Метрапалітэн
Трызненне
Канчатковую станцыю мятро вынеслі на паверхню, і зараз зусім не трэба было спускацца пад зямлю.
Да платформы для пасадкі падалі адзін вагон.
- Гэта ўваходны ці выходны? - спытала я: рэйкавы шлях быў адзін.
- Пра гэта трэба спытаць у машыніста - адказалі мне.
- Скажыце! - закрычала я машыністу, - гэта ўваходны ці выходны?
- Уваходны! - закрычаў мне ў адказ машыніст.
"Не мой…" - падумала я.
Вагон пакаціў, за ім падкаціў другі.
- Скажыце! - ізноў закрычала я машыністу, - гэта ўваходны ці выходны?
- Выходны! - закрычаў мне ў адказ машыніст.
"Зараз мой…" - падумала я.
Платформа вагона была на ўзроўні вышэй майго росту, і прыйшлося падцягвацца і караскацца, і яшчэ мяне падштурхоўвалі. Нарэшце я ў вагоне. Астатнія забраліся лёгка і хутка.
"Каму аддаваць жэтончык?" - падумала я, і звярнулася з гэтым пытаннем да машыніста.
- Жэтон у вас новы ці стары? - строга спытаў машыніст.
- Стары, напэўна, - адказала я, круцячы ў пальцах вышчарблены і падрапаны жэтончык.
- Тады чытайце інструкцыю, - сказаў машыніст, - і той знак, што там паказаны, накрэсліце на сваім жэтоне.
Да інструкцыі, якая вісела на кабіне машыніста, зверху быў прымацаваны лісток з лічбай, іерогліфам і нейкім тэкстам.
Толькі памкнулася я перамалёўваць іерогліф, як інструкцыя перакасілася, і лісток знік з поля зроку.
Тады я стала круціць інструкцыю, і нарэшце ўсталявала яе так, што прымацаваны лісток апынуўся якраз ўгары.
Але іерогліф быў на ім зусім не той, і, да к таму ж, тэкст самой інструкцыі быў перавернуты. А вакол сышлося некалькі чалавек, якія спрабавалі там штосьці прачытаць.
Тады я перавярнула інструкцыю.
Зверху, злева, быў яшчэ адзін лісток. На ім быў іерогліф, але зноў не той, што трэба.
Раптам з'явіўся яшчэ адзін лісток зверху, прама па цэнтры. На ім была лічба восем. Я паглядзела на свой жэтон: на ім таксама была лічба восем. Тады я зноў паглядзела на лісток з васьмёркай - там быў патрэбны мне іерогліф.
І тут я заўважыла, што па ўсім перыметры інструкцыі прымацавана шмат лісцікаў, і кожны іерогліф хто-небудзь змалёўвае.
Толькі я памкнулася пачаць змалёўваць свой іерогліф, як прачнулася.