ГУДГУД
– ГьапIрава, Авшалум, адми багахь шлурихъ ярхла–ярхла гьудучIвурадува?
– ФукIара, Юил, гьаму бидбидар хъаъну гъяраза.
– Дурар бидбидар вуйинхъа?
– Хъа фйир ву мурар?
– Узхьан гьаз гьерхрава, аьгъдарди айвуз!
– Валлагь аьгъдарзуз.
– Гудгуда–ар! – апIури зарафатар Юил гвачIнин ухди школайиз гъягъюрайи.
– Яваш гьеле, Юил, аьхю кас вува, дидихьна мялим вуза кIури лицурава – школайиъ ученикариз кивру дарсар гьамцдар шулничв! Гьаддиз вари школайиъ айи бякьйири, гьам увуси, узуз гуд–гуд кIури шулу гьа – магьа гьамцдар аькьюлсузар дурарин улихь хьайиган!
– Гьацикьандизкьан дайдийиз, Авшалум, хил алдабгъ, аман дуст кас, увуз хъял гъюруб аьгъдайзуз.
– Хъа гьамрарра фйир вуш аьгъдайвуз!!! – кIури лап хъял кади Авшалумди гьяштйирин лижнахьинди чан маргъ хъапIну хил гьачIабкку.
Чпин нубатнаъ гьяштйирира гьяшти жюрейиинди Юилиз хъжагъу.
***
– Гьа, Сафун, доскайихьна удучIвеле, ужур бай, ухьуз гъи даре пидива. Гьяштйирихъ хъайи ичв адашди гъи гвачIнин ухди узукна аьрзар апIурайи, йиз бализ дарс киврадара, кIури. Гьан гьеле, гьа–ан Шингъран уьмрикан кидибт ухьуз.
Сарун чан гьарганси, доскайихьнакьан удудучIвди, партайихъ ибхну кIул дийигъу.
Юили чан гафар давам гъапIу:
– Учвуз дарсар кивишра–ктривишра, учву дарсар гъурхишра–дурухишра, узуз гьюкуматди пул тувразуз, вайна–гьял ичв ву, жав бай, деъ! Дубгъурдаш гьич амуркьан дарапIривуз, гуд–гуд! – пну хъял гъафи "мялим" чIатинди папрус зигуз удучIву.
***
ЙицIуд йислан.
– Я Сафун, яв мялимдин гъулугъ гьубкIава, – пну Юил, полковник Сафон
Авшаломович Елифазовдин кабинетдиъ саб хъумпIра дарди, тIубаригъ маштукра гъяди учIву.
Сафунди мугъакди урус чIалнииндитIан гафар апIдар.
– Уву гьапIнура, йиз бай армияйиккан ккадаъну ккунду, Сафун, даршиш узу гъуллугъчйирин цIарнаан адахъуру.
Сафунди гьапIнура урус чIал дипдайи:
– Узуз учву ва му райондиъ апIурайи иблис тIулар ухдитIан датIнайиз!
Аьхир, хъял кубчIву "мялимди" чан улихь атIин улубччвру кIалибси дийигънайи "ученик"– Сафундиз гъапи:
– Эй, гьяштйирин габан! Узу фу кIузачазхъа уву райондин комиссарди дерккуриз! Му ляхин мици гъибтну ккундар! Учу ичв адашдиз гудгуд кIурайидар вуча!!! – пну, ракк–раккникан йивну Юил, папрусра учIуфури чIатинди удучIву.
ГьудубчIвурайи ваз я "мялимдихьан" я "ученикдихьан" дебккуз гъабхьундайи.