Мусакъайил Нуридинил Мух1амадил вас Нуридиница бицараб
Кизилюрталда дир рукъалда аск1овехун вук1ана рукъалъ Ирисханов Гъайирхан. Цо нухалъ к1иго чияс хъухъадизабулеб бехчи бугищали ц1ехон дун ун вук1ана Гъайирханихъе, х1алт1и гьабизе гьебги х1ажалъун. Дун лъил-щивалиги ц1ехон лъан хадуб гьес бицана рагъул заманаялда каналал окопал рухъизе вит1ун вук1анила жив. Цадахъ вук1анила Нуридинги. Цо нухалъ квачан унтунищ вук1аравали, Нуридиница къаси заманаялъ ц1а бакун бук1анила хинлъизейилан. Гьеб сабаблъун подвалг1адин бухъараб рагьлилаб квачараб бак1алъ т1амун вук1анила гъов (Гьеб бук1ана Грозный мухъалъе немцазул самолётаз бомбаби реххун доб Ват1анияб рагъ ина бугеб заман, киса-кирего т1асан немцазулги нилъеразулги самолётал роржанхъулеб мех. Ц1а бакизе гъукъараб бук1ана, канлъи бугеб бак1алъе бомбаби разе рес бук1ун. Къасисеб бец1аб заманаялъ канлъи гьабизе бегьулареб). Радал балагьидал Нуридинида унтун вахъине к1ун гьеч1о. Унтарав гьев рокъове щвезавизе вит1анила жив солдатаз гьоко-оцалгун. Гьевгун инаго Бавтугъаялде щведал, Нуридиница Кизилюрт мухъги бихьизабун абунила, гьениб шагьар бук1ине бугилан. Щуго-анлъго гурони рукъ бук1инч1ила гьениб...Хадусан рокъоре щун рахъиндал Нуридиница абунила жинде, дуца абейин дир имг1аласде (ц1ар к1очон буго) метер рогьалилъ жив ц1ализе вач1айилан. Жинца абунила Нуридиниде, дуца бицунеб жо щибин, мун холарилан абун г1емер к1варго гьабич1ила. Кинги гъос абурабги гьабун дов Нуридинил имг1аласухъе ун бицанила жинца дос абураб жо. Гьев имг1ал радал т1аде щвелелде Нуридин къадаралде щола ватун, ц1алун вуго дос... Гьеб хабарги бицун Гъайирханица жиндирго бехчи кьуна дихъе, гьаб бугила доб рагъул заманаялдаго жиндихъ х1алт1изабула бук1араб бехчийиланги абун. Гьеб бехчиги дуего тейин, жинца кьуниланги бицунгейиланги абун. Гьеб Гъайирханица кьураб бехчи г1емер мехалъ бук1ана дихъ. Цояв жинхъе х1алт1изе кьейилан гьарун вач1ун кьун бук1анила. Гьес т1аг1инабун щвеч1ила нахъе доб бехчи.
Раг1уда хадуб:
Мусакъайил Нуридин, ц1аларав валияв чи вук1ун цо чангояс вицуна раг1ун бук1ана дида, хасго Калининаулалдаса Илил вац Г1алиасх1абица. Гьеб гуребги, каналал рухъизе рит1ун хваразул цоги чигясул ц1арги лъана...
Кизилюрт - Алмахъ