І на Марсе будуць яблыні квітнець
На ўроку астраноміі даў нам Яўген Міхайлавіч заданне на дом: намаляваць малюнак на фантастычную касмічную тэму.
Што намаляваць? Нічога прыдумаць не магу.
Выпадкова трапіўся мне малюнак у часопісе. Карыкатура. Робат, вялікі, масіўны, квадратны, налягае апантана на дзяржальні плуга, які цягне, запрэжаная ў плуг кляча, бедная, худая, змардаваная.
І ўзяла я за аснову гэта малюнак. І каня намалявала, і робата. Яны ў мяне атрымаліся іншыя, не такія як на малюнку. І яшчэ я дадала касманаўта, які сядзіць непадалёку ў шкляной кабінцы і кіруе дыстанцыйна робатам. І напісала зверху вялікімі літарамі: "І на Марсе будуць яблыні квітнець"
Прыйшла Анька. Убачыўшы, што я малюю, яна пачала весяла смяяцца.
- Сама прыдумала? - пытае.
- Не, - кажу, і паказала часопіс.
- Тады не цікава, - сказала Анька і сышла ў спальню.
"Больш нікому часопіс не пакажу", - пакрыўдзілася я.
Прыйшоў дзядзька Пеця, мамчын брат, да нас у госці. Убачыў мой малюнак і таксама пачаў смяяцца.
- Сама прыдумала? - пытае.
- Сама, - хлушу я.
Дзядзька Пеця, смеючыся, пайшоў да Анькі і пытаецца ў яе:
- Ты бачыла, які смешны малюнак Валька намалявала?
- Гэта яна з часопіса змалявала, - выдала мяне Анька.
І дзядзька Пеця тут жа сышоў. Праходзячы міма мяне, ён нават не паглядзеў у мой бок.
***
У школе мой малюнак таксама ўсім вельмі спадабаўся. Усё весяла смяяліся.
Пра часопіс я нічога не сказала.
Касманаўта ж я дадала сама, думала я, значыць штосьці маё ёсць.