1944 шо. Iаьнан шийла бутт. БархI де - буьйса дIадаьлла вайн дай-наной, даьхни санна, вагонаш тIе а боьттина, шийлачу, сийначу Сибреха дIабигина.
Тхо кхоьллинна Веза Сийлахь Дела! Цкъа кхачабелла чекхбер буй - техьа адамана тIебоьссина некъан бала.
Инзаре бала бу адамашкахь оцу деношкахь – жима зуда а, воккха стаг а, бераш а – берриш а цхьаьна тоьхна бу – дац хи, яц йовхо, гIиллакхах, оьздангаллех ца боха гIерташ, тасабелла бохку нах вагонашкахь.
УьссалгIачу дийнахь эрна арахь соцу цIерпошт, хехоша -салташа дIайоьллу вагонийн неIарш – хинна луо эца а, делахь дакъа арадаккхийта а – луо тIе хьокхий, дакъа къайладоккху…
Ши Iаса а йолуш воккха стаг вуссу вагон тIера охьа – къайлахо меттиг езаш, цхьаъ, шиъ аьчган некъ а хадабой, дехьа волу и. Воккхачу стеган цIе Элси ю.
Шен гIуллакх диний-дазий хеза Элсина цIерпошт «гIарт-гIарт-гIарт» аьлла, вагонаш вовшаш а тухуш, меттахйолуш. ТIекхуьур вац Элси – ши ког халла бен лелаш бац. Вагон тIера охьаэккхий, цунна тIехьодий, Элси шен ги а тухий, вухахьоду жима стаг – Михалскера Iумара ву и.
ЦIерпошт йорт оьцуш ю. Гехь волчу Элсис олу Iумаре: «Iумара! Хьо кхоьллинчу хьайн Делан дуьхьа вита со, вай ший а тIекхуьур вац! Хьо а кхузахь висахь, и боккха доьзал лийр бу мацалла! Охьакхосса со, ва Iумара!
Висира Элси эрна арахь. ТIаьхьарчу вагона, салташа дуьхьало ешшехь, хьалавала кхиира Iумара.
Юха цIерпошт сецча, ша тIера охьаиккхинчу вагона велира Iумар.
Тап - аьлла тийна дара чохь, доккхуш са а ца хезара – массо а адаман бIаьрг Iумаре хьаьжна бара.
Арара луо санна, кIайн юьхь а йолуш, боккха Iаьржа ши бIаьрг болуш, къена, йоккха стаг яра Iумаре хьоьжуш.
Жима стаг ша вайча, арара шело йиц а еш, шийла мохь белира йоккхачу стаге: « Ва Элси, ва сан кIант!!!»
Юьхьсибат корталих хьарчийна, кхин и адамана ца гойтуш, Акмолинске кхаьчча, дог а иккхина, елира Элсин нана… .
И новкъахь хилларг диц ца луш, и дагара ца долуш, къанвелча цIахь кхелхира Товсолтанан Iумхин кIант Iумара.