Рангар

               
                РАНГАР
 
       Ухди вахтари райцентрийиан гъулариз гъюрубдихъ йирфар хъирчри гъахьундар.  Гьаддиз гизафси касиб халкьари хруб–гъабхруб чпин кьял'инди апIури гъахьну.
       Хиван Яраккна гъюрайи Гьюсей имбуну юддшарихтди булагъдин гъвалахъ ипIури– убхъури гъудрузди, диш рякъ дапIну чан хулаз гъюру. Гьам арайиъ мугъаз, чаз фила– вуш Айбалайи гъапIу учIврушин кIваин шулу ва гьаци, дугъу чавра дугъкан ктабгъуз гьял aп1уру. Гъулаз гъурукьу Гьюсейиз чан гъунши гьадму Айбала рякъюру ва дих дапIну кIуру:
       – Гьяракат апIин, Айбала, яв жилир, гъагъар хьади гъюз даршули "МичIли штар" булагъарихънакьан дуфна. КIарчарин тIуринра хьади улихьна гьаъ, йип кIури тIалаб гъапIнийи узкан.
       Гьюсейи гьамци душу ккудубкIайизра, Айбала, пагьниккан хиларикк ккабхъу тIилра гъадабгъну, кушв–кушв ккивну жилирин улихьна ккажаргъуру.
       Чан нубатнаъ Ризабала, тIурччвури хилар, дустарихъди апIури гафар, арагъну гъюрайи дугъаз, алдабхьну бугъ чан улихьна жаргъурайи чан хпир рякъюру.
       – Сарна–сарди, гьарайкIул'инди хърибчури кумра наана гъярава, хпир?
       – Яв улихьна гъагъар хуз.
       – Кьял'ин тIилра, гьаму йиз жибдиъ айи рангариз?! Узхьан хуз хьибдар кIурайва, Бябуш!
       Гьамлин Айбала кьяляхъ хътIурччвуру. Гьюсейикан Айбалайин юкIв фици аш аьгъяйчвуз –  айтIанзина касиб урхьура. Гъядряхъри му ражну Гьюсей мугъан каркаригъ...
       Айбала диш дапIну, Гьюсейин икризди архьру. Икриъ, ккубсри гьяса, марцци гьавайихьна удучIвнайи Кьади аба лицурайи. Думу, Айбалайин дих кубкIир, дишла дишагьлийин рякъ гьадабтIуз, улихьинди  гьадакуру:
       – Фу вуяв, Айбала, балйир йивури?
       – Фу шул, гьатму яв Гьюсейза кIуру, машнаъ перде адру бали кучIлар гъапIунзуз.
       – Фу кучIлар?
       – Ризабалайин улихьна гъарах гъапунзуз.
       – Гъушунна?
       – Ав.
       – Алахъуннуз?
       – Ав.
       – Хъа сарун фу вуяв дугъахъди?
       – Дугъу узуз кучIлар гъапIну!!
       – Фу кучIлар?
       – Ризабалайин улихьна гъарах гъапунзуз!
       – Гъушунна?
       – Хъа ав!
       – Алахъуннуз?
       – Хъа ав!
       – Сарун фу вуяв дугъахъди?
       – Фу шул, Ризабалайихь аьхю гъагъ хьтайи!
       – Яв жилирихь аьхю гъагъ хьтар кIури, дугъан Фу тахсир ву?
       – Дугъу узуз кучIлар гъапIну!!
       – Фу кучIлар?
       – Ризабалайин улихьна гъарах гъапунзуз!
       – Гъушунна?
       – Ав!!
       – Алахъуннуз?
       – Ав!!
       – Хъа сарун фу вуяв дугъахъди?
       – Гьаму йиз жан убхьурамиди хилиъ айи тIил саб–кьюбан дугъан йирфарилан алдадатиш кIваз рягьят хьибдариз. Рякъ тув узуз, Кьабиаба, думу гьарагъурза!!!