди апIурайи гафар–чIаларихъ хъпехъури, саспиган чаз таниш дару мажлиснаъ айиган, думукьан чан иштагь айивал улупурадайи. Дугъан пенсияйиз удучIвну сад йис вуйи. Алиахмед чан гьаму гьялниин гизаф рази вуйи, мегер мушваъ айи гьягья–тIитIийиинтIан. Дугъаз чан чвуччвун веледарихъди имбунударира Имицай кIуйи.
Магьа гьамци, зарафатар апIурайи, махачкалайиан вуйи, чан аьхюну чвуччвун язнайи дугъаз кIуру:
– Я Имицай, шабаш апIуз саб йицIуб манат чава.
Имицайи гафкьан дарпиди ккадабгъну гъултгъиккан мажник, адабгъну йицIуб манат язнайихьинди гьачIабккуру. Язна мюгьтал духьну дийигъу ва саб гьялтIиланси гъяаьлхъю.
– Уву фйир апIурава, Имицай! Пул ча гъапну кIури туврин арда?! Ма яв кьяляхъ, мици зат апIури мапIан. Ихь дагъустандин адмийирин гьял увуз аьгъдайвуз? Ча гъапну кIури мутуван, кучIлар апIин, хьтарзухь йип... Уву дишла Россияйиан вуйиб аьгъю шулу...