Эмкал, УьстагI, Сту цхьаьнакхетта хиллера новкъа дIаоьхуш. Новкъахь, боьжна Iуьллуш, карийра царна докъаран цинц…
- Муха доькъур ду вай хIара докъар? – массарна а яъал хIума а яц-кха хIара, – элира УьстагIо, - бакъахьа хир дацара вай ваьшлахь воккханиг мила ву а хьаьжна, воккхачунна кхачийтича? Ала ма аьлла маьлхан дуьнен чу серло яржийначу Пайхамара, Делан салам хиларуо: «Ларалаш воккханиг!», - аьлла.
- МI – мI-I – аьлла, бистхилира Сту, - сан доттагIий, УьстагIо лун хьехам чулацам болуш хета суна, дуьйцур вай дуьнентIа девлла вайн денош – ханна воккхачуьнга кховдор вай докъаран цинц.
Элира УьстагIо:
- Бежара со Халил –УллахI Пайхамаран жаш юкъахь, гергарлонан уьйр яра сан ИбрахIим Пайхамара урс хьаькхначу Iахарца!
Старо элира:
- Мича кхачалур бу хьо соьга, со хуьлу шул а боккха – со дIа а бужий, латта охура Адам Пайхамара!
Цу шиннан аьшпех а, шинна а ца хетачу эхьах цецъяьллачу Эмкало яийтира шен, Iад санна, сеттина йолу еха ворта охьа, баьхьира, ка тоьхна, докъаран цинц ирх, элира шингга а:
- Ашшимма а дуьйцург бакъ делахь а, дацахь а, со шуьца къийсалур яц, воккханиг мила ву бохуш, – сан ворта еха ю, ткъа шаьшшиннал жима со йоций шуна суначул а дика хаьа, сан доттагIий!...
Хуьлу - кха бакъ… ворта еха ерг…, катоха кхиънехь… .