Сундкьиъ айиб
"СУНДКЬИЪ" АЙИБ
– Гьамус узузра йишв апIинай!
– Магьа, деъ гьаму хюйин шишлариин.
– Хъа гъагъарикан гьапIза?
– Гъагъар див хюйириин, хъа уву яв гъагъарин зиин деъ.
– Хъа гъюргъиш гьапIза?
– Гьаци уьбгъруб фу аяв душваъ?
– Ден ружденияйис балин сервис, саб банк мас ва хах алдадабцIу гъути никк.
БицIи маршруткасиб УАЗдиъ айи йицIимиржир кас гъяаьлхъю.
– Дугъан яв гъути никк гьаз ву?
– Аьгъдарзуз, кактейлиян–фиян апIуз абкъин гъапунзуз.
– Гьамци, гьаму рякъяриъди дидкан ужуб коктейли хьибди, – сари гъапибси хъана вари гъяаьлхъю...
– Машин гъябгъюри вари ккебяхънадучва...
– Ккебебехъуз фу чара а, илкьан хътабгъуз йишв адрушваъ!
– Я бай, я шуфир, гьаму яв сундукьу гьагъму горийиинна улдубчIвиган дебкк, кIанккан лизиб гъябгъюрайиси азуз.
– Гья–гья–гья! Наънан ву гъябгъюраяв?!
– Валлагь, банк гъачабхьубси ву...
***
– Хъа йизубдиз лигачва: битундин гъапагъ ягълухъихьди йибтIнашра, алдабхъну вари компот удубздийизки...
– Ва–а–а, я Прискила, му турбайиъ айи кIару пIялцIикIсиб фу вуяв?
– Увура йиз убгурайишв'ин кьил маалабхьана, имбуна–имдру саб балун чIимччаринна урхьарин машинккайихъан дярягъну дапIнайи варения вуйиз, дарманди Дербентдиз масу тувуз гъабхурайиб. Магь увуз!!!
***
– Гьаму шлин сумка ву? Гьадабгъай гьеле, радиаторихъ шид хъубзуз бедре ккадабгъуза.
– Дийигъ, дийигъ, ихтиятди, уьбгъруб а душваъ...
– Гъи ичв варидарин гьапIру уьргърудар вуячв, гьей!
– Хъа гьапIза, шуру хабар дапIназуз экзаменариз чпин институтдин мялимариз торт апIурча, муртйир хъадаъ кIури. Йиз жарадариин хъугъвал алдруган магьа узу хьади гъяраза.
– Муртйир Дербентдиз?!!
– Фтиин мюгьтал духьнава? Дербентдиъ дурар чIанади дар гьа!..
– Агь байкIи йиз шуран муртйир, учву гъюргъюндайиш!.. Кьяши дубхьнайибси вуда сумккайин кIан... Гьаму яв гъагъи бедре алабхъну йиз муртйир гъучвурхьну гьа бай?!
– Тортназ уву дурар фицира ккутIукурадарна?!..
***
– Чиркар чист лизи гъапIдиз гьаму хюйири...
– Яв чиркарна кIанартIан дарив, гьеле узуз лиг, кIуллансина чист алацIназа, пягьливнарихь хьайиганси...
– Хъа уву наана гъягъюрайир вува?
– Йицарихьна Сулан-сивиз.
– Гьамциб кюкниинди гьамдиъ эуьндайиш саб минутди Ургъ'анзина ктIурччвдайна?!
– ГьапIза, гъагъи гъагъ хьазухь.
– Хъа Фурдгъарин гъазмйирихъанзина Мукъуъди хъа ярхла дарнуз?
– За-то уззарикканззина дарди.
– Ичв нубатин?
– Ав.
– Гъюрури эмейиз cap афрариз швирар-лишварра акъин.
– Йиз шубуд йигъ шулиз.
– Яв аьхирхай ибшрияв, батихайир! Узу увуз закуриз акъин кIурадарза гьа!..
***
– Духну сад-кьюдигъ хьайизра, мура хъади гьапIрайир вува, Фамар?
– Гъвандиккна швушварди гъягъюрача.
– Хъа му Гъвандиккна гъябгъюрайин?
– Учу ич Чювккензина ликри вушра гъягъярча.
– Гьаци тIурччвури хилар?
– Аварша али уьлра хьачухь, саб ккуртдинишвра, чIяаьну сарун, дураринра учуз гъабхиб фукIара адайи, саб мижар кайи дастамална цимцIлар хъудутIнайи ягълухъ...
– Гьавай, эай, хъапIрахьа...
– Яваш, яваш, гьараригъ гъючIвдар гъюдучIвнадар.
– Дурари гьадмукьан кьан апIуз, гьирин ухди слин хюл дипIну хъабхьнадарда!
– Хъа папрусарра дизигну ккундарин!..
– Магьа чпин, машиндиъ зигри... Кьан шулазуз... Бензин хъабццурайиз...
***
– Йиз йишв набши?
– Яв йишв – никьаригъ!
– Гья–гья–гья–я!..
– УлдучIв йиз йишвлан, думу узу кадабгънайиб вуйиз!
– Ктабгъузкьан юкIв улубкьнийнив мид'ин?!
– Марабхан! ХъудубтI!
– Хъа увура хъучIубх!
– Эй, эй! фтин кIуллан лижжар апIурачва?! Шуран кIуллан?!
– Хъа му йиз йишвлан гьаз гъудужвурадар, гьеле узу аьхюр вушра.
– Гьелебелесен му кьаби–кьюци духьна, хъа фукьан аьхюр вува узутIан? – шубудигъандин!...
– Хъа фици вушра...
– Гьан, йиз униъ деъ увуз гьадмукьан ккундуш.
– Ухди гьаци сарун. Гьанеле кабхь, сабсана ГъуштIилна гъяйиз учIуфухьа!..
– Я бай, я шуфир, гьаму сундкьиин улдар алдарнив?
– Йиз гъвалахъ хъайи улдтIан абццруб дар...
– ГьапIдикIан му ниарикан, кIул алдабхъурайиз...
– Гьам–мус Дербентдиз хъуркьдихьа, сацIиб аьгь апIинай. Гьамкьан йисари ичв жилар фици аьгь апIури шулчва?! Гьеле мурари мушваъ арагъи убгъурира адар.
– Гьадмусана мийи ихь мушваъ дарапIрайиб!.. Агь байкIи, Гъуннуар!!!
– Хъа уву наънан, вува?
– Узузра кайиб ву гьа!
– Гъуннуарин фу вухъа?
– ФукIа. Вари ужуди ву. Гъачай сацIиб ухьу ухькан фикир апIухьа...
© Copyright:
Рашид Азизов, 2016
Свидетельство о публикации №216100101663