Ва ўніверсітэт на таксі
Прыехала я паступаць у БДУ на прыкладную матэматыку. Выйшла з цягніка, стаю на прывакзальнай плошчы, і не ведаю, куды далей, разгубілася… Падыходзіць да мяне таксіст:
- Табе куды?
- Ва ўніверсітэт, - важна паведамляю я.
- Ты не жартуеш, сур'ёзна? - дзівіцца таксіст.
- Сур'ёзна, - яшчэ важней пацвярджаю я.
Таксіст на хвілінку задумаўся, а потым кажа:
- Рубель дасі - падвязу.
Я пагадзілася, і мы паехалі.
Таксіст павольна правёз мяне вакол прывакзальнай плошчы, праехаў міма радыёфізічнага карпуса і павярнуў на плошчу Леніна, якая знаходзілася непасрэдна за прывакзальнай. На плошчы Леніна ён спыніўся ля галоўнага корпуса БДУ.
- Усё, прыехалі.
Я дала яму рубель і выйшла.
Дзверы былі зачынены на ключ, таму што было яшчэ вельмі рана.
Я пастаяла трохі ля зачыненых дзвярэй, а потым пайшла на вакзал пешшу: там былі лаўкі, а тут ніводнай, суцэльны пусты пляц…