Догц1ена адам а ,дика хьехархо а.
Хьехархо! И дош массарна а цхьа хьоме а,гергара а хета шен дахарехь дика хьехархой нисбеллачу адамашна къаьстина.Доккха дукъ ду хьехархочун белшаш т1е дуьжуш дерг.Цуьнна коьртачех 1алашо -кьоначу ц1еначу берийн синойн беш кхиор:г1иллакх-оьздангалла,Даймахке безам,1алам 1алашдар,дуьненан массо а адамашца тарвала хаар, ,хьекъал,кхетам ,ненан мотт ларар -иштта кхин а дуккха а мехала декхарш ду хьехархошна хьалха.Цундела берашца болх бан аравалале б1озза ойла ян еза:тарлур ву ша кегийрачарца я -вац.Нагахь оцу хьахийначу декхаршца ша ларор велахь,ша кхиазхошна мостаг1 а ца хуьлуш,доттаг1 хилалур велахь,цаьрца къинхетаме дог а шен хир делахь, майра вала мегар ду хьехархойн новкъа.
Эрна ца хилла цу новкъа ялар г1аларчу ворх1алг1ачу «Марем» ц1е йолчу гимназехь физикан,математикан 1илма хьоьхуш йолчу Изнаурова Хижан Баудиновнин а.
Берийн доттаг1а ала хьакъ а долуш ю тахана и догц1ена адам а,дика хьехархо а.
Шен белхан некъ цуо д1аболийра 1986 - чу шарахь ,хьехархойн институт чекх а яьккхина ц1а йирзича,Хьалха-Март1ант1ерачу №1 йолчу ишколехь.Дика а доьшуш,массо а коьртачу г1уллакхийн куьйгалхо а йолуш дийшира школехь а. Лоьрийн институте яха 1алашо х1оттийнера х1ета къоначу йо1а.Астрахански институтехь д1аелира экзаменаш ,амма цхьа балл т1еоьшуш а хилла , рицкъа ца хиларна чекх ца йолуш йисира.
Шарахь школехь болх бира къоначу йо1а.Ткъа 1981-чу шарахь Соьлжа-г1аларчу хьехархойн институте деша яхара ,физикан,математикан факультете.
Адамийн лор хила 1алашо лаьцна араяьллачу йоь1ан берийн синойн дарбанча хила дийзира еххачу ханна.
Х1ижан суна дуьххьара 34-чу ишколехь евзина,цхьаьна болх бина охашимма.Дика амал йолуш ,догц1ена,къинхетаме адам санна гайтина цуо ша даим а .Дешархошна догц1ена доттаг1,хьехаршна дика накъост а хуьлу иза оьшучохь.Коьртаниг бусулба дог-ойла йолуш а ю,шен 1илма дезаш а,довза лууш а.
2007 шарахь №7 гимназин куьйгалло кхайкхина схьаеана цигахь болх беш а ю таханналц.Хийллаза д1акхайкхина кхечу дешаран учрежденешка а. Ша д1айоьллачу меттехь болх бан лааро,берашца йолучу уьйра-марзоно а сецайо .
Х1ижанан болх дуккхаза а совг1аташца билгалбаьккхина гимназин администрацис а ,Департаментан к1ошто а кхин д1а а,амма берийн безамал доккха совг1ат цхьа а х1ума ца лору хьехархочо.
Х1ижана д1ахьочу урокашкахь сих-сиха нисло со: физика 1илма даим а хетта цхьа къайленийн туш санна..Со литератор елахь а,хазахеташ йоьду цуьнан урокашка.
Цуьнан уроке кхаьчча литературе кхаьчна моьттур ду цкъа- цкъа .Физик-лирик эр дара ас Х1ижанах,байташ яздаран говзалла а ю цуьнан. Ткъа пианино цуочул хаза локхур бац цхьаммо а,соьга хаьттича. Кхоллараллин стаг йолу дела атта ду Х1ижанна берашца къахьега а.Ткъа муьлха цуьнан урок хуьлу лекхачу т1ег1а т1ехь.
Керла юкъабевлла г1ирсаш дукха хан ю цуо шен балха юкъа озийна:компьютер,интерактивни у,ЕГЭ-н кечамбаран г1ирсаш лекхара бу. .Халонашна къар ца ялар а ,диканах дог ца диллар а -коьрта башхаллаш ю цуьнан амалехь.
Со т1аьххьара хилира цуьнан ловзаран кепехь д1аяьхьначу урокехь.1аламат самукъне ,лехаме д1аяхара иза.
Урокан ц1е : «Г1олехь муьлхарг ву?»
Класс шина декъе йоькъу : хьекъал ира долчех иэбо хаарш меллаъ лахара дерш.
Хьалхара тобанан тхьамданча - Ахмутханова Хабта,шоллаг1чун- Исаева Залина.
Кьовсам бира задачашна т1ехь,тема йийцаре ярехь, синквейн хаза х1оттаярехь, дерзош кроссворд х1оттийра.
Х1ара тайпа урокаш к1ирнах шозза-кхузза а нисло .Цундела хеза сени чохь хьехархочун дуьхьала уьдучу берийн аьзнаш кест-кеста: «Х1ижан Баудиновна , вайн урок маца ю?»
Цуьнан дуккха а дешархой дакъалоцуш хилла 1илманан конференцешкахь.Хийла хьалхара меттигаш а яьхна цара. ЕГЭ бераш дика д1аяларехь вайн республикехь тоьллачех специалист а ю Х1ижан .
Хьехархойн болх х1унда хаьржира ахь аьлла хаьттича,Х1ижана жоп делира:
« 1илма 1амор а ,иза д1ахьехар а деза лерина ду бусулба динехь а,дахарехь а,цундела яьлла цу новкъа.Я дохко а ца яьлла,мел чолхе ,хала и некъ хиларх»
Тахана Х1ижан суна евзина иттех шо сов зама ю,цунах лаьцна со майра тоьшалла дан яьхьар ю.Хьалха-Мартант1ерачу Бауддин йо1 Х1ижан догц1ена адам а,дика хьехархо а ю.Дала иштта хьехархой дебабойла вайн махкахь!
Статья об очень хорошем учителе физики и математики ,чистосердечном,любящем свою профессию и детей человеке Изнауровой Хижан Баудиновне.
газета "Хьехархо"