Хто ў доме гаспадар?
- Хто ў доме гаспадар? - спытала я двухгадовага Сашу.
- Не ведаю, - адказаў Саша.
- На гэта пытанне заўсёды трэба адказваць "Я", - растлумачыла я.
- Я, - паслухмяна паўтарыў Саша.
Неяк, знаходзячыся ў мяне ў гасцях, мой брат Валер заўважыў:
- Сашка ў цябе нейкі ціхі, не бегае, не шуміць, увесь час у кутку сядзіць са сваімі цацкамі…
- А ты спытай у яго: "Хто ў доме гаспадар?" - параіла я. Я ўспомніла, што сам Валерка ў дзяцінстве вельмі любіў гэта пытанне грозным голасам задаваць: "Хто ў дом гаспадар?..."
- Хто ў доме гаспадар? - спытаў Валер у Сашулькі.
- Я. - ціха і сціпла адказаў Сашулік.
А Валер засмяяўся…
Зараз Сашульку хутка дваццаць пяць. І ніхто ўжо не сумняваецца ў тым, хто ў доме гаспадар, і хто на пабягушках у таленавітага музыкі….