Цхьана дийнахь, оьшург чохь кара а ца йина, эца ваха вийзира Баймурда. Цхьана туькнахь а, шолгIачу туьканахь а, мах хаьттича, цецваьллачу Баймурда хаьттира юхкачунга:
- Кхуьнан мах хIоккхул бен а ма бац, тIкъа ахьа соьмана тIе шиъ ма туху, къехьа дац иза? – аьлла.
Бахамах Iехавелла хиллехь а, я хьуьнхахь кхиийна хиллехь а, туьканан дас элира Баймурде:
- Ваша, со къен нах кхаба аьлла ца веана хIокху дуьнена, хьо реза вацахь, кхечу туьканахь лахахь! – аьлла.
(Йохка – эцар лелориг кху юьртахь Iийна а, кхиъна а вацара, тIевеана стаг вара).
«ЭхI!» - аьлла хетта, туьканара ара велира Баймурд. Юха вогIуш, ойланашка вахначу воккхачу стагана дага деира шайн юьрта моллас, Сахьаб цIе а йолуш хиллачу Iелама стага дийцинарг.
Нигат а дина, «Далла герга кхочур ву со!» - аьлла, нах а, доьзал а дIа а тесна, адам доцу меттиг лехна, ойланашка велира цхьа стаг.
Ша хиъначуьра меттах ца волуш, месаш яхелла, олхазараш, ца кхоьруш, шен коьрта тIехь бенаш бан дуьладелчи, ша дага лаьцнарг кхочуш хиллий а хиъна, хиъначуьра гIаьттина, юха нахана тIе ван новкъа велира стаг. ВогIуш, юьрта кхаьчча, хоьттина йокха базар а, дукха адам а гира цунна. Кху стега де дика а дой, тIех а бовлий, дIаоьхура нах. Бехха биначу базаран могIанехь цхьа йохка-эцархо билгал а ваьккхина, цунна тIе вахара иза.
Юхкаш верг ван а вара цу бехачу могIанехь биллгала – ца хеддаша тIе догIура адам, цера гIуллакхе хьожий, сихха оьшург дIакховда йой, хьийзара ханна ша жима вацахь а, юхкуш волу воккха стаг.
Эцнарг схьаоьций, «Дала беркат Дойла хьуна!» - олий дIадоьдура адамаш.
Малх чу буззалца хьоьжуш, тидам беш а лаьттина, юхкаш вверг паргIат ваьлча, цунна тIе веара хьуьнхара веана стаг, салам а луш. ТIевеаначу стагера салам схьа а эцна, пхьегIи чу хи доьттина, хи кховдира шена тIе веаначу стаге.
Хих къурд а бина, ша тIе варан бахьан хIун ду аьлла элира цуо.
- Суна хезна хьох лаьцна наха дуьйцуш, Дала меле дуьллийла ахьа лайна хало. Ахьа тахана лелийнарг аса масех шо хьалха лелийнера. И гIуллакх чекх даьлча, нахана гIуллакх дан деза аса, аьлла, хIара болх сайна тIе лаьцна аса.
ТIевеаначу стага элира:
- Со кхуза кхаьчча, наха лара а лоруш, нах цец а буьйлуш хира бу моттара суна, тIкъа наха-м со тергал а ца во!
- Адам цец дала хIума дисна а дац, сан ваша!
«Айса дийриг Дела доьхьа до-кха аса!» - аьлла нигат а дина, ахьа нахана гIуллакх дахь, хьо нийсачу новкъахь ву хьуна. ТIкъа, Далла гIуллакх деш ву со – бохуш а волуш, хьан са бахамах тасаделла далахь, ахьа лелориг хьан кхочуш хир дац.
- Эццал дукха адам хьуна тIе даран бахьна хIун ду, кху бехачу могIанахь дуккха а кхин а юхкуш нах боллушехь?
- И соьга ца хоттуш, тIе богIучу нахе хата деза. ТIкъа, сан болх – терза нийса лела дар, цадогIург ца дехар, хьарам мах ца лелабар ду.
Ишта, дохадале дийцинарг дага деанера урамехула меллаша вогIачу Баймурдана .
Кхин цхьаъ а туька яйра воккхачу стагана, чуй-арий оьхуш, ца совцуш, адам а лелаш.
Чу ваьллачу стеган гIуллакхе хьаьжира гIе-метта хоьттина стаг, оьшург сихха схьаеара. Механа реза а хилла, цIехьана дага деана, хаьттира Баймурда:
- Хьена ю хIара туька? – аьлла.
- Леча цIе йолуш ву-кха иза, - аьлла жоп делира цунна.
- Дала беркат эша мадойла цуьнан хIусамехь а, цуьнан доьзална а. ДIатохахьа аса аьлларг Лечи лорах.
- Дела реза хуьлда хьуна а! ДIатухар ду аса!
Ара ваьлла, паргIат цIехьа вахара Баймурд.
Цунна мичара хаара, шена оьшург йоьхкинарг туьканан да Леча вуьйла!