Матрошка
Сон
…Калі я спускалася па эскалатары, мая правая нага захраснула ў шчыліне паміж прыступкамі, а левая - ўшчамілася ў шчыліну ў бакавой сценцы, і ляснулася я, удрукаваўшыся тварам у падлогу, у самым канцы спуску. І прачнулася…
…І падкінула мяне на ложку высока, і апускаючыся, прыціснула я ката, які спаў у мяне ў нагах. І здрыганулася я ад яго немага віску, і прачнулася…
…І адчыніліся ўваходныя дзверы, і ўвайшоў Нехта, імя якога нельга мне прамаўляць, каб не апаганіць яго. І валасы яго раздзімаліся як змеі на галаве Медузы-Гаргоны, і быў ён у страшным гневе:
- Ты парушыла мой спакой сваім віскам! Я не магу заснуць з-за гэтага. Таму вымятайся адгэтуль, і я нічога ведаць і слухаць не жадаю! Жыва!..
…І сціснулася маё сэрца ад тугі безнадзейнай, і я прачнулася…
…Цёмна. Ціха. За акном шамаціць дождж..